Wakhe wezwa ubuhlungu khulu kangangobana bewalila?— a Pheze soke sakhe sabuzwa. Nokho, ngezinye iinkhathi, kungenzeka ubuhlungu bungabi semzimbenethu. Omunye angatjho izinto ezimbi ngathi ezingasiliqiniso. Lokho kungasizwisa ubuhlungu, akusinjalo?— Ngokufanako noZimu uyabuzwa ubuhlungu nekakhulunyelwa amala. Akhe sicoce ngalokhu begodu sibone indlela esingamthabisa ngayo uZimu kunokobana simzwise ubuhlungu.

IBhayibheli ithi abanye abantu abathi bathanda uZimu ‘bayamdanisa.’ Iye, “bamzwisa ubuhlungu” uZimu! Liqiniso, akekho namunye ongalimaza umzimba kaJehova uZimu. Ungumninimandla woke. Nokho, akhe sibone bonyana kubayini uJehova ezwa ubuhlungu nasingenzi lokho akutjhoko.

Abantu ababili bokuthoma uJehova ababumbako ephasini bamzwisa ubuhlungu obukhulu. Ababilaba babekwa ephasini eliyiPharadesi elibizwa ngokobana ‘sivande se-Edeni.’ Bekubobani ababilaba?— Bekungu-Adamu bese ngokukhamba kwesikhathi, kwaba ngu-Eva. Akhe sibone bonyana khuyini abayenzako eyazwisa uJehova ubuhlungu.

Ngemva kobana uJehova ababeke esimini, wabatjela bona bayitlhogomele. Godu wabatjela bona bangaba nabantwana begodu bangahlala ndawonye esimini ngaphandle kokufa. Kodwana ngaphambi kobana u-Adamu no-Eva babe nabantwana, kwenzeka into embi. Uyazi bona khuyini eyenzekako?— Ingilozi yenza u-Eva ngemva kwalokho yenza no-Adamu bona bangalaleli uJehova. Akhe sibone bonyana lokho kwenzeka njani.

Ingilozi yenza kwabonakala ngasuthi inyoka iyakhuluma. U-Eva wakuthanda lokho akuzwako​—inyoka yathi uzokuba “njengoZimu.” Ngalokho wenza lokho inyoka eyamtjela bona akwenze. Uyazi bona gade kuyini lokho?—

U-Eva wadla emthini uJehova ebekatjele u-Adamu bona bangadli kiwo. Ngaphambi kobana uZimu abumbe u-Eva, watjela u-⁠Adamu wathi: “Ungazidlela ngokuthanda kwakho nanyana ngimuphi umuthi osesivandeni, kodwana ungawudli umuthi wokwazi koke ngombana mhlana uwudlako uzokufa kokufa.”

U-Eva bekawazi umthetho loyo. Nokho, waragela phambili aqale umuthi, begodu wabona “iinthelo ezihle neziyengako. Phezu kwalokho beziganukeja . . . Yeke wakha iinthelo kiwo wadla.” Ngokukhamba kwesikhathi wanikela u-Adamu isithelo ‘naye wadla.’ Kubayini ucabanga bona ukwenzile lokho?— Kungombana u-Adamu wathanda u-Eva ngaphezu kokuthanda uJehova. Wakhetha ukumthabisa kunokuthabisa uZimu. Kodwana ukulalela uJehova kuqakatheke khulu kunokulalela omunye umuntu!

Uyayikhumbula inyoka eyakhuluma no-Eva? Njengombana nomuntu angenza kubonakale ngasuthi unompopi uyakhuluma, othileko wenza inyoka ibonakale ngasuthi iyakhuluma. Gade kungelakabani ilizwi ebelizwakala enyokeni?— Bekulilizwi ‘lenyoka endala ekuthiwa ngumtjoli [“uDeveli,” NW] noSathana.’

Uyazi bona ungamenza njani uJehova bona athabe?— Ungakwenza lokho ngokulinga ukumlalela ngaso soke isikhathi. USathana uthi angenza boke abantu benze lokho akufunako. Ngalokho uJehova uyasiyala: “Hlakanipha mntwanami, ulethele ihliziywami ukwenama; ngizakwazi ukuphendula woke umuntu onginyazako.” USathana unyaza uJehova. Uthi angenza woke umuntu bona angamkhonzi uJehova. Ngalokho, thabisa uJehova ngokumlalela begodu umkhonze! Uzokulinga ngamandla bona wenze njalo?—