Yesibili YeenKronike 18:1-34
18 UJehotjhafathi bekanomnotho omnengi+ begodu adume khulu, kodwana watjhadiselana no-Arhabi.+
2 Ngemva kweminyaka ethileko, wehlela ku-Arhabi eSamariya,+ u-Arhabi wamenzela umhlatjelo wezimvu neenkomo ngobunengi, wenzela nabantu ebekakhamba nabo. Wamrabhela bona akhuphuke naye ukuyokulwa neRamothi-Giliyadi.+
3 Nje-ke u-Arhabi ikosi yakwa-Israyeli yathi kuJehotjhafathi ikosi yakwaJuda: “Uzokukhamba nami na eRamothi-Giliyadi? Waphendula wathi: “Mina nawe siyafana, abantu bami bafana nabantu bakho begodu sizokusekela epini.”
4 Kodwana uJehotjhafathi wathi ekosini yakwa-Israyeli: “Ngibawa ubuze uJehova qangi.”+
5 Ikosi yakwa-Israyeli yabuthelela abaphorofidi ndawonye, okumadoda angaba ma-400, yathi kibo: “Sikhambe na siyokulwa neRamothi-Giliyadi namkha singayi?” Bathi: “Khuphukani, uZimu weqiniso uzoyinikela esandleni sekosi.”
6 UJehotjhafathi wathi: “Akunamphorofidi kaJehova na?+ Akasibuzele kuZimu.”+
7 Khonokho ikosi yakwa-Israyeli yathi kuJehotjhafathi: “Usesekhona umuntu+ ongasibuzela kuJehova; kodwana ngiyamzonda ngombana akaphorofidi izinto ezihle ngami, uhlala aphorofida ezimbi kwaphela.+ NguMikaya indodana kaYimla.” Kodwana uJehotjhafathi wathi: “Ikosi akukafuzi ikhulume njalo.”
8 Yeke ikosi yakwa-Israyeli yabiza isikhulu sesigodlo yathi: “Rhaba ubize uMikaya indodana kaYimla.”+
9 Ikosi yakwa-Israyeli noJehotjhafathi ikosi yakwaJuda bebahlezi ngamunye esihlalweni sakhe sobukhosi, bambethe izambatho zobukhosi; bebahlezi ngeselelweni ebungenweni besango leSamariya begodu boke abaphorofidi bebaphorofida phambi kwabo.
10 UTsedekhiya indodana kaKenana wazenzela iimpondo zesimbi wathi: “UJehova uthi, ‘Ngeempondwezi uzokuhlaba amaSiriya bewuwaqede.’”
11 Boke abanye abaphorofidi bebaphorofida ngendlela efanako bathi: “Khuphukani niye eRamothi-Giliyadi nizokuphumelela;+ uJehova uzoyinikela esandleni sekosi.”
12 Nje-ke isithunywa ebesiyokubiza uMikaya sathi kuye: “Qala! Amezwi wabaphorofidaba avumelana ngokuhle ekosini. Ngibawa nelizwi lakho lifane namezwabo+ likhulume okuhle.”+
13 Kodwana uMikaya wathi: “Ikani uJehova nakasaphilako, ngizokutjho nanyana yini uZimami angitjela yona.”+
14 UMikaya waya ekosini begodu ikosi yathi kuye: “Mikaya siye na ukuyokulwa neRamothi-Giliyadi namkha singayi?” Waphendula wathi: “Khuphukani, nizokuphumelela, izokunikelwa ezandleni zenu.”
15 Khonokho ikosi yathi kuye: “Kufuze ngikufungise kangakhi ukuthi nanyana yini oyikhuluma kimi egameni lakaJehova kufuze ibe liqiniso kwaphela?”
16 Nje-ke wathi: “Ngibona woke ama-Israyeli aphadlhalele eentabeni njengezimvu ezinganamalusi.+ UJehova wathi: “Laba abanakosi. Ngamunye akabuyele emzinakhe ngokuthula.’”
