“Umuntu ongalibaleli abanye wephula ibhlorho okufuze naye ayame kilo.” La mamezwi atjhiwo ngu-Edward Herbert osisazimlando seBrithani sangekhulu le-17, agandelela elinye ibanga lokobana kubayini kutlhogeka silibalele abanye: Msinyana namtjhana ngokukhamba kwesikhathi, kungatlhogeka sibawe abanye basilibalele. (Matewu 7:12) Nokho, kunebanga eliqakatheke khulu ngathi bona silibalele. Tjheja amezwi kampostoli uPowula afumaneka​—Funda kwebeKolose 3:13, NW.

Ngombana soke asikapheleli, ngezinye iinkhathi singasilinga abanye, nabo bangasisilinga. (Roma 3:23) Singakubulunga njani ukuthula nabantu abangakapheleli? Aphefumulelwe nguZimu, uPowula usiluleka bona sibekezele begodu silibalele. Isilulekwesi sisasebenza nanamhlanjesi njengombana satlolwa pheze iminyaka eziinkulungwana eembili ezadlulako. Akhe siqalisise amezwi kaPowula.

“Ragelani phambili nibekezelelana.” Amezwi athi “ragelani phambili nibekezelelana” atjhugululwe ngesiGirigi atjho ukukghodlhelela. Enye incwadi ithi amaKrestu atjengisa ifanelo le “ngokuzimisela ukubekezelela imitjhapho nofana imikghwa yalabo ababasilingako.” Amezwi athi ‘nibekezelelane’ asitjela bona ukubekezela okunjalo kufuze kwenziwe mahlangothi womabili. Nesikhumbula bona sinemikghwa engasilinga abanye, angekhe sivumele izinto esingazithandiko kwabanye zithikazise ukuthula phakathi kwethu nabo. Kodwana kuthiwani abanye nebasonako?

“Ragelani phambili . . . nilibalelana ngokutjhaphulukileko.” Ngokwesinye isazi, ibizo lesiGirigi elitjhugululwe ngokobana “nilibalelana ngokutjhaphulukileko” “akusilibizo elijayelekileko lokulibalela . . . kodwana libizo elidephileko eligandelela isirhawu esikhambisana nokulibalelokho.” Omunye umthombo uthi ibizweli lingatjho “okuthileko okuthabisako, umusa, okuzuzisako.” Sitjengisa isirhawu ngokuzimisela ukulibalela ngitjho nanyana ‘sineensolo ngomunye.’ Nokho, kubayini kufuze sizimisele ukutjengisa umusa onjalo? Elinye ibanga, kungombana kungasikade sizokufuna umuntu osisilingileko asitjengise umusa ngokusilibalela.

“Njengombana uJehova wanilibalela ngokutjhaphulukileko, nani kufuze nilibalelane.” Leli libanga eliqakatheke khulu lokobana kubayini kufuze silibalele abanye ngokutjhaphulukileko: UJehova uZimu usilibalela ngokutjhaphulukileko. (Mikha 7:​18) Akhe ucabange kancani ngomusa omkhulu uJehova awunikela izoni eziphendukako. Ngokungafani nathi, uJehova akoni. Nanyana kunjalo, uzimisele begodu uzilibalela ngokupheleleko izoni eziphendukako ngitjho nanyana azi bona angeze afune zimbuyisele ngokumlibalela. Kwamambala, uJehova usibonelo esihle khulu sokulibalela izoni eziphendukako!

Umusa kaJehova usitjhideza kuye begodu usenza bona sifune ukumlingisa. (Efesu 4:32–5:1) Senza kuhle ngokuzibuza, ‘Njengombana uJehova angilibalele ngomusa kangaka, ngingahlala njani ngingalibaleli umuntu ongakapheleli ongonileko kodwana ophenduka kwamambala?’​—Lukasi 17:​3, 4.