Ngo-2022 ababusi bephasi loke basebenzise imali engafikela kwema-R44 035 040 000 000.00 kwezepi kwaphela, khulukhulu ngebanga lokusahlelwa kwe-Ukraine isahlelwa yiRussia. Ngokombiko we-Stockholm International Peace Research Institute (SIPRI) owakhutjhwa ngo-Apreli 2023, hlangana no-2022:

•   Indlela iYurophu eyasebenzisa ngayo imali kwezepi “yakhuphuka ngamaphesenti ali-13 emnyakeni loyo, okwaba linani elikhulu elasetjenziswa borhulumende beYurophu solo kwaphela ipi yango-1991.”

•   “I-Russia…yakhuphula izinga esebenzisa ngayo imali ngamaphesenti angafikela ku-9.2 eyenza bona ibe ngeyesithathu ephasini loke ukusebenzisa imali enengi kwezepi.”

•   I-United States ngiyo ephuma phambili ekusebenziseni imali kwezepi ngombana isebenzise amaphesenti ama-39.

 “Ngebanga lokuthi eminyakeni yamva nje aborhulumende baragele phambili bakhuphula imali abayisebenzisela zepi, kutjengisa ukuthi bazizwa bangakavikeleki,” kutjho u-Dr. Nan Tian, omunye wabatloli bombiko i-SIPRI.

 IBhayibheli labikezela bona imibuso izokuba nemiraro beyingazwani begodu ibuye isitjele nokuthi khuyini engasipha ukuthula kwamambala.

•   IBhayibheli Ibiza isikhathi esiphila kiswesi ngokuthi ‘sikhathi . . . sokuphela.’—Danyela 8:19.

•   Incwadi kaDanyela yabikezela ukuthi ngesikhathesi, kuzokuba nemibuso enamandla ephikisanako. Imibuso le ‘beyizokusunduzana,’ okutjho ukuthi beyizokulwa yodwa bona kube nephuma phambili. Yeke ukulwa lokho bekuzokuhlanganisa ukusebenzisa “izinto eziligugu,” namkha imali.—Danyela 11:40, 42, 43.

 Ukufunda okungeziweko ngesiphorofido seBhayibheli esikarisakwesi, bukela ividiyo ethi Isiprofetho Esigcwalisekile—Daniyeli ISahluko 11.

•   IBhayibheli lithi uZimu uzokususa aborhulumende babantu. “Uzokubeka umbuso ongekhe utjhatjalaliswe. Umbuso lo angeze udluliselwe kwabanye abantu, uzokutshidlha uqede yoke imibuso le begodu wona uzokujama ngokungapheliko.”—Danyela 2:44.

•   Ingasikade uJehova a uZimu uzokwenza into abantu ababhalelwa ukuyenza, uzokuletha ukuthula kwamambala okuhlala ngokungapheliko. Uzokwenza njani lokho? Urhulumende womBuswakhe wezulwini uzokususa zoke iinkhali bewuqede nenturhu.—IRhubo 46:8, 9.

 Ukufumana okungeziweko ngalokho okuzokufezwa mBuso kaZimu, funda isihloko esithi “Lapho Sekubusa UMbuso KaNkulunkulu, ‘Kuyochichima Ukuthula’.”