Yokuthoma YeenKronike 29:1-30
29 Nje-ke iKosi uDavida yathi kilo loke ibandla: “Indodanami uSolomoni, ekhethwe nguZimu,+ isanuka ibisi begodu ayinalemuko,+ nomsebenzi lo mkhulu ngombana akusilithempeli lomuntu kodwana ngelakaJehova uZimu.+
2 Ngizinikele ngamandlami woke bona ngilungiselele indlu kaZimami, nginikele ngegolide lomsebenzi wegolide, ngesiliva lomsebenzi wesiliva, ngekhopha yomsebenzi wekhopha, ngesimbi yomsebenzi wesimbi,+ ngeengodo+ zomsebenzi weengodo, ngamatje we-oniksi nangamatje ekufuze abekwe ngedaka, ngamatje wokukghabisa amancani anemibala emihle nawo woke umhlobo wamatje aligugu namatje we-alabhasta amanengi khulu.
3 Ngaphezu kwalokho, ngebanga lokuthatjiswa yindlu kaZimami,+ nginikela nangebulungelo lami lamagugu+ wegolide nesiliva endlini kaZimami, ukungezelela kikho koke engikulungiselele indlu ecwengileko,
4 kuhlanganise amatalende* wegolide azii-3 000 avela e-Ofira+ namatalende wesiliva elitsengiweko azii-7 000 bona kunamekwe amaboda wezindlu,
5 igolide lomsebenzi wegolide, isiliva lomsebenzi wesiliva nawo woke umsebenzi ekufuze wenziwe ziinsebenzi zobukghwari. Nje-ke ngubani ozinikela ngokusuka ehliziyweni namhlanjesi bona aphe uJehova isipho?”+
6 Yeke amakhosana weenkoro, amakhosana weentjhaba zakwa-Israyeli, iinduna zeenkulungwana nezamakhulu+ neenduna zomsebenzi wekosi+ zavuma ngokusuka ehliziyweni.
7 Zanikela emsebenzini wendlu kaZimu weqiniso: Zanikela ngamatalende wegolide azii-5 000, ngamadariki* azii-10 000, ngamatalende wesiliva azii-10 000, ngamatalende wekhopha azii-18 000 namatalende wesimbi azii-100 000.
8 Nanyana ngubani obekanamatje aligugu wawanikela ebulungelweni lamagugu lendlu kaJehova, ngaphasi kwetjhejo lakaJerhiyeli+ umGeritjhoni.+
9 Abantu bakuthabela ukunikela ngokusuka ehliziyweni ngombana benzela uJehova iminikelo esuka ehliziyweni ngehliziyo epheleleko,+ noDavida ikosi wathaba khulu.
10 Ngemva kwalokho, uDavida wadumisa uJehova phambi kwebandla loke. UDavida wathi: “Kwanga ungadunyiswa ngokungapheliko, Jehova Zimu ka-Israyeli ubabethu.
11 Ngebakho Jehova ubukhulu+ namandla+ nobuhle nephazimulo nesithunzi,+ ngombana koke okusezulwini nokusephasini ngekwakho.+ Umbuso ngewakho Jehova.+ Wena uziphakamisa njengehloko yakho koke.
12 Ubunjinga nephazimulo kuvela kuwe+ begodu ubusa phezu kwakho koke,+ esandleni sakho kuneenkhwepha+ namandla,+ isandla sakho sikghona ukwenza izinto ezikulu+ besinikele amandla kibo boke.+
13 Nje-ke Zimethu siyakuthokoza begodu sidumisa igama lakho elihle.
14 “Nanyana kunjalo, ngingubani mina begodu babobani abantu bekhethu bona sibe sebujamweni bokwenza iminikelo esuka ehliziyweni enjenga le? Ngombana koke kuvela kuwe begodu sikunikele okuvela esandleni sakho.
