Kusetjenziswe imali enengi khulu epini.

•   “Emnyakeni ogadungileko, aborhulumende ephasini loke basebenzise amadola ayi-2.2 trillion ezipini ezihlukahlukeneko. Imali le yinengi khulu ukudlula imali eyasetjenziswa ezipini kweminye iminyaka.”—I-The Washington Post, Febherbari 13, 2024.

 Isibalwesi sihlanganisa izinto ezinengi ukudlula imali. Cabanga ngesibonelo sinye: Ipi ye-Ukraine.

•   Amasotja. Ezinye izazi zikholelwa ukuthi pheze amasotja angaba yi-500 000 abulewe namkha alimele solo kwathoma ipi le eminyakeni emibili edlulileko.

•   Umphakathi. Ngokwe-United Nations, kunabantu abangaphezu kwe-28 000 abahlongakeleko namkha abalimeleko. Nanyana kunjalo, isikhulu se-UN sathi: “Asikghoni ukutjho ukuthi singangani isibalo sabantu ukuphila kwabo okonakeleko ngebanga lepi.” a

 Isibalo sabantu abatlhagako ngebanga lezipi nokungazwani ephasini loke sande khulu.

•   Iingidi ezili-114. Linani labantu abakatelelwa bona batjhiye imizabo ngebanga lepi nenturhu ezisephasini loke kusukela ngoSeptemba 2023.

•   Iingidi ezima-783. Linani labantu abangafumani ukudla okwaneleko. “Ukungazwani ngunobangela omkhulu wendlala, kunabantu abangaba maphesenthi ama-70 abangafumani ukudla okwaneleko ephasini, abahlala eendaweni ezinepi nenturhu.”—I-World Food Programme.

 Kghani ipi izakhe iphele? Kghani likhona ithemba lokuthi kuzokuba nokuthula? Kghani kuzokufika isikhathi sokuthi kungasabinomuntu otlhagako begodu woke umuntu athabele isivuno sephasi, abe nokudla okwaneleko? Lithini iBhayibheli?

 IBhayibheli labikezela ngezipi ezizokuba sephasini loke, lazifanisa nomkhweli wenjomani.

•   “Kwaphuma enye injomani enombala onjengomlilo, loyo ohlezi phezu kwayo wanikelwa ukususa ukuthula ephasini bona barhayilane, wanikelwa nesabula ekulu.”—IsAmbulo 6:4.

 Umkhweli wenjomani ongokomfanekiso loyo walandelwa bakhweli ababili abajamele indlala nokufa ngebanga lezifo ezibulalako nezinye izinto. (IsAmbulo 6:5-8) Nawufuna ukwazi ngesiphorofidwesi seBhayibheli nokobana kubayini singaqiniseka ngokuthi siyazaliseka esikhathini sethu, funda isihloko esithi, “Abakhweli Beenjomani Ezine—Babobani?”

 Kungasikade, ubunjinga bephasi angekhe busasetjenziselwa ipi. Kodwana lokhu angekhe kwenzeke ngamandla wabantu. IBhayibheli lithi:

•   UZimu ‘uzokuqeda izipi ephasini loke.’—IRhubo 46:9.

•   UZimu uzokuqeda woke umonakalo obangelwe yipi. “Uzokusula zoke iinyembezi emehlwenabo, ukufa angekhe kusaba khona namkha isizi namkha ukulila namkha ubuhlungu angekhe kusaba khona. Izinto zaphambilini zidlulile.”—IsAmbulo 21:4.

•   UZimu uzokuqinisekisa ukuthi woke umuntu uzokuhlala ngokuthula. “Abantu bami bazokuhlala endaweni enokuthula, eendaweni eziphephileko neendaweni zokuphumula ezinokuthula.”—Isaya 32:18.

 Ngokwesiphorofido seBhayibheli, izipi nezinye izinto esizibona namhlanjesi ziveza ukuthi ukuthula sekutjhidele.

 UZimu uzokuletha njani ukuthula? Uzokusebenzisa urhulumendakhe wezulwini namkha umBuswakhe. (Matewu 6:10) Bona wazi ukuthi uyini umBuso lo nokuthi utjho ukuthini kuwe, bukela isiqetjhana sevidiyo ethi, Uyini Umbuso KaZimu?