Bekunengqondo na ngoDavidi ukulindela bona uZimu amtjheje? Kghani uZimu uyakutjheja? Abantu abanengi bakufumana kubudisi ukukholelwa bona uZimu umninimandla unekareko kibo. Kubayini kunjalo?

Elinye ibanga kukobana uZimu uphakeme khulu kunabantu. Njengombana abona asesikhundleni sakhe esiphakemeko, iintjhaba zoke “zifana nethosi ngemgqonyini; zifaniswa nethudlana phezu kwesilinganiso.” (Isaya 40:15) Omunye umtloli wanje waphetha ngokuthi “kukuzikhohlisa okukhulu ukukholelwa bona kukhona uZimu otjheja izinto ozenzako.”

Ngakelinye ihlangothi, abanye abantu bacabanga bona ukuziphatha kwabo kubenza bangafaneleki ukunakwa nguZimu. Ngokwesibonelo, indoda ethileko ebizwa ngokobana nguJim ithi: “Bengihlala ngithandazela ukuthula nokuzibamba, kodwana ilaka lami belibuya msinyana. Ekugcineni, ngaphetha ngokuthi ubumbi bami bukhulu khulu kangangobana uZimu akakghoni ukungisiza.”

Inga-kghani uZimu ukude khulu nabantu kangangobana ubhalelwa kubatjheja? Uzizwa njani ngeembunjwa zakhe ezinesono? Ngaphandle kobana uZimu azambulele yena ngokwakhe, akakho umuntu ongaba mkhulumeli wakhe begodu aphendule imibuzo le. Ngalokho, umlayezo kaZimu ophefumulelweko oya ebantwini—iBhayibheli—usiqinisekisa bona uZimu akasikude kangangobana akakghoni ukubona izinto ezitshwenya abantu. “Eqinisweni” iBhayibheli ithi, ‘akasikude ngitjho nakubani wethu.’ (IzEnzo 17:27) Eenhlokweni ezine ezilandelako, sizokucoca ngalokho uZimu asitjela khona ngokuba kwakhe nekareko ebantwini nendlela atjengise ngayo ikareko ebantwini abafana nawe.