“Abantu benza izinto ezinengi ezizokumotjha ubujamo bezulu. Amadorobho amakhulu azozifumana angaphakathi kwamanzi. Ukutjhisa okudluleleko okungakhenge kube khona. Iinkhukhula ezithusako. Ukwanda kokutlhayela kwamanzi. Ukutjhabalala kweengidi zemihlobohlobo yeentjalo neenlwana. Le akusiyinolwana namkha ukufederisa. Ngilokho isayensi esitjela bona kuzokwenzeka, nangabe aborhulumende abatjhugululi indlela abasebenzisa ngayo iinsetjenziswa.”—Ikulumo ngonobhala zombelele weHlangano Yeentjhaba u-António Guterres, malungana nombiko we-Intergovernmental Panel on Climate Change owakhitjhwa ngo-Apreli 4, 2022.

 “Abososayensi bayelelisa ngomonakalo ozokubangwa kutjhuguluka kobujamo bezulu eminyakeni ezako pheze emaphageni woke wenarha ama-423 [e-United States], ekubonakala asengozini yokukhuphuka kwamazinga wokutjhisa. Izinto ezimbi ezingenzeka zizwakala njengalezi esingafunda ngazo eBhayibhelini. Umlilo neenkhukhula, ukuncibilika kwerhwaba emalwandle, ukukhuphuka kwamazinga wamanzi emalwandle nomtjhiso odluleleko.”—“Iinkhukhula Ezibange Ihlangahlangano EYellowstone, Itshwayo Lomonakalo Ozako,” (Flooding Chaos in Yellowstone, a Sign of Crises to Come) Isihloko esiku-The New York Times, sakaJuni 15, 2022.

 Kungakghonakala na bona imiraro yephasi ngebhoduluko ilungiswe? Nakunjalo, ngubani ongayilungisa? Cabanga ngalokho okutjhiwo liBhayibheli.

 IBhayibheli lithi uZimu ‘uzokutjhabalalisa labo abatjhabalalisa iphasi.’ (IsAmbulo 11:18) Iveseli lisifundisa izinto ezintathu:

1.  1. Lokho abantu abakwenzako kuzokulimaza iphasi.

2.  2. Ukumotjhwa kwephasi kuzokuphela.

3.  3. NguZimu ozokusombulula imiraro yephasi yebhoduluko ingasi abantu.

 IBhayibheli lithi “iphasi lihlala ngokungapheliko.” (UMtjhumayeli 1:4) Lizokuhlala linabantu.

•   Abalungileko bazakuzuza inarha, bahlale kiyo nini nanini.”—IRhubo 37:29.

 Iphasi lizokubuyiselwa libe ngendlela ebelingayo ekuthomeni.

•   Ummango nenarha eyomileko zizokuthaba, ummango othabaleleko uzokuthaba bese utlhurhe njengesafroni.”—Isaya 35:1.