AboFakazi bakaJehova benza umsebenzi oqakathekileko wokusiza abantu eenarheni ezingaphezu kwama-200. Kodwana hlangana neenarhezo, zima-35 kwaphela ezikghona ukuzibhadalela iindleko zazo ngeminikelwazo. Alo ivelaphi imali yokutlhogomela umsebenzi eenarheni ezingakanjingi?

 IsiHlopha esiBusako saboFakazi bakaJehova siyaqalisisa ukuthi aboFakazi ephasini loke batlhogani bona balotjhe uZimu begodu barage nomsebenzi wokutjhumayela. Kuyahlelwa ukuthi ngiyiphi indlela engcono iimali ezingasetjenziswa ngayo. Nange igatja lifumana iminikelo engaphezu kwalokho elikutlhogako bona litlhogomele umsebenzalo, linikela ngemali esalako emagatjeni anganayo imali eyaneleko. Ngokwenza lokho, alandela isibonelo samaKrestu wokuthoma, asizana “ngokulinganisa.” (2 Korinte 8:14) Asebenzisa inala yawo bona aqede ukutlhoga kwamanye amaKrestu.

 Bazizwa njani abafowethu abasizwa ngeminikelo evela kwamanye amagatja? Isiquntu sabantu beTanzania baphila ngemali engaphasi kwamaranda ama-35 ngelanga, yeke iminikelo le yasatjenziselwa ukuvuselela iWolo lomBuso leBandla leMafinga. Ibandlelo latlola lathi: “Soloko kwavuselelwa iWolo lethu, sande khulu isibalo sabantu ababa khona emihlanganweni! Sithokoza kwamambala ehlanganweni kaJehova nakubafowethu ephasini loke ngokuba nesandla esivulekileko, okusenze sakghona ukuba nendawo ehle kangaka esilotjhela kiyo uZimu.”

 Abanye babafowethu eSri Lanka batlhayelelwe kukudla ngebanga le-COVID-19. Phakathi kwabo kuno-Imara Fernando nendodanakhe u-Enosh. Nanyana kunjalo, ngebanga leminikelo evela kwezinye iinarha, balifumene isizo. Ekaradeni abazenzele lona, batlola bathi: “Siyathokoza kubafowethu abatjengise ukuthi basithanda kangangani eenkhathini ezibudisezi. Kusithabisa khulu ukuba malunga womndeni lo begodu sihlala sithandazela bona uJehova asize boke abafowethu emihleni yokuphela le.”

 Kungakhathaliseki ukuthi bahlalaphi, abafowethu nabodadwethu banomoya wokuhlanganyela lokho abanakho nabanye. Ngokwesibonelo, u-Enosh wazenzela ibhokisana lomnikelo, ukwenzela bona naye anikelele ukusiza imindeni edududu. UGuadalupe Álvarez naye unomoya wokupha. Uhlala engcenyeni yeMexico lapho inengi labantu lingasebenzi khona namkha lirhola umrholo omncani khulu. Nanyana kunjalo, unikela ngalokho anganikela ngakho. Utlola uthi: “Ngiyamthokoza uJehova ngobuhle bakhe nangethando lakhe elithembekileko. Ngiyazi ukuthi umnikelwami uzokuhlanganiswa neminikelo yabanye begodu uzobasiza abafowethu abadududu.”

 Ama-ofisi wegatja athumela iimali kwamanye amagatja ayathaba ngokwenza lokho. U-Anthony Carvalho, oseKomidini yeGatja leBrazil, uthi, “Umsebenzi wegatja lethu bewusekelwa ngeemali ezivela kwezinye iinarha iminyaka eminengi. Ngebanga lokusekelwa esakufumanako kwaba nokwanda okukhulu. Nje, ubujamo bethu bezeemali butjhugulukile begodu sinethuba lokusiza abanye. Abafowethu baqala umsebenzi wokutjhumayela ephasini loke babone ukuthi ngiyiphi indima abangayidlala njengombana babafundi bakaJesu abazidelako.”

 Ngiyiphi indlela engcono aboFakazi bakaJehova abangasekela ngayo abafowabo nabodadwabo abatlhagako? Kunikela emsebenzini wephasi loke, ingasi ukuthumela imali ngokunqophileko egatjeni lakwenye inarha. Lokho kungenziwa ngokufaka umnikelo ebandleni ebhokisini elitlolwe ukuthi “Umnikelo Wephasi Loke” namkha ngokusebenzisa i-donate.pr418.com. Sithokoza khulu ngeminikelo le.