Yesibili YeenKronike 5:1-14
5 Nje-ke uSolomoni wawuqeda woke umsebenzi ebekufuze awenzele indlu kaJehova.+ Ngemva kwalokho, uSolomoni wangenisa izinto uDavida uyise ebekazenze zacwengeka,+ wabeka isiliva, igolide nazo zoke ezinye izinto emabulungelweni wamagugu wendlu kaZimu weqiniso.+
2 Ngesikhatheso uSolomoni wabizela ndawonye abadala bakwa-Israyeli, zoke iinhloko zeenkoro, amakhosana weenkoro zakwa-Israyeli. Beza eJerusalema bakhuphuka nomfaji wesivumelwano sakaJehova usuka eDorobheni lakaDavida,+ okuyiZiyoni.+
3 Woke amadoda wakwa-Israyeli abuthana phambi kwekosi emnyanyeni* obanjwa ngenyanga yekhomba.+
4 Nje-ke bafika boke abadala bakwa-Israyeli begodu amaLevi athwala umFaji.+
5 Bakhuphuka nomFaji, itende lokuhlangana+ nazo zoke izitja ezicwengileko ebezingetendeni. Abaphristi namaLevi* bakhuphuka nazo.
6 IKosi uSolomoni nayo yoke ihlangano yakwa-Israyeli, ebeyiyalwe bona iyokuhlangana nayo, bebajame phambi komFaji. Bekwenziwa imihlatjelo eminengi yezimvu neyeenkomo+ kangangobana bebangakghoni nokuzibala.
7 Yeke abaphristi bangenisa umfaji wesivumelwano sakaJehova endawenawo, ekumbeni efihlekileko yendlu, okuyiNdawo eCwengeke Khulu, ngaphasi kwamaphiko wamakherubhi.+
8 Amaphiko wamakherubhi bewavulekele phezu kwendawo yomFaji bona amakherubhi agubuzese umFaji neembambo zawo+ ukusuka phezulu.
9 Iimbambo zawo bezizide kangangobana iimpente zazo bezibonakala ngeNdaweni eCwengileko ephambi kwekumba efihlekileko kodwana bezingabonakali nawungaphandle. Ziseselapho bekube kunamhlanjesi.
10 Bekunganalitho ngaphakathi komFaji ngaphandle kwemiqebethu emibili eyabekwa nguMosi kiwo eRhorebe,+ lokha uJehova nakenza isivumelwano+ nabantu bakwa-Israyeli nabaphuma eGibhide.+
11 Abaphristi nabaphuma endaweni ecwengileko (ngombana boke abaphristi ebebakhona bebazicwengisile+ kungayi ngokuthi ngebesigaba siphi),+
12 boke abavumi bamaLevi+ abangebaka-Asafa,+ bakaHemani,+ bakaJedutuni,+ bamadodanabo nabafowabo bebambethe itjhila lezinga eliphezulu, baphethe amasimbali, iinliliso zesinara namaharibha; bebajame ngepumalanga ye-aldara, kunye nabo kunabaphristi abali-120 ababetha amabhorompita.+
13 Kuthe lokha ababethi bamabhorompita nabavumi badumisa begodu bathokoza uJehova kanye kanye begodu kukhuphuka umdumo wababetha amabhorompita, amasimbali nezinye iinliliso ngesikhathi badumisa uJehova “ngombana muhle; ithando lakhe* lihlala ngokungapheliko,”+ yeke indlu, indlu kaJehova, yazala ilifu.+
14 Abaphristi bebangakghoni ukujama benze imisebenzabo ngebanga lelifu, ngombana iphazimulo kaJehova yazala indlu kaZimu weqiniso.+
Imitlolo Ephasi
^ Kutjho umNyanya wemiTlhatlhana.
^ Namkha “abaphristi abamaLevi.”
^ Namkha “ithando lakhe elithembekileko.”
