Yokuthoma YamaKhosi 4:1-34
4 IKosi uSolomoni yabusa phezu kwaka-Israyeli woke.+
2 Nanzi iinkhulu ebezingaphasi kwakhe: U-Azariya indodana kaTsadokhi+ bekamphristi;
3 u-Elirhorefi no-Arhiya amadodana kaTjhitjha bewabonobhala;+ uJehotjhafathi+ indodana ka-Arhiludi bekamtloli wezenzakalo;
4 uBhenaya+ indodana kaJehoyada bekamphathi webutho; uTsadokhi no-Abhiyathari+ bebabaphristi;
5 u-Azariya indodana kaNathani+ bekamphathi wamasekela; uZabudi indodana kaNathani bekamphristi nomngani wekosi;+
6 u-Arhitjhari bekamphathi wesigodlo; u-Adoniramu+ indodana ka-Abida bekamphathi walabo abakatelelwe bona basebenzele ikosi.+
7 USolomoni bekanamasekela ali-12 aphethe u-Israyeli woke egade alethela ikosi nomzayo ukudla. Ngalinye belinomthwalo wokuletha ukudla inyanga yinye ngomnyaka.+
8 Naka amagamawo: Indodana kaRhuri beyilawula esifundeni seentaba sakwa-Efrayimu;
9 indodana kaDekere beyilawula eMakatsa, eTjhalibimu,+ eBhethe-Tjhemetjhi ne-Eloni-Bhethe-Rhanani;
10 indodana kaRhesedi beyilawula e-Arubhotho (beyiphethe iSoko nayo yoke inarha yeRheferi);
11 indodana ka-Abinadaba beyilawula kiyo yoke imibundu yeDori (yatjhada noThafati indodakazi kaSolomoni);
12 uBhana indodana ka-Arhiludi bekalawula eTanaki, eMegido,+ neBhethe-Tjhani+ yoke eseqadi kweTsaretani ngehla kweJizriyela, kusukela eBhethe-Tjhani kufikela e-Abela-Merhola bekube sesifundeni seJokomoyamu;+
13 indodana kaGebere beyilawula eRamothi-Giliyadi+ (beyiphethe izabelo zamatende zakaJayire+ indodana kaManase, eziseGiliyadi;+ beyiphethe nesifunda se-Arigobho+ esiseBhatjhani:+ amadorobho amakhulu ama-60 anamaboda namasango alodlhelwa ngeensimbi zekhopha);
14 u-Arhinadaba indodana ka-Ido bekalawula eMarhanayimu;+
15 u-Arhimahatsi bekalawula kwaNafitali (watjhada nenye indodakazi kaSolomoni uBhasemathi);
16 uBhana indodana kaRhutjhayi, bekalawula kwa-Atjheri neBheyalothi;
17 uJehotjhafathi indodana kaParuwarha bekalawula kwa-Isakari;
18 uTjhimeyi+ indodana ka-Ela bekalawula kwaBhenjamini;+
19 uGebere indodana ka-Uri, bekalawula inarha yeGiliyadi,+ inarha kaSirhoni+ ikosi yama-Amori no-Ogi+ ikosi yeBhatjhani. Godu bekunesekela linye ebeliphethe woke amanye amasekela enarheni.
20 Abantu bakwaJuda nebakwa-Israyeli bebabanengi njengehlabathi emagega nelwandle;+ bebadla, basela begodu bathaba.+
21 USolomoni wabusa yoke imibuso kusukela eMlanjeni*+ kufikela enarheni yamaFilista nemkhawulweni weGibhide. Baletha umthelo begodu basebenzela uSolomoni yoke imihla yokuphila kwakhe.+
22 Ukudla kwakaSolomoni qobe langa bekuziinlinganiso ezima-30 zeflowuru esefiweko neenlinganiso ezima-60 zeflowuru ejayelekileko,*
23 iinkomo ezili-10 ezinonileko,* iinkomo ezima-20 ezithethwe emadlelweni, nezimvu ezili-100 kungasabalwa iinhlangumataka, iintsephe, amaqina neenyoni ezinonisiweko.
24 Bekalawula yoke into enganeno koMlambo,+ kusukela eThifisarhi kufikela eGaza,+ kuhlanganise nawo woke amakhosi angehlangothineli loMlambo;* bekanokuthula kizo zoke iimfunda ezimbhodileko.+
25 Phakathi nayo yoke imihla kaSolomoni, uJuda no-Israyeli bahlala ngokuphepha, omunye nomunye bekazihlalela ngaphasi komuthakhe wamadiribe nangaphasi komuthakhe wamafeyi, kusukela kwaDani kufikela eBheritjheba.
26 USolomoni bekaneentali zeenjomani ezizii-4 000* zokubeka iinkarana zakhe neenjomani* ezizii-12 000.+
27 Amasekela la bewaletha ukudla eKosini uSolomoni nakiwo woke umuntu odla etafuleni leKosi uSolomoni. Ngalinye beliqalene nenyanga elabelwe yona begodu beliqiniseka ukuthi akutlhayeli litho.+
28 Bewalethela iinjomani neenqhema zeenjomani ibhali notjani nanyana kunini nakutlhogekako, ngamunye ngokwesilinganiso sawo.
29 UZimu wanikela uSolomoni ukuhlakanipha nelemuko ngesilinganiso esikhulu khulu nehliziyo ebanzi* njengehlabathi emagega nelwandle.+
30 Ukuhlakanipha kwakaSolomoni kwadlula ukuhlakanipha kwabo boke abantu bePumalanga, kwadlula nakho koke ukuhlakanipha kweGibhide.+
31 Bekahlakaniphe ukudlula woke umuntu, ahlakaniphe ukudlula u-Ethani+ umZerarhi, namadodana kaMarholo uHemani,+ uKalikoli+ noDarida; idumo lakhe larhatjhekela kizo zoke iinarha ezibhodileko.+
32 Watlama izaga+ ezizii-3 000 begodu iingoma+ zakhe beziyi-1 005.
33 Bekakhuluma ngemithi, kusukela emisedarini yeLibhanoni kuya ehisopini+ emila ebodeni; bekakhuluma ngeenlwana,+ ngeenyoni,+ ngezinto ezirhurhubako+ neenhlambi.
34 Abantu bazo zoke iintjhaba beza bazokuzwa ukuhlakanipha kwakaSolomoni, kubandakanye namakhosi avela ephasini mazombe ezwe ngokuhlakanipha+ kwakhe.
Imitlolo Ephasi
^ Kutjho iYufrathe.
^ Isilinganiso sinye seflowuru singaba makhilogremu ali-130.
^ NgesiHebheru, “ezinonisiweko.”
^ Kutjho etjingalanga yeYufrathe.
^ Inaneli lifumaneka kweminye imitlolo yekadeni nekulandiseni okukhambisana nalokhu. Eminye imitlolo yekadeni ithi 40 000.
^ Namkha “nabakhweli beenjomani.”
^ Namkha “ihliziyo ezwisisako.”
