Imibuzo YeBhayibheli Iyaphendulwa
Ukufa kwakaJesu kusizuzisa njani?
Lokha uZimu nakabumba abantu, bekabalungiselele bona baphile ephasini unomphela bangahlutjhwa kugula namkha ukufa. Khonapho u-Adamu, umuntu wokuthoma, waba lihlongandlebe wangalaleli umBumbi ngalokho waphundwa kuphila okungapheliko. Thina nzukulwana zaka-Adamu, sazuza ukufa kuye. (Roma 5:8, 12; 6:23) UZimu weqiniso, uJehova, wathumela iNdodanakhe uJesu ephasini bonyana isifele beyibhadele nalokho u-Adamu akulahlako.—Funda uJwanisi 3:16.
Ukufa kwakaJesu kwenza kwakghoneka bona abantu bafumane ukuphila okungapheliko. Ucabanga bona kuzokuba njani ukuphila ephasini unomphela?
Ukufa kwakaJesu kwenza kwakghoneka bona silitjalelwe izono zethu sifumane nokuphila okungapheliko. IBhayibheli isitjengisa isithombe sokuthi ukuphila kuzokuba njani ephasini elingasatshwenywa kuluphala, amalwelwe nokufa.—Funda u-Isaya 25:8; 33:24; IsAmbulo 21:4, 5.
Kufuze sikukhumbule njani ukufa kwakaJesu?
Ngobusuku ngaphambi kobana ahlongakale, uJesu watjela abalandeli bakhe bona bakhumbule ukufa kwakhe ngokwenza umnyanya ongatlhogi izinto ezinengi. Ukukhumbula ukufa kwakaJesu ngendlela leyo qobe mnyaka kusenza sitjheje ukuthi uJehova noJesu babathanda kangangani abantu.—Funda uLukasi 22:19, 20; 1 Jwanisi 4:9, 10.
Kilonyaka, isiKhumbuzo sokufa kwakaJesu sizokuba ngoMvulo, Apreli 14, ngemva kokutjhinga kwelanga. Uyamenywa bona uzokuhlanganyela naboFakazi bakaJehova endaweni yangekhenu.—Funda kwebeRoma 1:11, 12.
Okhunye Ongakuthabela
UKWAZI NGATHI
IsiKhumbuzo Sokufa KwakaJesu
Kanye ngomnyaka eendaweni ezahluka hlukeneko ephasini mazombe abantu bayahlangana bakhumbule ukufa kwakaJesu. Siyakumema bona uzokubona ukuthi isenzakalo esiqakathekilekwesi sikuthinta njani.
