Iintjhaba ezinengi zihlukene phakathi ephasini loke ngebanga lepolotiki. Irhubhululo lango-2022 elenziwe yi-Pew Research Center lithi, “abantu abadala abangafikela emaphesentini angaba ma-65 eenarheni ekwenziwe kizo irhubhululo, bathi kunokuphikisana okukhulu hlangana nabantu abasekela iinhlangano ezihlukahlukeneko zepolotiki.”

 Utjhejile na ukuthi abantu lapha uhlala khona baragela phambili bahlukana phakathi ngebanga lezepolotiki? Kubayini kunjalo? Kghani ikhona na ipengu? Lokho iBhayibheli elikutjhoko.

 IBhayibheli labikezela ukuthi esikhathini sethu, esaziwa ngokuthi ‘mimihla yokuphela’ abantu abanengi bazokuba nemikghwa eyenza kungakghonakali bona babumbane.

•   “Emihleni yokuphela kuzakufika iinkhathi ezibudisi okubudisi ukuqalana nazo. Ngombana abantu bazakuba ngabazithandako, . . . abangafuni isivumelwano.”—2 Thimothi 3:1-3.

 Ngitjho nanyana abantu abanengi balinga ngamandla ukwenza aborhulumende baphumelele kodwana lokho akwenzeki. Abantu abanemibono ehlukileko bakufumana kubudisi namkha kungakghonakali ukusebenza ndawonye. Lokho kufakazela iBhayibheli eyakubikezela kade.

•   “Ngesikhathi umuntu abusa omunye kwaba kulimala kwakhe.”—UMtjhumayeli 8:9.

 Nanyana kunjalo, iBhayibheli inesisombululo, ithi kuzokuba norhulumende ozokudoswa phambili mumuntu ozokukghona ukuqeda yoke imiraro ebangela bona abantu batlhage.

 IBhayibheli likhuluma ngomrholi onamakghono atlhogekako wokusombulula imiraro, okunguJesu Krestu. UJesu unamandla, igunya begodu ufisa bona boke abantu babumbane bebabe nokuthula.

•   “Emihlenakhe abalungileko bazokutlhurha, nokuthula kuzokuba kukhulu.”—IRhubo 72:7.

•   ‘Iintjhaba zoke zizomlotjha.’—IRhubo 72:11.

 UJesu mrholi ophuma phambili ngebanga lokuthi unendaba nabantu begodu ufuna ukubasiza, khulukhulu labo abaphathwa kabuhlungu.

•   “Uzokuhlangula abatlhagako abalilela isizo, kunye nabangasililitho nananyana ngubani onganamsizi. Uzokurhawukela abangasililitho nabatlhagako, uzokusindisa ukuphila kwabatlhagako. Uzobahlangula ekugandelelweni nenturhwini.”—IRhubo 72:12-14.

 Funda okungeziweko ngomBuso kaZimu, urhulumende wezulwini odoswa nguJesu phambili. Fumana indlela ongazuza ngayo kiwo nokuthi ungawusekela njani.

•   Bukela ividiyo ethi, Uyini UmBuso KaZimu?

•   Funda isihloko esithi, “UmBuso KaZimu—Urhulumende Onganayo Ikohlakalo.”