Mvanje, abadosiphambili bephasi, abososayensi neemfundiswa ngetheknoloji baveze imibonwabo ngemitjhini eyenziwe bona icabange beyiziphathe njengabantu, ebizwa ngokurhunyeziweko ngokuthi (AI). Bayavuma ukuthi izokusiza khulu kodwana batshwenyekile godu ngokuthi abanye angekhe bayisebenzise kuhle.

•   “I-AI yitheknoloji ephuma phambili esikhathini sethu begodu inamathuba amanengi wokuthuthukisa ukuphila kwabantu . . . Ngesikhathi esifanako, i-AI ithuthukisa amathuba wokusenza sizizwe singakaphephi, wokusimuka amalungelwethu asisekelo beyibeke zoke izinto zethu epepeneneni, okuzokwenza kube budisi ngathi ukuthemba umbuso wentando yenengi.”—U-Kamala Harris, isekela lakamongameli we-United States, ngoMeyi 4, 2023.

•   “Kuliqiniso ukuthi imitjhini eyenziwe bona icabange beyiziphathe njengabantu, ebizwa ngokuthi (AI) izokusiza khulu kwezokwelapha, kodwana ingasilimaza,” sitjho njalo isiqhema sabodorhodere nabosolwazi bezepilo bephasi loke abadoswaphambili ngu-Dr. Frederik Federspiel, esihlokweni esigadangiswe ngoMeyi 9, 2023, ku-BMJ Global Health. a

•   “Abantu bangayisebenzisa i-AI ukuthuthukisa amala. Abanye abantu abasebenza kwezetheknoloji batshwenyekile ngokuthi esikhathini esizako i-AI ingalimaza abantu.”—I-The New York Times, ngoMeyi 1, 2023.

 Kuzokubonakala ngokukhamba kwesikhathi ukuthi i-AI izokusetjenziswa kuhle namkha kumbi. Lithini iBhayibheli?

 IBhayibheli litjengisa ukuthi abantu angekhe baqinisekise ukuthi izinto abazenzako zetheknoloji zizokuba nomphumela omuhle namkha omumbi.

1.  1. Ngitjho nanyana abantu beneenhloso ezihle, abakghoni ukubona imiphumela yezenzo zabo.

   •   “Kunendlela ebonakala ngasuthi ilungile emuntwini, kodwana isiphetho sayo kukufa.”—IzAga 14:12.

2.  2. Umuntu akanalo ilawulo lokuthi abantu bazokusebenzisa kuhle namkha kumbi lokho akwenzileko.

   •   ‘Kufuze [umsebenzami] ngiwutjhiyele umuntu ozokuphila ngemva kwami. Ngubani owaziko bona uzokuhlakanipha namkha uzokuba sidlhayela? Nanyana kunjalo, uzokulawula koke engikufumene ngokusebenza budisi nangokuhlakanipha ngaphasi kwelanga. Nakho lokhu kulilize.’—UMtjhumayeli 2:18, 19.

 Ukungaqiniseki okufana nalokhu kwenza sibone ukuthi sitlhoga uMdali.

 UMdalethu uthembisa ukuthi angekhe avumele abantu namkha itheknoloji eyenziwe babantu bona itjhabalalise iphasi namkha abantu.

•   “Iphasi lihlala ngokungapheliko”—UMtjhumayeli 1:4.

•   “Abalungileko bazokufumana iphasi njengelifa begodu bazokuhlala kilo ngokungapheliko.”—IRhubo 37:29.

 NgeBhayibheli, uMdalethu usinikela isinqophiso esisidosela engomusweni elinokuthula nevikeleko. Bona ufunde okungeizweko ngalokho okutjhiwo liBhayibheli, funda isihloko esithi “Khuyini Engasisiza Sibe Nengomuso Elingcono?” nesithi “A Real Hope for a Better Tomorrow.”