Ephasini loke abantu abaphila ngendlela le sebayanda.

•   “Indlela le yokuphila, yindlela yokucabanga lapho abantu benza koke okusemandlenabo bona babalekele ukulimaza nokusebenzisa iinlwana bona bafumane ukudla, izambatho namkha okhunye.”—Ngokwe-The Vegan Society.

 Abanye balisa ukudla inyama ingasi kwaphela ngombana banendaba neenlwana kodwana bafuna ukuthuthukisa ibhoduluko, ipilwabo namkha ngamanye amabanga angokwekolo.

•   “Ukuphila ngendlela le, kuhlukile kwezinye iindlela zokukhetha ukudla ngombana abantu kanengi bayiqala njengekolelo, isiqunto sokuziphatha nendlela yomuntu ngamunye yokutjhugulula iphasi libe ngcono.”—Ngokwe-Britannica Academic.

 Inga-kghani ukungadli inyama sisombululo semiraro yephasi? Lithini iBhayibheli?

 IBhayibheli liveza ukuthi uMdalethu, uJehova uZimu a uqala abantu njengabaphakemeko kuneenlwana begodu unikele abantu ilungelo lokubusa iinlwana. (Genesisi 1:27, 28) Kuhlekuhle, uZimu wavumela abantu bona bazidle iinlwana. (Genesisi 9:3) Nanyana kunjalo, akakuvumeli ukuphathwa kumbi kweenlwana.—IzAga 12:10.

 NgokweBhayibheli, kusiqunto somuntu ukuthi uyayidla inyama namkha awa. b Esikukhethako akusenzi sibe babantu abangcono phambi kwakaZimu. (1 Korinte 8:8) Akekho umuntu okufuze anyefule omunye ngalokho akhetha ukukudla.—Roma 14:3.

 IBhayibheli liveza ukuthi indlela esikhetha ukuphila ngayo angekhe yayirarulula imiraro yephasi. Imiraro eminengi ibangelwa ngezepolotiki, zomphakathi nezomnotho zephaseli engeze zalungiseka. IBhayibheli lithi:

•   “Okugobekileko angekhe kwaluleka.”—UMtjhumayeli 1:15.

 UMdalethu uzokurarulula yoke imiraro esiqalene nayo. IBhayibheli lisebenzisa ilimi elingokomfanekiso ukuhlathulula lokho azokwenza

•   “Ngabona izulu elitjha nephasi elitjha ngombana izulu laphambilini nephasi laphambilini kudlulile nelwandle alisekho.”—IsAmbulo 21:1.

 UZimu uzokujamiselela aborhulumende babantu, namkha “izulu laphambilini,” ‘ngezulu elitjha’ umBuswakhe wezulwini. UmBuswakhe uzokususa ‘iphasi laphambilini’ okubabantu abakhohlakeleko, begodu uzokubusa ‘iphasi elitjha,’ namkha labo abazimisele ukuzithoba ngaphasi kokubusa kwakhe.

 Kungaphasi kokubusa komBuso kaZimu kwaphela lapho abantu bazokuhlala khona ngokuthula neenlwana begodu bahloniphe ibhuduluko.—Isaya 11:6-9.