Yokuthoma YeenKronike 18:1-17
18 Ngemva kwesikhathi esithileko, uDavida wahlula amaFilista bewawabusa begodu wathatha iGathi+ namadorobho ayibhodileko ezandleni zamaFilista.+
2 Ngemva kwalokho wahlula uMowabi,+ yeke bakwaMowabi baba ziinceku zakaDavida begodu baletha umthelo.+
3 UDavida wahlula ikosi yeTsoba,+ uHadadi-Ezeri+ eduze neRhamathi+ nayisendleleni iyokuhloma ubukhosi bayo eMlanjeni iYufrathe.+
4 UDavida wayithathela iinkarana eziyi-1 000, abakhweli beenjomani abazii-7 000 namasotja akhamba ngeenyawo azii-20 000.+ Ngemva kwalokho, uDavida wasika imisipha yeenyawo zeenjomani ezidosa iinkarana kwasala ezili-100 kwaphela.+
5 Kwathi amaSiriya weDamaseku nawazokusiza uHadadi-Ezeri ikosi yeTsoba, uDavida warhayila amaSiriya azii-22 000.+
6 Yeke uDavida wahloma iinkampa zamasotja eSiriya yeDamaseku begodu amaSiriya aba ziinsebenzi zakaDavida aletha nomthelo. UJehova wenza uDavida waphumelela nanyana kukuphi lapho bekaya khona.+
7 Ngaphezu kwalokho, uDavida wathatha iinhlangu zegolide ezirondo eensebenzini zakaHadadi-Ezeri, weza nazo eJerusalema.
8 UDavida wathatha ikhopha enengi eThibirhathi neKuni, okumadorobho kaHadadi-Ezeri. Ngayo uSolomoni wenza iLwandle lekhopha,+ iinsika neensetjenziswa zekhopha.+
9 Kwathi uToyi ikosi yeRhamathi nakezwa ukuthi uDavida uhlule loke ibutho lakaHadadi-Ezeri+ ikosi yeTsoba,+
10 msinyana wathumela indodanakhe uHadoramu eKosini uDavida bona iyokubuza amavuko beyimthokozise ngombana bekalwe noHadadi-Ezeri bewamhlula (ngombana uHadadi-Ezeri bekajayele ukulwa noToyi), yamphathela nemihlobohlobo yezinto zegolide, zesiliva nezekhopha.
11 IKosi uDavida yanikela* uJehova izintwezi,+ kuhlanganise nesiliva negolide eyalithatha kizo zoke iintjhaba: Kwa-Edomu nakwaMowabi, kuma-Amoni,+ kumaFilista+ nakuma-Amalekhi.+
12 U-Abitjhayi+ indodana kaTseruya+ warhayila ama-Edomu azii-18 000 emRhobeni weTswayi.+
13 Wahloma iinkampa zamasotja kwa-Edomu begodu woke ama-Edomu aba ziinsebenzi zakaDavida.+ UJehova wenza uDavida waphumelela nanyana kukuphi lapho ebekaya khona.+
14 UDavida waraga nokubusa phezu kwaka-Israyeli woke+ begodu bekabusa ngobulungiswa nokulunga kibo boke abantu bakhe.+
15 UJowabi indodana kaTseruya bekamphathi webutho,+ uJehotjhafathi+ indodana ka-Arhiludi bekamtloli wezenzakalo,
16 uTsadokhi indodana ka-Arhithubi no-Arhimeleki indodana ka-Abhiyathari bebabaphristi begodu uTjhavitjha bekangunobhala.
17 UBhenaya indodana kaJehoyada bekamphathi wamaKereti+ namaPeleti.+ Amadodana kaDavida bewadlulwa yikosi kwaphela ngesikhundla.
Imitlolo Ephasi
^ NgesiHebheru, “yacwengisela.”
