USamyela Wesibili 12:1-31
12 Yeke uJehova wathumela uNathani+ kuDavida. Wangena ngakuye+ wathi: “Bekunabantu ababili edorobheni elithileko, omunye bekayinjinga bese omunye asiqhaka.
2 Injinga le beyinezimvu neenkomo ezinengi khulu;+
3 kodwana umuntu odobha phasi bekanganalitho ngaphandle kwemvana yinye tere esikazi ayithengako.+ Bekayitlhogomela begodu yakhulela phambi kwakhe namadodanakhe. Beyidla ekudleni okuncani anakho, isela ekaphwenakhe begodu ilala ezandleni zakhe. Yaba njengendodakazi kuye.
4 Ngemva kwesikhathi esithileko, injinga yafikelwa sivakatjhi kodwana azange ithathe nayinye yezimvu neenkomo zayo bona ilungiselele isivakatjhi sayo ukudla. Kunalokho, yathatha imvana yomuntu odobha phasi loya, yalungiselela isivakatjhi sayo ukudla.”+
5 Nakezwa lokho, uDavida wasilingeka khulu ngebanga lomuntu loyo, wathi kuNathani: “Ngifunga ngoJehova uZimu ophilako,+ umuntu owenze lokhu ufanelwe kukufa!
6 Yeke kufuze ahlawulele imvana ngokuphindwe kane,+ ngebanga lento ayenzileko nokuthi azange abe nesirhawu.”
7 Nje-ke uNathani wathi kuDavida: “Umuntu loyo nguwe! UJehova uZimu ka-Israyeli uthi: ‘Mina ngokwami ngakuzesa bona ube yikosi yakwa-Israyeli,+ ngakusindisa nesandleni sakaSawula.+
8 Bengizimisele ukukunikela indlu yekosakho+ nokubeka abafazi bekosakho+ ezandleni zakho bese ngakunikela indlu ka-Israyeli nendlu kaJuda.+ Njengokungathi lokho bekungakaneli, bengizimisele ukukwenzela okunengi khulu ukudlula lokhu.+
9 Kubayini udelele ilizwi lakaJehova ngokwenza okumbi emehlwenakhe? Urhayile u-Uriya umRhiti ngesabula!+ Ngemva kwalokho, wathatha umkakhe wamenza umkakho+ ngemva kokuthi umbulele ngesabula yama-Amoni.+
10 Nje-ke isabula angeze isasuka endlinakho,+ ngombana ungidelelile ngokuthatha umka-Uriya umRhiti wamenza umkakho.’
11 UJehova uthi: ‘Ngikulethela ihlekelele ezokuvela ngendlinakho;+ ngizokuthatha abafazi bakho ngibanikele enye indoda phambi kwamehlwakho,+ izokulala nabafazi bakho emini kwa bha!+
12 Ngitjho nanyana wena ukwenze ngemsitheleni,+ mina ngizokwenza phambi kwaka-Israyeli woke begodu ngizokwenza emini kwa bha!’”
13 Yeke uDavida wathi kuNathani: “Ngonile kuJehova.”+ UNathani waphendula uDavida wathi: “NoJehova uyasilibalela* isono sakho.+ Angekhe ufe.+
14 Nanyana kunjalo, ngebanga lokuthi umdelele ukumdelela uJehova endabeni le, indodana oqeda ukubelethelwa yona izokufa nakanjani.”
15 Ngemva kwalokho, uNathani wabuyela endlinakhe.
UJehova wabetha umntwana umka-Uriya ambelethele uDavida ngokugula.
16 UDavida wancenga uZimu weqiniso ngebanga lomsana lo. UDavida wazila ukudla begodu bekangena ngelawini lakhe alale phasi ubusuku boke.+
17 Nje-ke abadala bendlwakhe bajama hlanu kwakhe balinga ukumvusa kodwana wala begodu bekangadli nabo.
18 Ngelanga lekhomba, umntwana wahlongakala kodwana iinsebenzi zakaDavida bezisaba ukumtjela ukuthi umntwana uhlongakele. Zathi: “Sakhuluma naye ngesikhathi umntwana asaphila kodwana azange asilalele. Alo sizoyithomaphi yokuthi umntwana uhlongakele? Angenza into esabekako.”
19 UDavida nakabona ukuthi iinsebenzi zakhe ziyahlebelana, walemuka ukuthi umntwana uhlongakele. UDavida wathi eensebenzini zakhe: “Umntwana uhlongakele na?” Zaphendula zathi: “Uhlongakele.”
20 Yeke uDavida wavuka. Wahlamba, wazizesa ngamafutha,+ wambatha ezinye izambatho bese wangena ngendlini+ kaJehova walotjha. Ngemva kwalokho, watjhinga ngendlinakhe wabawa bona bamlethele ukudla, wadla.
21 Iinsebenzi zakhe zambuza zathi: “Kubayini wenze ngalendlela? Ngesikhathi umntwana asaphila, uzile ukudla begodu wasolo ulila kodwana msinyana ngemva kokuhlongakala komntwana, uvukile bewadla.”
22 Waphendula wathi: “Ngesikhathi umntwana asaphila, ngazila ukudla+ begodu ngasolo ngilila ngombana bengizitjela ukuthi, ‘Kwazi bani bona mhlamunye uJehova angangenzela umusa avumele umntwana aphile?’+
23 Njengombana sekahlongakele, ngizakuthi ngizilelani? Ngingambuyisa na?+ Mina ngizokuya kuye,+ kodwana yena angekhe abuyele kimi.”+
24 Yeke uDavida waduduza umkakhe uBhathi-Tjheba.+ Wangena ngakuye walala naye. Ngokukhamba kwesikhathi, wambelethela indodana, yathiywa ngokuthi nguSolomoni.*+ UJehova wamthanda umntwana lo,+
25 wathumela ilizwi ngoNathani+ umphorofidi bona bamthiye ngokuthi nguJedidiya,* ngebanga lakaJehova.
26 UJowabi waraga alwa neRabha+ yama-Amoni+ begodu wathumba idorobho lebukhosini.+
27 Nje-ke uJowabi wathumela iinthunywa kuDavida wathi: “Ngilwe neRabha+ begodu ngithumbe idorobho lamanzi.*
28 Nje-ke buthelela woke amanye amasotja, uhlome ikampa ulwe nedorobheli bewulithumbe. Nakungasinjalo, ngimi ozokuthumba idorobheli begodu lizokubizwa ngegama lami.”
29 Yeke uDavida wabuthelela woke amasotja watjhinga eRabha, walwa nayo wayithumba.
30 Ngemva kwalokho, wathatha isihlohlo sakaMalikamu ehlokwakhe. Ubudisi baso bebulitalende* legolide, kuhlanganise namatje aligugu, sathweswa uDavida. Wathumba nepahla enengi+ edorobhenelo.+
31 Wakhupha abantu bedorobhelo, wabasebenzisa ekusarheni amatje, basebenza ngeensetjenziswa zesimbi ezibukhali nangamazembe wesimbi baforoma neentina. Ngilokho akwenza kiwo woke amadorobho wama-Amoni. Ekugcineni uDavida nawo woke amasotja babuyela eJerusalema.
Imitlolo Ephasi
^ Namkha “uyasidlulisa.”
^ Livela ebizweni lesiHebheru elitjho “Ukuthula.”
^ Kutjho ukuthi “Othandwa nguJah.”
^ Kungaqalisela endaweni ephakela idorobho ngamanzi.
^ Italende beyilingana namakhilogremu ayi-34.2. Qala Isith. B14.
