HLALANI NILINDILE!
Ngubani Ozokusindisa Izakhamuzi Ezingahlanganyeli Epini?—Lithini IBhayibheli?
Njengombana ibikwa yi-United Nations:
Kusukela ngo-Oktoba 7 ukuya ku-Oktoba 23, 2023, ukulwa okuphakathi kwe-Gaza ne-Israel kubangele ukuhlongakala kwabantu abangaphezu kwee-6 400 begodu kwalimala iin-15 200, inengi labo bekuzizakhamuzi ezingahlanganyeli epini. Ukungezelela kilokho, amakhulu weenkulungwana zabantu akatelelwa bona atjhiye imizawo.
Kusukela ngoSeptemba 24, 2023, ipi ephakathi kwe-Russia ne-Ukraine ibangele ukuhlongakala kwee-9 701 zezakhamuzi ezingahlanganyeli epini nokulimala kwabantu abazii-17 748 e-Ukraine.
Ngiliphi ithemba iBhayibheli elilinikela labo abatlhaga ngebanga lepi?
Ibanga lokuba nethemba
IBhayibheli libikezela ukuthi uZimu ‘uzokuqeda izipi ephasini loke.’ (IRhubo 46:9) Uzokusebenzisa urhulumende wezulwini namkha umbuso bona ujamiselele boke aborhulumende babantu. (Danyela 2:44) UmBuso kaZimu uzokulethela abantu itjhaphuluko.
Tjheja lokho uJesu Krestu, iKosi yomBuso kaZimu azokwenza:
“Uzokuhlangula abatlhagako abalilela isizo, kunye nabangasililitho nananyana ngubani onganamsizi. Uzokurhawukela abangasililitho nabatlhagako, uzokusindisa ukuphila kwabatlhagako. Uzobahlangula ekugandelelweni nenturhwini.”—IRhubo 72:12-14.
NgomBuswakhe, uZimu uzokuqeda isizi nokutlhaga okubangelwa yipi nenturhu.
“Uzokusula zoke iinyembezi emehlwenabo, ukufa angekhe kusaba khona namkha isizi namkha ukulila namkha ubuhlungu angekhe kusaba khona. Izinto zaphambilini zidlulile.”—IsAmbulo 21:4.
Ingasikade umBuso kaZimu uzokuletha amatjhuguluko ephasini. IBhayibheli labikezela “ngezipi nemibiko yezipi” esiyibonako namhlanjesi. (Matewu 24:6) Lokhu nezinye izenzakalo kutjengisa ukuthi siphila “emihleni yokuphela” yokubusa kwabantu.—2 Thimothi 3:1.