Kghani kubonakala ngasuthi kuba budisi khulu ukwazi ukuthi khuyini iqiniso begodu khuyini amala? Nje abantu babonakala bakholelwa izinto ngokusekelwe endleleni abazizwa ngayo nalokho abakucabangako kunokusekelwe eqinisweni. Ephasini loke namhlanjesi, abantu abanengi bakholelwa ukuthi ayikho into ekuthiwa liqiniso.

 Umbono lo awusimutjha. Eminyakeni ezii-2 000 eyadlulako, uMbusi weRoma uPontiyasi Pilatu, ngokuzaza wabuza uJesu wathi: “Liyini iqiniso?” (Jwanisi 18:38) Nanyana uPilatu angakhenge alindele ipendulo, umbuzwakhe bewuqakathekile. IBhayibheli linikela ipendulo eyanelisako nezokusiza wazi okuliqiniso nokumamala ephasini lapho abantu kubahlangahlanganisako lokhu.

Inga-kghani likhona iqiniso?

 Iye. IBhayibheli lisebenzisa ibizo elithi “iqiniso” ukuqalisela kilokho okusekelwe eqinisweni kuhlanganise nokulungileko ngokokuziphatha. Lifundisa ukuthi uJehova a uZimu uMthombo weqiniso, limbiza ngokuthi ‘nguZimu weqiniso.’ (IRhubo 31:5) IBhayibheli lineqiniso elivela kuZimu begodu lifanisa iqinisweli nomkhanyo, njengombana lisinqophisa kikho koke ukuhlangahlangana kwephaseli.—IRhubo 43:3; Jwanisi 17:17.

Ungalifumana njani iqiniso?

 UZimu akafuni samukele iqiniso elivela eBhayibhelini ngaphandle kokucabangisisa. Kunalokho ufuna silihlolisise, sisebenzise amandlethu wokucabanga kunokuthembela endleleni esizizwa ngayo. (Roma 12:1) Ufuna simazi besimthande sisebenzisa ‘imikhumbulwethu yoke’ begodu usikhuthaza bona siqinisekise iqiniso esilifunda eBhayibhelini.—Matewu 22:37, 38; IzEnzo 17:11.

Amala avelaphi?

 IBhayibheli lithi amala athoma ngenaba lakaZimu, uSathana uDeveli, loyo iBhayibheli elimbiza ngokuthi ‘nguyise wamala.’ (Jwanisi 8:44) Waleya amala ngoZimu ebantwini bokuthoma. (Genesisi 3:1-6, 13, 17-19; 5:5) Kusukela lapho uSathana uragele phambili arhatjha amala begodu afihla iqiniso ngoZimu.—IsAmbulo 12:9.

Kubayini amala ajayelekile namhlanjesi?

 Esikhathini sethu, leyo iBhayibheli eliyibiza ngokuthi ‘mimihla yokuphela,’ uSathana ukghona ukudurhisa khulu abantu ukudlula phambilini. Abantu sebajayele ukukhuluma amala bona badurhise abanye bebabadlelezele. (2 Thimothi 3:1, 13) Amala ajayelekile nemasondweni amanengi namhlanjesi. Njengombana iBhayibheli labikezela ngesikhathi sethu, abantu “bazozibandakanya nabafundisi bona bakitaze iindlebe zabo,” bakhethe ‘ukufulathela iqiniso.’—2 Thimothi 4:3, 4.

Kubayini iqiniso liqakathekile?

 Abantu batlhoga iqiniso bona bathembane. Ngaphandle kokuthembana, ubungani nomphakathi angeze kwaqina. IBhayibheli lithi uZimu ufuna ukulotjha kwethu kusekelwe eqinisweni. Lithi: “Labo abamlotjhako [uZimu] kufuze bamlotjhe ngommoya nangeqiniso.” (Jwanisi 4:24) Bona ufunde ukuthi iqiniso elivela eBhayibhelini lingakusiza njani ukghone ukubona ikolo yamala begodu uphume kiyo, funda isihloko esithi, “Yimaphi Amanga Aqhelisa Abantu KuNkulunkulu?” esifumaneka eenhlokweni ezimlandelande.

Kubayini UZimu afuna ngazi iqiniso?

 UZimu ufuna usinde begodu kufuze ufunde iqiniso ngaye nawuzakusinda. (1 Thimothi 2:4) Nawufunda imithethokambiso kaZimu yokulungileko nokungakalungi begodu uphile ngayo, uzokutjhidelana khulu naye. (IRhubo 15:1, 2) Bona asize abantu bafunde iqiniso, uZimu wathumela uJesu ephasini. UZimu ufuna silalele iimfundiso zakaJesu.—Matewu 17:5; Jwanisi 18:37.

Inga-kghani uZimu uzowaphelisa amala?

 Iye. UZimu uyakuhloya ukubona abanye abantu badlelezela abanye ngokubakhohlisa. Uthembise ukubatjhabalalisa labo abaragela phambili baleya amala. (IRhubo 5:6) UZimu nakenza njalo, uzokuzalisa nesithembiso sakhe esithi: “Iindebe ezikhuluma iqiniso, zizokuhlala ngokungapheliko.”—IzAga 12:19.