Sele kuminyaka engaphezu kweli-130 yoke, aboFakazi bakaJehova bahlangana emihlanganweni yaqobe mnyaka yesifunda. Imihlangano le ineenkulumo ezingaphezu kwama-40, kunombhino, imikhulumiswano namavidiyo. Ihlelweli lenzelwe bona abantu bakghone ‘ukuzwa begodu babone’ kuhle. (Lukasi 2:20) Iminikelwakho isetjenziswa njani bona imihlangano le ibe ngezuzisako kunganandaba ukuthi ikuphi?

 Eenarheni eziseTjhingalanga, amatatawu neenkundla ezinengi zemidlalo zinezinto zemidumo namavidiyo. Nasiqatjha iindawo ezinjalo kubayini sisebenzisa imitjhinethu? U-David, osebenza emNyangweni wezamaVidiyo neziLalelwako emzimKhulu, uthi: “Iindawo ezinengi esiziqatjhako azikenzelwa bona kube nomhlangano ozokuba nesikhulumi esizokukhuluma ama-awara angaphezu kwasithandathu. Ngokwesibonelo, iinkundla zemidlalo zisebenzisa izinto zazo zemidumo namavidiyo ukwenza isimemezelo nokudlala imibhino enamavidiyo amafitjhani nokudlala zemikhangiso. Amaskrini wabo aveza imikhangiso, imiphumela yezemidlalo bekabuyelele umdlalo odlalwako. Ngokuhlukileko, sifuna abantu babukele amavidiyo adlala isikhathi eside begodu bezwe bebazwisise kuhle lokho ekukhulunywa ngakho esiteji.”

 Umhlangano ngamunye uhlukile, ngamunye wawo unezinto zemidumo namavidiyo ezifanele indawo ngayinye. Nasele kukhethwe indawo yomhlangano imiNyango yezamaVidiyo neziLalelwako esema-ofisini wamagatja, iyaqala ukuthi abantu abeze emhlanganweni bazokuhlala kuphi nokuthi bazokuba banengi kangangani iqale nokuthi indawo leyo yikulu kangangani. Ngemva kwalokho, abafowethu bakghona ukuqala ukuthi iimpikara namaskrini wevidiyo kufuze zibekwe kuphi, bahlele nokuthi kufuze zihlanganiswe njani iintambo zakhona, bafaka nazo zoke izinto ezitlhogekako ukwenzela bona woke umuntu akghone ukubona nokuzwa kuhle ihlelo lomhlangano.

 Zemidumo namavidiyo ziba zinengana emihlanganweni eragwa ngamalimi amanengi. Nange ihlelo lomhlangano lizokutjhugululwa ngelinye ilimi, abatjhugululi kufuze bezwe bebabone kuhle ukuthi bakghone ukutjhugulula ngendlela edlulisa umlayezo onembileko ebantwini belimi lelo. Ngama-media player, ividiyo ikghona ukudlala ibonakale kiwo woke umuntu okhona ngesikhathi sinye ngitjho nanyana zomdumo zitjhugululelwe emalimini abunane woke. U-David uthi: “Imitjhini le inezinto ezinengi begodu amavolontiya asebenza ngayo kufuze afumane ibandulo.”

 Ama-ofisi wegatja amanengi aba nezinto zemidumo namavidiyo ezisetjenziswa qobe mnyaka. Ebujamweni obunjalo, abafowethu bahlela ukuthi imitjhini le ifike lapha ekunomhlangano khona ukusuka kwenye indawo ukuya kwenye. Igatja le-United States lisebenzisa imali engaba yi-R2 696 000 qobe mnyaka ukukhambisa imitjhini ezokusetjenziswa emhlanganweni. Nanyana kunjalo, lokhu kwehlisa imali esingayisebenzisa ukuthenga nokutlhogomela eminye imitjhini nezinto zakhona. U-Steven, okhe wasiza ekutlhogomeleni zemidumo namavidiyo emhlanganweni wesifunda e-Canada uthi, “Isiqhema sethu sezemidumo namavidiyo senze koke okusemandlenaso ukuthi zoke izinto ezimalungana nemitjhini le ziphelele bezipakeke kuhle bona ziye emhlanganweni olandelako.”

