USamyela Wokuthoma 19:1-24
19 Ngemva kwesikhathi, uSawula wakhuluma noJonathani indodanakhe neensebenzi zakhe zoke ngokubulala uDavida.+
2 Njengombana uJonathani indodana kaSawula bekamthanda khulu uDavida,+ uJonathani wathi kuDavida: “USawula ubaba ufuna ukukubulala. Ngibawa utjheje ekuseni, ukhambe uye endaweni efihlekileko begodu ubhace.
3 Ngizokuphuma ngijame eduze nobaba esimini lapho uzabe ukhona. Ngizokukhuluma ngawe kubaba begodu nangingezwa okuthileko, ngizokwazisa nakanjani.”+
4 Yeke uJonathani wakhuluma kuhle ngoDavida+ kuyise uSawula. Wathi kuye: “Ikosi ayingoni kuDavida isisebenzi sayo ngombana akakakoni begodu lokho akwenzele khona kukuzuzisile.
5 Wafaka ukuphila kwakhe engozini ngokubulala umFilista,+ ngalokho uJehova wasindisa ama-Israyeli woke. Nawe wakubona lokho bewathaba khulu. Yeke kubayini kufuze wone ngokuphalaza iingazi ezinganamlandu, ngokubulala uDavida ngaphandle kwesizathu?”+
6 USawula wamlalela uJonathani begodu uSawula wafunga wathi: “Ngifunga ngoJehova uZimu ophilako, angeze abulawe.”
7 Ngemva kwalokho, uJonathani wabiza uDavida wamtjela zoke izintwezi. Yeke uJonathani waletha uDavida kuSawula bewaragela phambili amsebenzela njengaphambilini.+
8 Ngokukhamba kwesikhathi kwavuka ipi godu, uDavida waphuma wayokulwa namaFilista, warhayila amaFilista amanengi khulu begodu abaleka phambi kwakhe.
9 Ummoya omumbi ovela kuJehova weza phezu kwakaSawula+ nakahlezi ngendlinakhe aphethe umkhonto, ngesikhathi uDavida adlala umbhino ngeharibha.+
10 USawula walinga ukuhlanganisa uDavida neboda ngomkhonto kodwana uDavida wamphepha, umkhonto wahlaba ebodeni. UDavida wabaleka ngobusuku bamhlokho.
11 Ngemva kwesikhathi, uSawula wathumela iinthunywa endlini kaDavida bona ziyigade begodu zimbulale ekuseni+ kodwana uMikali umkaDavida wathi kuye: “Nangabe awubaleki ebusuku banamhlanjesi, uzokuba ngofileko kusasa.”
12 Khonokho uMikali wehlisela uDavida phasi ngefesidere, bona uDavida akghone ukubaleka.
13 UMikali wathatha isithombe setherafimi* wasibeka embhedeni, wathatha ineda yoboya bembuzi wayibeka endaweni yehlokwakhe begodu wasembesa ngesambatho.
14 Nje-ke uSawula wathumela iinthunywa bona ziyokuthatha uDavida kodwana uMikali wathi kizo: “Uyagula.”
15 Yeke uSawula wathumela iinthunywa bonyana ziyokuhlola uDavida bese wathi kizo: “Nimlethe kimapha ngombhedakhe bona azokubulawa.”+
16 Iinthunywa nazingenako, zafumana isithombe setherafimi* embhedeni neneda yoboya bembuzi lapho ebekuzokuba nehlokwakhe khona.
17 USawula wathi kuMikali: “Ungikhohliseleni, walisa inaba lami+ labaleka?” UMikali waphendula uSawula wathi: “Uthe kimi, ‘Ngibalekisa, nakungasinjalo ngizokubulala!’”
18 Nje-ke uDavida wabaleka wafika kuSamyela eRama.+ Wambikela koke uSawula amenze khona. Ngemva kwalokho, yena noSamyela bakhamba bayokuhlala eNayothi.+
19 Ngokukhamba kwesikhathi, kwafika umbiko kuSawula othi: “Qala! UDavida useNayothi eRama.”
20 Khonokho uSawula wathumela iinthunywa bona ziyokubamba uDavida. Kodwana nazibona abadala babaphorofidi baphorofida noSamyela ajamile abengamele, ummoya kaZimu weza phezu kweenthunywa zakaSawula begodu nazo zathoma ukwenza njengabaphorofidi.
21 Kwathi nabatjela uSawula ngalokho, wathumela ezinye iinthunywa khonokho kodwana nazo zathoma ukwenza njengabaphorofidi. Yeke uSawula wathumela ezinye iinthunywa godu, isiqhema sesithathu begodu naso sathoma ukwenza njengabaphorofidi.
22 Ekugcineni naye waya eRama. Nakafika emthonjeni omkhulu oseSekhu wabuza wathi: “USamyela noDavida baphi?” Bamphendula bathi: “Balapha eNayothi+ eRama.”
23 Kwathi uSawula nakasendleleni esuka lapho etjhinga eNayothi eRama, ummoya kaZimu weza nakuye begodu wakhamba enza njengomphorofidi bewayokungena eNayothi eRama.
24 Naye wahlubula izambatho zakhe, wenza njengabaphorofidi phambi kwakaSamyela begodu walala lapho ahlubule ilanga loke nobusuku boke bamhlokho. Kungebangelo bathi: “Kghani noSawula sekangomunye wabaphorofidi?”+