17 Ngemva kwalokho, ikosi yakwa-Israyeli yathi kuJehotjhafathi: “Aphi amangami, ngikutjelile ukuthi angekhe aphorofide izinto ezihle ngami kodwana uzokuphorofida ezimbi kwaphela.”+
18 UMikaya wathi: “Lalelani umlayezo ovela kuJehova: Ngibone uJehova ahlezi esihlalweni sakhe sobukhosi+ begodu loke ibutho lakhe lezulwini+ lijame ngesidleni nangesinceleni sakhe.+
19 UJehova wathi: ‘Ngubani ozokuyenga u-Arhabi ikosi yakwa-Israyeli, bona akhuphuke ayokufela eRamothi-Giliyadi?’ Omunye bekatjho lokhu omunye atjho okhunye.
20 Ngemva kwalokho, ingilozi+ yatjhidela yajama phambi kwakaJehova yathi, ‘Mina ngizomyenga.’ UJehova wayibuza, ‘Uzokwenza njani lokho?’
21 Yaphendula yathi: “Ngizokwenza abaphorofidi bakhe bakhulume amala. Yeke uZimu wathi, ‘Kwamambala uzomyenga begodu uzokuphumelela. Khamba-ke uyokwenza njalo.’
22 Nje-ke uJehova wenze abaphorofidi bakhwaba bona bakhulume amala+ kodwana uJehova ubikezele ihlekelele malungana nawe.”
23 UTsedekhiya+ indodana kaKenana watjhidela wabetha uMikaya+ emhlathini+ wathi: “Kuze njani ummoya kaJehova ungidlule uyokukhuluma nawe?”+
24 UMikaya wamphendula wathi: “Uzakubona ukuthi udlule njani ngelanga ozakungena ngalo ekumbeni efihlekileko bona ubhace.”
25 Ngemva kwalokho, ikosi yakwa-Israyeli yathi: “Thathani uMikaya nimuse ku-Amoni induna yedorobho nakuJowatjhi indodana yekosi.
26 Nithi kibo, ‘Nakhu ikosi ekutjhoko: “Fakani umrhali lo ngejele,+ nimuphe uburotho obuncani namanzi, bekube kulapho ngibuya ngokuthula.”’”
27 Kodwana uMikaya wathi: “Nange ungabuya ngokuthula, uJehova uzabe angakakhulumi nami.”+ Ngemva kwalokho, wathi: “Tjhejani nina noke bantu.”
28 Yeke ikosi yakwa-Israyeli noJehotjhafathi ikosi yakwaJuda bakhuphukela eRamothi-Giliyadi.+
29 Ikosi yakwa-Israyeli yathi kuJehotjhafathi: “Ngizozenza ngasuthi ngingomunye umuntu bese ngingene epini kodwana wena kufuze umbathe isambatho sakho sobukhosi.” Yeke ikosi yazenza ngasuthi ingomunye umuntu bese bangena epini.
30 Ikosi yeSiriya yayala abalawuli beenkarana zayo zepi yathi: “Ningalwi nananyana ngubani, omncani namkha omkhulu kodwana yilwani nekosi yakwa-Israyeli kwaphela.”
31 Msinyana kuthe abalawuli beenkarana zepi nababona uJehotjhafathi, bazitjela bathi: “Yikosi yakwa-Israyeli.” Nje-ke bajikela ngakuye bona balwe naye; uJehotjhafathi wathoma ukurhuwelela abawa isizo begodu uJehova wamsiza,+ wabenza balisa ukumlandela.
32 Abalawuli beenkarana zepi nababona ukuthi akusiyikosi yakwa-Israyeli, msinyana balisa ukumlandela.
33 Kodwana enye indoda izidubulela nje ngomsubelayo, yanemba ikosi yakwa-Israyeli hlangana nomhlanganiso wesambatho sayo sepi. Ikosi yathi kumlawuli wekaranayo yepi: “Jika, ngikhupha epini ngombana ngilimele khulu.”+
34 Ipi yaraga ilanga loke, ikosi yakwa-Israyeli kwatlhogeka bona isanyiswe ekaraneni iqale amaSiriya bekwaba kuntambama, kwathi nakutjhinga ilanga yahlongakala.+
