TJHIDELA KUZIMU
Uzalisa ‘Iinhliziyo Zethu Ngokuzeleko’
UJehova uyasikhathalela kwamambala, nofana akanandaba nokutlhaga kwabantu ephasineli? IBhayibheli inikela ngependulo eduduzako yombuzo lo. Kwamambala uZimu uyawukhathalela umndeni obabantu, begodu ufuna sithabele ukuphila. Qobe langa uvumela—ngitjho nabantu abangathokoziko—bona bazuze ebuhleni bakhe obukhulu. Cabangela amezwi wompostoli uPowula.—Funda IzEnzo 14:16, 17.
Akhuluma nabantu bedorobheni leListra ebebangasi bakhulekeli bakaZimu, uPowula wathi: ‘Esikhathini esadlulako [uZimu] wavumela zoke iintjhaba bona zikhambe ngeendlela zazo. Kodwana akhange aliselele bona kungabi nobufakazi ngezinto ezihle azenzako: Waninisela izulu elivela ezulwini wanipha nesikhathi esinomnotho somnyaka nenala yokudla bewazalisa iinhliziyo zenu ngokuthaba.’ Amezwi lawo bekatjho ukuthini ebalalelini bakaPowula?
Abantu beListra bekubulula ngabo ukuzwisisa iqiniso lamezwi kaPowula. Bebayingcenye yomphakathi othanda ukulima begodu bebahlala endaweni enothileko nenamanzi. Njengombana uPowula abakhumbuza, uZimu umThombo wezulu neweenkhathi zeenthelo. Ngalokho, ngaso soke isikhathi nebavuna iinthoro ezinengi begodu bathabela ukudla okumnandi, bebazuza ebuhleni bakaZimu.
Amezwi kaPowula ebantwini beListra asifundisa iimfundo ezimbalwa eziqakathekileko ngoJehova uZimu.
UJehova usinikela ikululeko yokuzikhethela. Yelela bona uJehova wavumela zoke iintjhaba ezingasimaJuda “zikhambe ngeendlela zazo.” Enye incwadi yabatjhugululi beBhayibheli ithi amezwi la angatjho ‘ukukhamba ngendlela ezithanda ngayo’ nofana ‘ukwenza lokho ezicabanga bona kungcono kizo.’ UJehova akakateleli nanyana ngubani bona amkhulekele. Usinikele ikululeko yokuzikhethela—ikghono lokukhetha indlela esingaphila ngayo.—Duteronomi 30:19.
UJehova ufuna simazi. UPowula wahlathulula akhenge ‘aziliselele anganabufakazi.’ Incwadi okukhulunywe ngayo ngaphambili ithi amezwi la angatjho ukuthi “ubatjengise ngokukhanyako abantu bona unguZimu onjani.” Indalo kaZimu inikela ubufakazi obunamandla ‘beemfanelo zakhe ezingabonakaliko,’ kuhlanganise ubuhle, ukuhlakanipha, amandla nethando lakhe. (Roma 1:20) UJehova usambulele okunengi ngaye eBhayibhelini. (2 Thimothi 3:16, 17) Akukhanyi na bona ufuna simazi?
Qobe langa uvumela—ngitjho nabantu abangathokoziko—bona bazuze ebuhleni bakhe obukhulu
UJehova ufuna sithabe. UPowula wathi uzalisa ‘iinhliziyo zethu ngokudla nangokuthaba.’ Ngitjho nesoni esingamaziko uJehova singadla ukudla saneliseke begodu sifumane ithabo ekuphileni. Nokho, uZimu ufuna sifumane ithabo lamambala nelingapheliko. Lokho kungenzeka kwaphela nengabe sifunda iqiniso ngaye begodu silisebenzise ekuphileni kwethu.—IRhubo 144:15; Matewu 5:3.
Qobe langa soke siyazuza ebuhleni bakaJehova. Kubayini ungafundi okungeziweko ngendlela ongatjengisa ngayo ukuthokoza kwakho kuZimu ozalisa ihliziyo yakho ‘ngenala yokudla nangokuthaba’?
Iimphakamiso zokufunda IBhayibheli
