I-Russia isahlele i-Ukraine ngoFebherbari 24, 2022, yabanga itjharagano njengombana abantu babalekela ipi. a

 “Bekuthuthumba amabhomu nokhunye. Anginamezwi wokuhlathulula indlela ebekuthusa ngayo. Nasizwa bona kuneentimela ezifudusa abantu endaweni le, saqunta ukukhamba. Sitjhiye koke ebesinakho, ngombana umuntu ngamunye bekufuze aphathe isikhwanyana esincani kwaphela. Besingakghona ukuthatha kwaphela amaphepha aqakathekileko, iinhlanhla, amanzi nokudla okulula. Sitjhiye koke okhunye esinakho satjhinga esitetjhini sesitimela khisibe ngapha kuthuthumba amabhomu.”—UNataliia, we-Kharkiv, e-Ukraine.

 “Besingacabangi ukuthi ipi le izokuba khona bekwaba mzuzu wokugcina. Ngezwa ukuthuthumba kwezinye iingcenye zedorobho namafesidere asikinyeka. Ngaqunta ukukhamba, ngathatha kwaphela izinto ezitlhogekako. Ngisuke ekhaya ngesimbi yobu-8 ekuseni ngakhwela isitimela esiya e-Lviv, ngemva kwalokho ngabamba ibhesi etjhinga ePoland.”—UNadija, weKharkiv, e-Ukraine.

Okusesihlokwenesi

•  Khuyini kuhlekuhle ebangela ibangamatlhuwo yabaphalali le?

•  Abaphalali bangalifumanaphi ithemba?

•  Kghani iBhayibheli lingabasiza abaphalali namhlanjesi?

 Khuyini kuhlekuhle ebangela ibangamatlhuwo yabaphalali le?

 Ibangamatlhuwo yabaphalali e-Ukraine ithome lokha amasotja weRussia asahlela i-Ukraine. Nanyana kunjalo, iBhayibheli yembula ukuthi kunamabanga afihlakeleko angunobangela webangamatlhuwo yabaphalali enjengale:

•   Aborhulumende babantu ephasini loke babhalelwe kunikela abantu lokho abakutlhogako. Ngokujayelekileko aborhulumende basebenzisa ilawulo labo bona bagandelele abantu.—UMtjhumayeli 4:1; 8:9.

•  USathana uDeveli, “umbusi wephasi,” unomthelela omumbi khulu ebantwini kangangokuthi iBhayibheli lithi: “Iphasi loke lisemandleni womumbi.”—Jwanisi 14:30; 1 Jwanisi 5:19.

•  Ngaphezu kwemiraro abantu ebebasolo baqalana nayo emakhulwini weminyaka edlulileko, nje sesiphila esikhathi esabikezelwa yiBhayibheli nayithi: “Emihleni yokuphela kuzakufika iinkhathi ezibudisi okubudisi ukuqalana nazo.” (2 Thimothi 3:1) Ukungezelela kilokho, imihla le izokubonakala ngezipi, iinhlekelele zemvelo, ukutlhayela kokudla nezifo ezibulalako, okuzizinto ezenza abantu batjhiye amakhaya.—Lukasi 21:10, 11.

 Abaphalali bangalifumanaphi ithemba?

 IBhayibheli iveza ukuthi uMdalethu, uJehova, b uyabathanda begodu uyabazwela abaphalali nabantu abatjhiye amakhaya. (Duteronomi 10:18) Uthembisa ukurarulula imiraro yabaphalali asebenzisa urhulumende wakhe wezulwini obizwa ngokuthi mBuso kaZimu, ozokususa aborhulumende babantu bese kubusa wona wodwa. (Danyela 2:44; Matewu 6:10) UJehova uzokusebenzisa umBuswakhe bona asuse uSathana uDeveli. (Roma 16:20) UmBuso loyo uzokuba ngurhulumende wephasi loke, uqede ukuhlukana okubangelwa mikhawulo yeentjhaba. Boke abantu bazokuba mndeni wephasi loke onobunye. Akekho okusazokutlhogeka abe mbaleki, ngombana iBhayibheli lithembisa ukuthi: “Woke umuntu uzazigedla ngaphasi kwesidiribe sakhe, nanyana ngaphasi komuthakhe wamakhiwani. Yeke akunamuntu ozabethusa. Ngambala uSomnini uSomandla ukhulumile.”—Mikha 4:4.

 UmBuso kaZimu ngiwo kwaphela ongayirarulula unomphela imiraro yabaphalali esinayo namhlanjesi. UJehova uzokusebenzisa umbuswakhe bona aqede imiraro eyenza abantu babe babaleki. Akhucabange ngeembonelo ezilandelako:

•   Ipi. “[UJehova] uthulisa izipi ephasini loke.” (IRhubo 46:10) Bona ufumane ukuthi uZimu uzoziqeda njani izipi, funda isihloko esithi Ukuthula Emhlabeni—Kuyofika Kanjani?

•   Ukugandelela nenturhu. “Ekugandelelweni nenturhwini [uJehova] uyabahlenga.” (IRhubo 72:14) Bona uzwisise ukuthi abantu bangatjhuguluka njani emikghweni emimbi esele banesikhathi eside banayo, funda isihloko esithi “Ukunqoba Ukuzondana Okungapheli.”

•   Umtlhago. UJehova usiza “abadududu nabalilako.” (IRhubo 72:12) Bona ubone ukuthi uZimu uzoyirarulula njani imiraro emsuka womtlhago, funda isihloko esithi “Ingabe Isimo Sezomnotho Esanelisa Bonke Abantu Siyoke Sibe Khona?”

•   Ukutlhayela kokudla. ‘Kuzokubakhona inala enarheni.” (IRhubo 72:16) Bona ufumane ukuthi uZimu uzokuqinisekisa njani ukuthi akunamuntu ozokutlhayelelwa kukudla, funda isihloko esithi “Ingabe Liyoke Libe Khona Izwe Elingenayo Indlala?”

 Kghani iBhayibheli lingabasiza abaphalali namhlanjesi?

 Iye. Ngaphandle kokunikela abaphalali ithemba lesikhathi esizako, iBhayibheli lingabasiza ngeentjhijilo abaqalana nazo nje.

 Ikambisolawulo yeBhayibheli: “Ningatshwenyeki ngalitho, kodwana kikho koke, iimbawo zenu azaziwe nguZimu ngomthandazo, ngokurabhela kunye nokuthokoza; begodu ukuthula kwakaZimu okudlula koke ukuzwisisa kuzokuvikela iinhliziyo zenu nemicabangwenu.”—Filipi 4:6, 7.

 Ihlathululo: Bawa uZimu akuphe ukuthula nanyana ungaqalana nabuphi ujamo. Qala isihloko esithi “Filipi 4:6, 7—‘Ningakhathazeki Ngalutho.’”