“UZIMU unguMoya,” angekhe sambona ngamehlo womuntu. (Jwanisi 4:24) Kodwana iBhayibheli libikezela bona abanye abantu kungenzeka bambona uZimu ngendlela ethileko. (Hebheru 11:27) Inga-kghani kungenzeka umbone kwamambala? Kghani kungenzeka na ukubona “uZimu ongabonakaliko.”?—Kolose 1:15.

Akhe umadanise ubujamo bethu nobomuntu obelethwe asiphofu. Ucabanga bona ukuba kwakhe siphofu kumenza angakghoni ukubona izinto ezenzeka ephasini? Awa akusinjalo. Umuntu osiphofu ukwazi ukufumana imininingwana ngeendlela ezinengi ezihlukahlukeneko ezimsiza bona azwisise bona abantu banjani, abone izinto ezithileko nakho koke okwenzekako hlangana naye. Enye indoda esiphofu kheyathi: “Ukubona akutlhogi bona ube namehlo, yinto esemkhumbulweni.”

Kunjalo-ke nangathi, njengombana singekhe sasebenzisa amehlwethu wamambala ukubona uZimu, singasebenzisa ‘amehlo weenhliziyo zethu’ ukumbona. (Efesu 1:18) Akhesicabangele iindlela eentathu esingakwenza ngazo lokhu.

Umuntu osiphofu kanengi unemizwa ebukhali yokuzwa nokubamba, lokho kumenza akghone ukucabanga ngezinto angaziboni ngamehlo. Kunjalo-ke nangathi, singakghona ukusebenzisa amazizwethu abukhali bona sihlolisise iphasi esiphila kilo begodu sicabange ngombumbi walo okunguZimethu ongabonakaliko. “Soloko kwangesikhathi sokudalwa kwephasi, amandlakhe angapheliko kanye nemvelo yakhe yobuZimu, nanyana ingabonakali ngokwayo, phezu kobana ikhona, beyiseze izwisiswa begodu ibonwa ezintweni azidalileko.”—Roma 1:20.

Ngokwesibonelo, cabanga ngekhaya lethu. Umnqopho wephasi akusikukuthi sihlale kilo kwaphela kodwana nokobana sithabele ukuphila kilo. Zicabange ulalele umoya omnandi otholakala ephasina, ukutjhisa kwelanga elimnandi, ukuthabela ukudla iinthelo, namkha ukuzwa umbhino omnandi weenyoni, koke lokhu kusenza sithabele ukuhlala ephasini. Nawucabanga ngezintwezi, awucabangi bona ziveza imicabango yoMbumbi wethu, ukutjheja kwakhe nokuba nomusa kwakhe?

Ukubukela indalo yezulwini nephasini kukufundisani ngoZimu? Kunento eyodwa esiqiniseka ngayo, kukuthi amazulu aveza amandla kaZimu. Ubufakazi bamva besayensi basikisela bona iphasi loke kubandakanye nezulu likhulu ngezinga elirarako! Khewuziphe isikhathi uqale phezulu emkayini, ucabange ngalokhu: ‘Ngimaphi amandla asekela indalo ekulu kangaka?’ IBhayibheli lisitjela bona uMbumbi ‘unamandla amakhulu’ khulu. (Isaya 40:26) Indalo kaZimu itjengisa bona uZimu ‘unaMandla’—‘mkhulu ngamandla.’—Jobho 37:23.

Umma onabantwana ababili abangaboni kuhle emehlweni, wathi: “Ukuzwa kungenye yezinto zokuthoma esize abantwabakhe bakghone ukufunda.” Batjele koke okubonako nokuzwako, begodu kulungele ukuhlathulula izinto ozibonako kibo. Nawubahlathululelako uba mamehlwabo.” Kungokufanako, ngitjho nanyana kungekho “noyedwa owakhe wabona uZimu, ngaphandle kweNdodanakhe [uJesu] ebelethwe yodwa esesifubeni sakaYise, ngiyo kwaphela embonakalisileko.” (Jwanisi 1:18) Njengombana aba yindalo kaZimu yekuthomeni, iNdodana ayibumba ngokwakhe, uJesu waba “mamehlo” wethu wezulwini. Nguye kwaphela ongasinikela imininingwana engeziweko malungana noZimu ongabonakaliko lo.

