OKWENZA ABANTU ABANENGI BAZAZE: Ngokuya kokuhlolwa kwamva, umthala wethu unamaplanethi pheze amabhiliyoni ali-100. Njengombana indawo yoke iyikulu kangaka, abantu abanengi bangazibuza, ‘Kubayini uMbumbi usomandla kufuze aqale izinto ezenziwa babantu abaphasi eplanethini encani le?’

OKUFUNDISWA LILIZWI LAKAZIMU: UZimu khenge asinikele iBhayibheli kwaphela bese angasaba nendaba nathi. Kunalokho, uJehova uyasiqinisekisa: ‘Ngizokweluleka, ngikuphose ilihlo.’—IRhubo 32:8.

Cabanga ngoHagari, umfazi weGibhide wangekhulu lama-20 leminyaka. UHagari bekangahloniphi umqatjhakhe uSarayi, ngalokho uSarayi wamhlazisa, uHagari wabalekela emangweni. Njengombana uHagari enze iphoso, inga-kghani uZimu khenge asaba nendaba naye? IBhayibheli lithi: “Ingilozi [kaJehova] yamfumana.” Ingilozi yaqinisekisa uHagari, yathi: [UJehova] usizwile isililo sokurhubutjhwa kwakho.” Ngemva kwalokho uHagari wathi kuJehova: “UnguZimu ongibonako.”—Genesisi 16:4-13.

‘UZimu obonako’ ukuqalile nawe. Ukufanekisa: Umma onethando utjheja khulu abantwabakhe abancani, njengombana umntwana nekamncani kulapho atlhoga khulu ukutjhejwa kombelethakhe. Ngokufanako, uZimu uyasitjheja khulu khulu nesiphasi begodu singanamandla. UJehova uthi, “Ngihlala endaweni ephakemeko necwengileko, godu ngihlala naloyo onomoya owephukileko nothobekileko. Ngivuselela umoya waloyo odanileko, nehliziyo yowurubajekileko.”—Isaya 57:15.

Nokho, ungazibuza: ‘UZimu ungitjheja njani? Inga-kghani ungahlulela ngokuqaleka kwami, namkha uqala ingaphakathi lami begodu azwisise lokho engingikho?’