Ngakhulela eWarialda, edorobheni elincani eliseNew South Wales. IWarialda iimphakathi wabafuyi bezimvu, iinkomo, abalimi beenthoro neentjalo ezincani. Idorobheli lihlwengile begodu alinabo ubulelesi obunengi.

Njengombana bengingomkhulu ebantwaneni abalitjhumi, nengineminyaka eli-13 ngathoma ukusebenza bona ngisize ukutlhogomela umndeni. Njengombana bengingakafundi khulu, ngasebenza emaplasini. Nangineminyaka eli-15 bengisebenza njengomtlhogomeli weenlwana, ngibamba iimpera zomango.

Ukusebenza emaplasini bekuneenzuzo ezinengi. Bengiwuthabela khulu umsebenzi, kuhlanganise nendawo. Bengihlala ngotha umlilo ebusuku ngibukele inyanga nesibhakabhaka esineenkwekwezi njengombana kuzwakala umoya opholileko webusuku onuka kamnandi ovela ehlathini. Ngikhumbula ngicabanga bona kufanele kube noMuntu obumbe zoke izintwezi ezikarisako. Ngakelinye ihlangothi, emaplasini bengibandakanyeke ezintweni ezilimazako. Bengihlala ngizwa abantu bathukana, begodu bekubulula ngami ukufumana igwayi. Msinyana ukubhema nokuthukana kwaba yinto ejayelekileko epilwenami.

Nangihlanganisa iminyaka eli-18, ngathuthela eSydney. Ngazama ukungenela ubusotja kodwana isibawo sami saliwa ngombana ngingakafundi. Ngafumana umsebenzi bengahlala umnyaka eSydney. Kungesikhatheso ngathoma ukuhlangana naboFakazi bakaJehova. Ngamukela isimemo sokuba khona komunye wemihlanganwabo, begodu khonokho ngatjheja bona iimfundiso zabo ziliqiniso.

Nokho, msinyana ngemva kwalokho, ngaqunta ukubuyela emaplasini. Ngagcina sengiseGoondiwindi, eQueensland. Ngafumana umsebenzi, ngatjhada, okumbi kukuthi ngathoma nokusela.

 Mina nomkami saba nabantwana ababili. Ngemva kokobana amadodanami abelethiwe, ngathoma ukucabangisisa ngepilwami bona inqophephi. Ngakhumbula engakuzwa emhlanganweni waboFakazi eSydney, begodu ngaqunta ukwenza okuthileko ngakho.

Ngafumana umagazini wakade weSithalasokulinda, onesiphande se-ofisi legatja laboFakazi bakaJehova e-Australia. Ngathumela incwadi ngibawa isizo. Nebangiphendulako, bathumela uFakazi onomusa nethando weza ukuzongivakatjhela. Msinyana, wafunda nami iBhayibheli.

Njengombana ngifunda iBhayibheli, ngabona bonyana kufuze ngenze amatjhuguluko amakhulu epilwenami. Ivesi yeBhayibheli eyangithinta ngokukhethekileko ngeye-2 Korinte 7:1. Ivesi leyo isikhuthaza bona ‘sizihlambulule kikho koke ukusilaphala komzimba.’

Ngaqunta ukulisa ukubhema nokusebenzisa kumbi utjwala. Bekungasibulula ukwenza amatjhuguluko anjalo, njengombana imikghwa le besele iyingcenye yepilwami isikhathi eside. Kodwana bengizimisele ukuphila ngendlela ethabisa uZimu. Into eyangisiza khulu bekukusebenzisa ikambisolawulo etlolwe kumaRoma 12:2 ethi: “Ningaziphathi njengokwemikhuba yephaseli, kodwana tjhugululwani ngokwenziwa kabutjha emikhumbulweni yenu.” Ngalemuka bonyana nekufuze ngitjhentjhe imikghwami, bekutlhogeka ngitjhentjhe ukucabanga kwami begodu ngiqale imikghwami ngendlela uZimu ayiqala ngayo—njengelimazako. Ngesizo lakhe, ngakghona ukulisa ukubhema nokusebenzisa kumbi utjwala.

Nokho, okwaba sitjhijilo khulu bekukulisa ukuthukana. Bengisazi isiluleko seBhayibheli esitlolwe kwebe-Efesu 4:29 esithi: “Ningavumi bona ngemilonyeni yenu kuphume iinkulumo ezimbi ezilihlazo.” Nanyana kunjalo akhenge ngiphumelele khonokho ukuhlwenga ilimi lami. Ngakufumana kulisizo ukucabangisisa ngamezwi aku-Isaya 40:26. Malungana nesibhakabhaka esizele iinkwekwezi ivesi le ifundeka bunje: “Qalani phezulu niyelele. Ngubani odale koke lokhu? Ngiloyo okhupha ibutho lesibhakabhaka ngesibalo; ubiza enye nenye ikwekwezi ngebizo layo. Ngebanga lamandlakhe amakhulu nokuqina kweenkhwepha zakhe, akulahleki ngitjho neyodwa.” Ngatjheja bona nengabe uZimu unamandla wokubumba indawo yoke—engithanda ukuyibukela—ngokuqinisekileko anganginikela amandla wokwenza itjhentjho bona ngimthabise. Ngokuthandaza kanengi nangokuzimisela, kancanikancani ngakghona ukulawula indlela engikhuluma ngayo.

Njengomtlhogomeli weenlwana, khenge ngibe nalo ithuba elingako lokucoca nabantu, njengombana bekunabantu abambalwa emaplasini lapho ebengisebenza khona. Nokho, ngebandulo engalifumana emihlanganweni yaboFakazi bakaJehova, ngifunde indlela yokukhuluma nabantu. Hlangana nezinye izinto, ibandulwelo lingenze ngakghona ukukhuluma nabanye ngeendaba ezimnandi zomBuso kaZimu.—Matewu 6:9, 10; 24:14.

Eminyakeni eminengi edlulileko, ngithabele ukukhonza njengomdala ebandleni. Kulilungelo ukwenza nanyana yini bona ngisize amakholwa engikunye nawo. Nokho isibusiso esikhulu, kukhonza uJehova ngobunye nomkami othembekileko nothandekako, nabantwabethu abahle.

Ngithokoza uJehova ngokuvumela—umuntu ongakafundi—bona afundiswe nguye. (Isaya 54:13) Ngivumelana ngokuzeleko namezwi wezAga 10:22 afundeka bunjesi: “Isibusiso sakaJehova siletha umnono nomtjhikatjhika awengezi litho kiwo.” Mina nomndenami siqale phambili ekufundeni okungeziweko ngoJehova nangokumkhonza ngokungapheliko.