Yokuthoma YeenKronike 13:1-14
13 UDavida wabonisana neenduna zeenkulungwana nezamakhulu nabo boke abadosiphambili.+
2 Nje-ke uDavida wathi kilo loke ibandla lakwa-Israyeli: “Nangabe kubonakala kukuhle kini bekuyamukeleka kuJehova uZimethu, asithumeleni ilizwi kubafowethu abaseleko kizo zoke iimfunda zakwa-Israyeli, nakubaphristi namaLevi emadorobhenabo+ anamadlelo bona beze bazokuhlanganyela nathi.
3 Asibuyiseni umFaji+ kaZimethu.” Ngombana akhenge bawutjheje emihleni kaSawula.+
4 Loke ibandla lavuma bona kwenziwe njalo ngombana bekubonakala kukuhle emehlwenabo boke abantu.
5 Nje-ke uDavida wabuthelela woke u-Israyeli, ukusuka emlanjeni* weGibhide bekwayokufika eLebo-Rhamathi,*+ bona kulethwe umFaji kaZimu weqiniso usuka eKhiriyathi-Jeyarimu.+
6 UDavida no-Israyeli woke bakhuphukela eBhala,+ eKhiriyathi-Jeyarimu yakwaJuda bona bayokuthatha umFaji kaZimu weqiniso, uJehova, ohlala esihlalweni sobukhosi ngaphezu kwamakherubhi,*+ lapho igama lakhe libizwa khona.
7 Kodwana babeka umFaji kaZimu weqiniso ekaraneni etja,+ bawususa endlini ka-Abinadaba begodu u-Uza no-Arhiyo bebanqophisa ikarana.+
8 UDavida no-Israyeli woke bebagidinga ngawo woke amandlabo phambi kwakaZimu weqiniso, ukugidingokho bekukhambisana nomvumo, kubethwa amaharibha, ezinye iinliliso zesinara, abosotjherere,+ amasimbali+ neembhorompita.+
9 Kodwana nabafika eselelweni seKidoni, u-Uza walula isandla sakhe wabamba umFaji ngombana iinkomo zapheze zawuwisa.
10 Khonokho ilaka lakaJehova lavuthela u-Uza, wamumadlha phasi ngombana alulele isandla sakhe emFajini+ wahlongakala lapho phambi kwakaZimu.+
11 Kodwana uDavida wasilingeka ngebanga lokuthi uJehova umadlhe u-Uza begodu indawo leyo yabizwa ngokuthi yiPeretsi-Uza* bekube kunamhlanjesi.
12 Mhlokho uDavida wamsaba uZimu weqiniso begodu wathi: “Ngingawuletha njani umFaji kaZimu weqiniso kimi?”+
13 UDavida akhenge alethe umFaji lapho ebekakhona eDorobheni lakaDavida kodwana wayala bona usiwe endlini ka-Obede-Edomu umGathi.
14 UmFaji kaZimu weqiniso waba semndenini ka-Obede-Edomu, wahlala endlinakhe iinyanga ezintathu begodu uJehova wasolo abusisa umndeni ka-Obede-Edomu nakho koke ebekanakho.+
Imitlolo Ephasi
^ Namkha “eTjhirhori.”
^ Namkha “ebungenweni beRhamathi.”
^ Namkha kungenzeka “hlangana namakherubhi.”
^ Kutjho ukuthi “Ilaka Liphundlukela ku-Uza.”
