NgoJulayi 2022, kube nenturhu yeengidi ethusako ephasini mazombe:

•   “Ukubulawa kwakasopolotiki odumileko [obekanguNdunakulu uShinzo Abe] kufake amanzi emadolweni enarheni kwatjhiya iphasi loke lihlengezela ngevalo, khulukhulu njengombana iJapani kuyinarha engakandi ngobugebengu obunenturhu begodu enemithetho eqinileko endleleni ekusetjenziswa ngayo iingidi.”—Julayi 10, 2022, ngokwe-The Japan Times.

•   “IDenmark ihlalele evalweni njengombana umuntu othileko akhuphe isigidi wadumuza abantu abathathu e-mall yeCopenhagen.”—Julayi 4, 2022, ngokwe-Reuters.

•   “ESewula Afrika: Kuhlongakele abantu abali-15 ngemva kokuthi abantu ebebaphethe iingidi badumuze ethaveni eSoweto.”—Julayi 10, 2022, ngokwe-The Guardian.

•   “Kudunyuzwe abantu abangaphezu kwama-220 bebahlongakala e-U.S. ngepelaveke yeholideyi kaJulayi 4.”—Julayi 5, 2022, ngokwe-CBS News.

 Likhona na ithemba lokuthi inturhu enjengale izakhe iphele? Lithini iBhayibheli?

 IBhayibheli lihlathulula isikhathi esiphila kiswesi ngokuthi ‘mimihla yokuphela,’ sikhathi lapho abantu bazokuba nelaka, isihluku nelunya. (2 Thimothi 3:1, 3) Inturhu enjengale yenza abantu baphile ngokusaba. (Lukasi 21:11) Nanyana kunjalo, iBhayibheli ithembisa isikhathi lapho inturhu ingekhe isaba khona begodu “abantu . .  .  . bazokuhlala endaweni enokuthula, eendaweni eziphephileko neendaweni zokuphumula ezinokuthula.” (Isaya 32:18) Izokuqedwa njani inturhu?

 UZimu uzokuqinisekisa ukuthi abantu abambi bangasabi khona begodu atjhabalalise zoke iinkhali.

•   “Abakhohlakeleko bazokutjhatjalaliswa ephasini.”—IzAga 2:22.

•   “[UZimu] uqeda izipi ephasini loke. Uphula umsebe, aphohloze nomkhonto; Utjhisa iinkarana zamasotja ngomlilo.”—IRhubo 46:9.

 UZimu uzokufundisa abantu bona babe nokuthula begodu ngendlela le uzokuqeda inturhu.

•   “Angekhe zilimaze namkha zibange umonakalo kiyo yoke intabami ecwengileko ngokuqinisekileko iphasi lizabe lizele ilwazi lakaJehova njengamanzi agubuzese ilwandle.”—Isaya 11:9.

•   Nanje, uZimu ufundisa abantu ephasini loke ukulisa inturhu nokusebenzisa iinkhali, bona ‘benze iinsabula zabo zibe maplurhu nemikhontwabo ibe mimikhwa yokuthena imithi.’—Mikha 4:3.

 Bona ufunde okungeziweko ngesithembiso seBhayibheli sephasi eliphila ngaphandle kokusaba, funda isihloko esithi, “Ingabe Ungakhululeka Ekwesabeni?”

 Bona ufunde okungeziweko ngesisombululo esizokuhlala unomphela sokuqeda inturhu, funda isihloko esithi, “Ukuthula Emhlabeni Ekugcineni!”