Ngakhulela eSantiago, ihlokodorobha yeChile, indawo lapho iindakamizwa, iinqhema zeenlelesi, nobulelesi bujayelekile khona. Nengineminyaka emihlanu ubaba wabulawa. Ngemva kwalokho, umma wahlala nendoda ebeyinelunya. Beyihlala isibetha sobabili. Ngisese neembazi ezingokwamazizo kusukela eminyakeni leyo.

Njengombana ngikhula, izinto nezingakhambi kuhle ngisabela ngokuba nelaka elikhulu. Bengilalela umbhino weheavy-metal, ngidakwa khulu begodu ngezinye iinkhathi ngisebenzisa iindakamizwa. Bengihlala ngilwa endleleni nabathengisi beendakamizwa, abalinga ukungibulala iinkhathi ezinengi. Ngesinye isikhathi, isiqhema seenlelesi esingazwani naso sangiqatjhela indoda edume kumbi bona ingibulale, kodwana ngakghona ukuphunyurha nginenceba linye kwaphela lokugwazwa. Kesinye isenzakalo, isiqhema sabathengisi beendakamizwa sangikhomba ngesigidi ehloko begodu salinga ukungilengisa.

Ngo-1996 ngathandana nomma ibizo lakhe nguCarolina, begodu satjhada ngo-1998. Ngemva kokubelethwa kwendodanethu yokuthoma, ngathuswa kukobana ngebanga lokuba kwami nenturhu, ngizokufana nosingababa wami ngitlhorise umndenami. Ngafuna isizo esikhungweni sokusiza abantu balulame sendaweni lapho ngihlala khona. Ngafumana ukulatjhwa nokululekwa, kodwana khenge kusebenze. Ngaragela phambili ngikwatiswa ngiyo yoke into encani; bengingalawuleki. Ngemizamo yokulisa ukulimaza umndenami, ngalinga ukuzibulala. Ngiyathokoza ngombana khenge ngiphumelele.

Bengingakholelwa kuZimu iminyaka eminengi, kodwana ngafuna ukukholelwa kuye. Ngalokho ngasonda ekolweni yabavangeli isikhathi esithileko. Ngesikhatheso, umkami bekafunda iBhayibheli naboFakazi bakaJehova. Bengibahloyile aboFakazi, begodu bengibathuka iinkhathi ezinengi. Kodwana bebahlala bangiphendula ngomusa, okuyinto ebengingakayilindeli.

Ngelinye ilanga uCarolina wangibawa bona ngifunde iRhubo 83:19 [83:18, NW] eBhayibhelinami. Iveselo laveza ngokukhanyako bona ibizo lakaZimu nguJehova. Kwangirara lokho ngombana esondweni lami ngafunda ngozimu, kodwana ingasi ngoJehova. Ekuthomeni komnyaka ka-2000, nami ngathoma ukufunda iBhayibheli naboFakazi.

Njengombana ngithuthuka, ngafumana induduzo nengifunda bona uJehova nguZimu onomusa nolibalelako. Ngokwesibonelo, ku-Eksodusi 34:6, 7, iBhayibheli ihlathulula uJehova ‘njengoZimu onomusa nesirhawu, obuthaka ekusilingekeni, ozele ukuthembeka neqiniso, ohlala athembekile eenkulungwaneni ngeenkulungwana zeenzukulwana, olibalela imilandu, imitjhapho nezono.’

Ngitjho nanyana kunjalo, bekungasilula ukusebenzisa egade ngikufunda. Bengiqiniseka bona ngeze ngakghona ukulawula ukuba kwami nelaka. Qobe nengibhalelwako, uCarolina bekangikhuthaza ngethando. Bekangikhumbuza bona uJehova uyayibona imizamwami. Isekelo lakhe langinikela amandla wokuragela phambili ngilinga ukuthabisa uJehova, ngitjho nanyana kanengi bengizizwa ngingasanathemba.

Ngelinye ilanga, umzalwana ebekangifundela, u-Alejandro, wangibawa bona ngifunde kwebeGalatiya 5:22, 23. Amavesi lawo athi iinthelo zomoya kaZimu ‘lithando, ukujabula, ukuthula, ukubekezela, ukulunga, ukwethembeka, ubumnene nokuzithiba.’ U-Alejandro, wahlathulula bona ukuveza kwami iimfanelwezo akukasami emandlenami kodwana, emoyeni ocwengileko kaZimu. Iqiniswelo lawutjhentjha ngokupheleleko umbonwami!

Ngokukhamba kwesikhathi, ngaya emhlanganweni omkhulu waboFakazi bakaJehova. Ukuhlophiseka, ukuhlwengeka nobungani engabubona lapho bangiqinisekisa bona ngiyifumene ikolo yeqiniso. (Jwanisi 13:34, 35) Ngabhabhadiswa ngoFebherbari 2001.

UJehova wangitjhentjha ekubeni mumuntu onelaka ngaba mumuntu onokuthula. Ngizizwa ngasuthi ungikhiphe edakeni ebelingibambile. Abantu abanengi bebangihloyile begodu angibasoli. Nokho, kwanje ngithabela ukukhonza uJehova ngokuthula nginomkami namadodanethu amabili.

Iinhlobo zami nalabo egade babangani abayikholwa indlela esele ngitjhentjhe ngayo. Ngebanga lalokho, abambalwa babo batjengisa ikareko ekufundeni iqiniso leBhayibheli. Nami ngaba nelungelo lokusiza abanye bazi uJehova. Qala bona kuthabisa kangangani ukubona iqiniso leBhayibheli litjhugulula amaphilo wabanye!