Emnyakeni lo, aboFakazi bakaJehova bebaqale phambili ekutjhatjhululweni kwesiQephu 1 sedrama ethi, Iindaba Ezimnandi Ezimalungana NoJesu. Iingidi zabantu sele ziyibukele idrama le. Emnyakeni lo kutjhatjhululwe isiqephu sokuthoma kwezili-18! Khuyini eyenziwako njengombana kwenziwa amavidiyo amlandelande la begodu wena uwusekele njani umsebenzi lo?

 Egatjeni le-Australasia, lapho iinqephu ezinengi zedrama ethi, Iindaba Ezimnandi Ezimalungana NoJesu ezenzelwa khona, kuba nabantu abangaba ma-50 kuya ebantwini abama-80 njengombana kwenziwa isiqephu ngasinye. a Iinsebenzi zilungiselelwa ukudla nokhunye okuncani ezizokubambisa ngakho njengombana umsebenzi uraga. Ukudla kulungiselelwa kuhle kusese nesikhathi. U-Esther osebenza emNyangweni wezoKudla uthi, “sithenga ukudla eendaweni ezihlukahlukeneko khona sizokuthola ukudla okuhle kodwana ngemali encani. Sinande sitjhugulula indlela esipheka ngayo khona singazokumorosa ukudla.” Ilanga ngalinye sisebenzisa imali engaba yi-R72 ekudleni komuntu munye.

 Ngaphezu kokudla iinsebenzi zitlhoga nokuvikelwa elangeni. Kubayini? I-Australia kanengi inobujamo bezulu obufuthumeleko kodwana ngezinye iinkhathi amazinga womtjhiso aba phezulu khulu. Yeke bona iinsebenzi zingadinwa khulu ngebanga lomtjhiso, kulungiselelwe amatende ezingaphumula kiwo. Kunezinto zokuzivikela elangeni njenge-sunscreen, ama-ambrela namanzi. U-Kevin, osebenza emNyangweni wezamaVidiyo neziLalelwako, uthi: “Abafowethu nabodadwethu abanengi esisebenza nabo mavolontiya we-Bethel asuka ekhaya azokusiza. Benza umsebenzi lo ngokuthobeka nangethabo. Besingekhe siwenze umsebenzi ongaka ngaphandle kwesizo labo.”

 Ezinye iinqetjhana zedrama le akukghoneki bona zenzelwe eendaweni ezise-ofisini legatja ngombana aziveli kuhle. Yeke kutlhogeka bona kufunwe ezinye iindawo ezingasetjenziswa. Eenqetjhanenezi nakuzakuvela iindawo zekadeni eziseBhayibhelini ezinganazo iintambo zegezi, iindlela ezisindiweko nezindlu zanamhlanjesi, isiqhema siya eendaweni ezisemakhaya. Izinto ezizokutlhogeka njengamakhemera, izambatho nokhunye kulungiselelwa kuhle bese kusiwe endaweni ekuzokwenzelwa kiyo idrama. Ngaphambi kobana kuthonywe, kuyaqinisekiswa bona kunama-generator, amanzi ahlwengileko wokusela nezindlu ezincani. Isiqhema seensebenzi sifunelwa indawo yokulala emizini yaboFakazi bendaweni leyo, abanye balala emakharavanini namkha emawotela.

 Ukwenzela idrama le eendaweni ezihlukahlukeneko kuyadura, kudla isikhathi esinengi begodu kutjhiya soke isiqhema sidiniwe. Yeke ngo-2023, isiHlopha esiBusako savuma bona kuthengwe iboda elibiza R44 700 000, nawujame phambi kwalo likghona ukukuveza useendaweni ezihlukahlukeneko. Ithekhnoloji le isebenzisa amaskrini aveza iinthombe kuhle nomkhanyo okhambisana nalokho okubonako owenza kubonakale ngasuthi ividiyo yenzelwe ngaphandle. Ibodeli lenza sikghone ukubalekela ukusebenzisa imali enengi ngebanga lokurekhodela kude nesitjudiyo. U-Darren, olilunga leKomidi yeGatja le-Australasia uthi: “Ukwenzela amavidiyo phambi kwebodeli kwenza abalingisi bangadinwa khulu begodu kuvumela nesiqhema bona sikghone ukubuyelela ezinye iinqetjhana. Ngokwesibonelo, ngathana besirekhodela ngaphandle, besizokuba nemizuzu embalwa yokurekhoda ukutjhinga kwelanga. Kodwana ngebodeli, sikghona ukurekhoda ukutjhinga kwelanga kanengi ngendlela esifuna ngayo bekube kulapho livela ngendlela esilifuna ngayo.”

 Isiqephu ngasinye somlandelande wedrama ethi, Iindaba Ezimnandi sitlhoga amakhulu wabalingisi neensebenzi ezinengi. Isiqhema neensebenzi sizizwa njani ngemizamo eyenziweko bona sitlhogonyelwe?

 U-Amber, owakhamba ibanga elingaphezu kwamakhilomitha ama-700 ukusuka ekhaya e-Melbourne bona ahlanganyele emsebenzini lo, uthi: “Kusukela ngelanga engafika ngalo edoyelweni leemphaphamtjhini, abafowethu be-Bethel bangiphatha kuhle khulu. Amalunga amanengi we-Bethel angimema bona ngizokudla nawo namkha ngizokusela itiye. Woke umuntu, bekangenza ngizizwe ngitjhaphulukile begodu ngithandwa. Ikhambo lami belizele iimbusiso kwaphela. Akunalitho elingilahlekeleko!”

 U-Derek osebenza nesiqhema sokugadangisa uthi: “Iminyango eminengi ibe lisizo kusukela ekuthomeni komsebenzi lo. Kungithokozisa khuIu ukuba nabafowethu nabodadwethu abanikele ngesikhathi sabo, izinto zabo namandlabo ngebanga lomsebenzi lo. Bayasekelana, bazimisele begodu banomusa. Kwamambala uJehova usibusisile kuhlanganise nabo. Ngiyaqiniseka ukuthi akanandaba kwaphela nomphumela womsebenzethu kodwana unendaba nokuthi umsebenzi wenziwe njani.”

 Sithokoza khulu ngokusekela amavidiyo amlandelande la ngeminikelwenu, kuhlanganise naleyo eyenzwa ku-donate.pr418.com.