 Ukuqatjha imitjhini yezomdumo namavidiyo kudura khulu begodu imitjhini eqatjhwako esikhathini esinengi ayisisebujamweni obuhle nezingeni eliphezulu. Kungebangelo sithenga imitjhini le kunokuyiqatjha. Okwanje amaskrini we-LED anobubanzi obungaba mamitha amahlanu, bese aphakeme ngamamitha amathathu, abiza imali engaba yi-R443 000, intambo yombhobho engaba mamitha ali-15 ibiza imali engaba yi-R370. Kungebangelo umNyango wezamaVidiyo nokuLalelwako usebenzisana noMnyango wokuThenga bona ‘kubalwe iindleko’ ngaphambi kokuthenga imitjhini. (Lukasi 14:28) Ngokwesibonelo, banengi kangangani abantu abazokuzuza ngemitjhini le? Kghani ukuthenga imitjhini emitjha ngikho okuzokuba ngcono khulu? Sinendawo eyaneleko yokubeka imitjhini le, kghani sinamathulusi namavolontiya abandulwe kuhle bona atlhogomele imitjhini le?

 Bona sikghone ukwenza imitjhini le ihlale isikhathi eside besibulunge iminikelo yabafowethu nabodadwethu, sihlale siyilungisa besiyitlhogomele. Sifaka nemitjhini le ezintweni ezivikeleke khulu bona ingamotjheki lula namabhoksi ekufakwa kiwo izintwezi nawo atlhoga ukulungiswa.

 Abantu abangasiboFakazi ibakare khulu indlela ihlelo lethu lomhlangano elizwakala nelibonakala kuhle ngayo. Ngokwesibonelo komunye umhlangano wesifunda, esinye isisebenzi esisebenza kwezokurhatjha eziphuma phambili ephasini, sabuka khulu indlela imitjhinethu yezemidumo neyamavidiyo ephuma beyibonakale kuhle ngakhona ngezinga eliphezulu. U-Jonathan osiza ekufakeni amaskrini nokusebenzisa imitjhini yemidumo namavidiyo emhlanganweni uthi: “Kwamrara khulu nakezwa ukuthi amalunga wesiqhema sethu amavolontiya begodu akhenge akuyele esikolweni lokho akwenzako. Wathi kungathatha ikhampanakhe amalanga amahlanu ukwenza umsebenzi lo kodwana thina kusithatha ilanga linye nesiquntu.” Komunye umhlangano, umphathi wendawo wathi, “Abantu abanengi abanelwazi ngombhino namavidiyo khebeza la kodwana akhenge khengibone indlela ehlelekileko nangokusebenza ngokutjheja njengombana nenza!”

 Uzuze njani kwezemidumo namavidiyo emhlanganweni? Mhlamunye uzizwa njengo-David ohlala e-England uthi: “Ngineminyaka ema-88 begodu bengisolo ngiya emihlanganweni ukuphila kwami koke. Nanyana kunjalo, nje ngikghona ukuzwa bengilalelisise kuhle lokho okukhulunywa ngakho emhlanganweni. Siwathokoza khulu amavidiyo nehlelo liloke njengombana likghona ukukhamba msinyana kodwana lizwakala kuhle nomlayezo uzwakala kamnandi khulu.” U-Micheal ohlala e-Nigeria uthi, “Ngebanga lokuthi abafowethu abasakufumani kubudisi ukuzwa isikhulumi namkha ukubona amavidiyo, bakghona ukulalela kuhle begodu imikhumbulwabo ayicabangi okhunye hlangana nehlelo lomhlangano.”

 Njengombana uya emhlanganweni othi, “Memezela Iindaba Ezimnandi!” wesiFunda namkha umhlangano okhethekileko, akhe ucabange ngakho koke okubandakanyekileko bona kube nomhlangano onehlelo eliraga kuhle nelizwakala kamnandi. Siyithokoza khulu iminikelwenu, kuhlanganise nale eyenziwa ku-donate.pr418.com, isiza khulu kwamambala. Siyathokoza!