15 Ngombana sibabantu abavela kwezinye iinarha phambi kwakho nabahlali, njengabo boke abokhokho bethu.+ Ngombana amalangethu wephasini anjengesithunzi,+ awanathemba.
16 Maye! Jehova Zimethu, boke ubunjinga esibulungiselele ukukwakhela indlu yegama lakho elicwengileko buvela esandleni sakho begodu koke kungekwakho.
17 Ngazi kuhle Zimami bona uhlola ihliziyo+ nokuthi uthatjiswa kuthembeka.+ Ekulungeni kwehliziywami, nginikele izintwezi zoke ngokusuka ehliziyweni bengithabe khulu nangibona abantu bakho abakhona lapha bakwenzela iminikelo esuka ehliziyweni.
18 Maye! Jehova Zimu ka-Abrahama, ka-Isaka noka-Israyeli abokhokho bethu, kwanga imicabango le ingahlala eenhliziyweni zabantu bakho ngokungapheliko begodu nqophisela iinhliziyo zabo kuwe.+
19 Nikela indodanami uSolomoni ihliziyo epheleleko,+ bona iphethe imiyalwakho,+ iinkhumbuzo zakho neenqophiso zakho begodu yenze zoke izintwezi beyakhe ithempeli engenze amalungiselelwalo.”+
20 Ngemva kwalokho, uDavida wathi kilo loke ibandla: “Nje-ke dumisani uJehova uZimenu.” Yeke loke ibandla ladumisa uJehova uZimu wabokhokho balo, lakhothama belaguqa kuJehova nekosini.
21 Baraga nokwenzela uJehova imihlatjelo, banikela imihlatjelo etjhiswako+ kuJehova ngelanga elilandelako, iinkunzana eziyi-1 000, amaramu ayi-1 000, iimvana eziduna eziyi-1 000 neminikelwazo yesiselo;+ benzela u-Israyeli woke imihlatjelo eminengi.+
22 Baraga badla bebasela phambi kwakaJehova ngelangelo ngethabo elikhulu,+ benza uSolomoni indodana kaDavida ikosi ihlandla lesibili bebamzesa phambi kwakaJehova bona abe mrholi,+ babeka noTsadokhi bona abe mphristi.+
23 USolomoni wahlala esihlalweni sobukhosi sakaJehova+ waba yikosi esikhundleni sakaDavida uyise, waphumelela begodu woke ama-Israyeli bewamlalela.
24 Woke amakhosana,+ iingorho+ nawo woke amadodana weKosi uDavida+ bazithoba ekosini uSolomoni.
25 Yeke uJehova wenza uSolomoni waba mkhulu ngokurarako phambi kwaka-Israyeli woke, wamnikela isithunzi sobukhosi esingakhenge khesifunyanwe nginanyana ngiyiphi ikosi yakwa-Israyeli ngaphambi kwakhe.+
26 Nje-ke uDavida indodana kaJese wabusa u-Israyeli woke,
27 isikhathi sokubusa kwakhe kwa-Israyeli saba minyaka ema-40. ERhebroni wabusa iminyaka elikhomba,+ wabusa eJerusalema iminyaka ema-33.+
28 Wahlongakala ngemva kokuthabela ukuphila isikhathi eside,+ aneliswe malanga wokuphila kwakhe, mnotho nedumo; indodanakhe uSolomoni yaba yikosi esikhundleni sakhe.+
29 Malungana nomlando weKosi uDavida, ukusuka ekuthomeni ukuya ekupheleni, utloliwe hlangana namezwi kaSamyela umboni wemibono, uNathani+ umphorofidi noGadi+ umboni,
30 nabo boke ubukhosi bakhe, amandlakhe nezehlakalo zeenkhathi ezibandakanya yena no-Israyeli nayo yoke imibuso embhodileko.
Imitlolo Ephasi
^ Italende beyilingana namakhilogremu ayi-34.2. Qala Isith. B14.
^ Idariki sipaparwana segolide sePheresiya. Qala Isith. B14.