Akhesitjheje izinto ezimbalwa uJesu owaphila iingidigidi zeminyaka noYise asihlathululela zona ngoZimu:

• UZimu akaqedi ukusebenza. “UBaba uhlala asebenza.”—Jwanisi 5:17.

•  UZimu uyazazi iintlhogo zethu. “UYihlo wazi enikudingako ningakambawi.”—Matewu 6:8.

• UZimu usitlhogomela ngomusa. ‘UYihlo osezulwini . . . wenza ilanga lakhe liphumele abambi nabalungileko, anise nezulu kabalungileko nabakhohlakeleko.’—Matewu 5:45.

• Ngamunye wethu uqakathekile kuZimu. “Iinyoni ezimbili azithengwa ngesipaparwana sinye semali na? Khonapho ayikho nayinye yazo ezakuwela phasi ngaphandle kwemvumo kaYihlo. Ngitjho neenhluthu ehlokwakho zibalwe zoke. Yeke ningesabi; niqakatheke khulu kuneenyoni ezinengi!”—Matewu 10:29-31.

Abantu abaziimphofu indlela yabo yokubamba izinto ihluke khulu kuneyabantu ababonako. Emntwini osiphofu umthunzi ungaba yindawo epholileko nesithekileko ekutjhiseni kwelanga, ingasi indawo enzima enganamkhanyo welanga. Njengombana umuntu osiphofu angakghoni ukubona umthunzi nomkhanyo welanga, nathi angekhe sakghona ukuzwisisa uJehova ngokuhlakanipha kwakhe kwaphela. Ngalokho, uJehova wathumela umuntu omfanekiso wakhe umuntu owaveza iimfanelo nobuntu bakaZimu ngokupheleleko.

Umuntu loyo nguJesu. (Filipi 2:7) UJesu akhenge akhulume ngoYise kwaphela, kodwana wasitjengisa nokobana unjani. Umfundi kaJesu, uFlebhe wabuza: “Kosi, sibonisa uBaba.” UJesu waphendula wathi: “Loyo ongibonileko, ubone uBaba.” (Jwanisi 14:8, 9) Khuyini-ke “esingayibona” ezenzweni zakaJesu ebonakalisa uYise?

Sikghona ukubona ifudumalo, ukuthobeka nokungeneka kwakaJesu. (Matewu 11:28-30) Ubuntu bakhe obuqabulako bebenza abantu batjhidele kuye. UJesu bekezwa ubuhlungu abanye egade babuzwa, begodu bekathaba nabo. (Lukasi 10:17, 21; Jwanisi 11:32-35) Njengombana ufunda namkha ulalela izenzakalo zeBhayibhelini ezimalungana noJesu, vumela amazizwakho akhambisane nalokho okufundako begodu zoke izenzakalo ofunda ngazo zenze ziphile emkhumbulwenakho. Nawuzindla ngendlela uJesu egade asebenzelana ngayo nabantu, uzokukghona ukubona kuhle ubuntu bakaZimu begodu utjhidele Kuye.

Malungana nendlela umuntu osiphofu azwisisa ngayo iphasi, omunye umtloli wathi: “Umuntu osiphofu uthola imininingwana ngeenqephu namkha iingcenye, begodu lokho ukwenza ngeendlela ezihlukahlukeneko (ngokuthinta, ngephunga, ngokuzwa, nangezinye iindlela), ekugcineni uhlanganisa yoke imininingwana leyo ibe yinto ezwakalako.” Kungokufanako, njengombana ubukela indalo kaZimu ekarisako, ufunda ngalokho uJesu akutjhoko ngoYise, begodu uhlaziye indlela uJesu abonakalisa ngayo iimfanelo zakaZimu, uzokwazi ukuba nesithombe esihle sakaJehova. Uzokuba ngowamambala kuwe.

UJobho owaphila eenkhathini zekadeni, wathabela ukubona ubufakazi balokhu. Ekuthomeni wakhuluma ‘ngezinto angazaziko.’ (Jobho 42:3) UJobho kwathi ngemva kokucabanga ngemisebenzi emihle khulu kaZimu yendalo, watjhukumiseleka bona athi: “Bengikuzwa ngamahlebezi, kodwana gadesi sengiyakwazi.”—Jobho 42:5.

Nawe ungazizwa ngendlela efanako. “Nawumfunako [uJehova] uzamfunyana.” (1 IinKronike 28:9) AboFakazi bakaJehova bangakuthabela ukukusiza bona ufune be ufumane uZimu ongabonakaliko.