Namhlanjesi aboFakazi bakaJehova bafumana iincwadi namavidiyo ngobunengi ngeendlela ze-elekthronigi kunanini ngaphambili. Kodwana eenarheni ezinengi, abafowethu abakghoni ukungena ku-inthanethi ngombana ama-data ayabiza. Abanye bahlala eendaweni ezine-network engasi yihle, lapho i-inthanethi idosa kabuthaka namkha ingabi khona ngasikhathi.

 Nanyana kunjalo abafowethu nabodadewethu nje sebayakghona ukudownloda iincwadi namavidiyo ngitjho nanyana kungana inthanethi! Kwenzeka bunjani lokhu?

 I-JW Box sisetjenziswa esincani esinikelwa amabandla aseendaweni lapho i-inthanethi ingasi yihle khona. Ibhokisaneli line-router ethengwe ekhamphanini yangaphandle begodu uMnyango wezamaKhomphyutha eBethel walenza lakghona ukufaka iincwadi namavidiyo aku-jw.org. Ibhokisana ngalinye libiza amaranda angaba yi-1 200.

 EWolweni lomBuso, abafowethu nabodadewethu bakhonektha ngabofunjathwako babo ku-JW Box bese badownloda iincwadi namavidiyo. Ngitjho nalabo abanabofunjathwako bakade namkha abangabizi khulu bangakhonektha. Kodwana ibandla nalinganayo i-inthanethi, i-JW Box izifumana njani izinto zanje? Igatja lithumela ama-USB abiza amaranda angaba yi-65 iyinye, enezinto ezitjha ezivela ku-jw.org, ezingafakwa ku-JW Box.

 Ibasize njani abafowethu i-JW Box? UNathan Adruandra, ongubaba ohlala eDemocratic Republic of Congo uyahlathulula: “Ngilinge kanengi ukudawuniloda amadrama athi ‘Mina Ngithemba Wena,... Jehova!’ nethi Khumbulani UmkaLothi. Kodwana khenge ngiphumelele, lokho kwangidanisa khulu. Nje sengiyakwazi ukudownloda amavidiyo la efoninami, lokhu kusisize khulu njengababelethi bona sifundise abantwabethu ngcono.”

 Umfowethu osiza amabandla nge-JW Box eNigeria uthi: “Abafowethu baqala i-JW Box njengesipho esiligugu esivela kuJehova. Bayathaba khulu ngokuthi nje kubulula ukudawuniloda iincwadi namavidiyo afumaneka emathulusinethu wokufundisa.”

 Kunamabhokisana angaphezu kwe-1 700 athunyelwe kubafowethu e-Afrika, e-Oceania naseSewula Amerika begodu kwenziwa amalungiselelo wokuthumela amabhokisana la nakwamanye amabandla. Zibhadalwa njani iindleko zokwenza koke lokhu? Ngeminikelo yomsebenzi wephasi loke, eminengi yayo eyenziwa ku-donate.pr418.com. Siyathokoza ngokunikela kwenu ngesandla esivulekileko.