USamyela Wesibili 5:1-25
5 Ngokukhamba kwesikhathi, zoke iinkoro zakwa-Israyeli zeza kuDavida eRhebroni+ zathi: “Qala! Silithambo lakho nenyamakho.*+
2 Esikhathini esidlulileko lokha uSawula ayikosethu, nguwe ebewudosa phambili ama-Israyeli emajimenawo.+ UJehova wathi kuwe: ‘Uzokwalusa abantu bami u-Israyeli begodu uzokuba mdosiphambili kwa-Israyeli.’”+
3 Nje-ke boke abadala bakwa-Israyeli beza ekosini eRhebroni begodu iKosi uDavida yenza isivumelwano nabo+ eRhebroni phambi kwakaJehova. Ngemva kwalokho bazesa uDavida bona abe yikosi kwa-Israyeli.+
4 UDavida waba yikosi aneminyaka ema-30 begodu wabusa iminyaka ema-40.+
5 ERhebroni wabusa kwaJuda iminyaka elikhomba neenyanga ezisithandathu, wabusa eJerusalema+ iminyaka ema-33 phezu kwaka-Israyeli woke noJuda.
6 Nje-ke ikosi nabantu bayo baya eJerusalema bayokusahlela amaJebusi+ ebekahlala lapho. Anyefula uDavida athi: “Angeze wangena la! Ngitjho neemphofu nabarholopheleko bazokuqotha.” Bewacabanga ukuthi uDavida angeze angena lapho.+
7 Nanyana kunjalo, uDavida wathumba isiphephelo seZiyoni, okuliDorobho lakaDavida nje.+
8 Mhlokho uDavida wathi: “Labo abasahlela amaJebusi kufuze bangene ngomsele wamanzi bayokurhayila ‘abarholopheleko neemphofu,’ abahloya uDavida!” Kungebangelo kuthiwa: “Iimphofu nabarholopheleko angeze bangene ngendlini.”
9 Ngemva kwalokho uDavida wahlala endaweni yesiphephelo begodu beyibizwa ngokuthi yiDorobho lakaDavida;* uDavida wathoma ukwakha amaboda neminye imakhiwo eNdundumeni*+ nakwezinye iindawo edorobheni.+
10 Yeke uDavida waba namandla khulu+ begodu uJehova uZimu wamabutho bekanaye.+
11 URhiramu ikosi+ yeTirosi wathumela iinthunywa kuDavida neengodo zomsedari,+ abantu abasebenza ngeengodo nabakha ngamatje* bonyana bayokwakha amaboda, yeke bathoma ukwakhela uDavida indlu.*+
12 UDavida bekazi bona uJehova udzimelelise ubukhosi bakhe kwa-Israyeli+ bewaphakamisa nombuswakhe+ ngebanga labantu bakaZimu u-Israyeli.+
13 UDavida wathatha amakhohlo+ nabafazi abanye godu eJerusalema ngemva kokuthi abuye eRhebroni, wabelethelwa amadodana namadodakazi amanengi.+
14 Naka amagama walabo abelethelwa bona eJerusalema: NguTjhamuwa, uTjhobabi, uNathani,+ uSolomoni,+
15 uJibirhari, u-Elitjhuwa, uNefegi, uJafiya,
16 u-Elitjhama, u-Eliyada no-Elifelethi.
17 Kwathi amaFilista nakezwa ukuthi uDavida uzeswe bona abe yikosi ka-Israyeli,+ akhuphuka woke ayokufuna uDavida.+ UDavida nakezwa ngalokho, wehlela endaweni yesiphephelo.+
18 Yeke amaFilista angena arhatjheka emRhobeni wamaRafa.+
19 UDavida wabuza uJehova,+ wathi: “Ngikhuphuke ngiyokulwa namaFilista na? Uzowanikela esandleni sami?” UJehova wamphendula wathi: “Khuphuka ngombana nakanjani ngizowanikela esandleni sakho.”+
20 Yeke uDavida waya eBhali-Peratsimu, wawarhayila lapho. Ngalokho wathi: “UJehova uhlule amanabami phambi kwami,+ njengeboda eligirizwe mamanzi.” Kungebangelo abiza indawo leyo ngokuthi yiBhali-Peratsimu.*+
21 AmaFilista atjhiya abozimu bawo lapho begodu uDavida nabantu bakhe babasusa.
22 Ngemva kwesikhathi esithileko, amaFilista akhuphuka godu, arhatjheka emRhobeni wamaRafa.+
23 UDavida wabuza uJehova kodwana wamphendula wathi: “Ungakhuphukeli kiwo ngokunqophileko. Kunalokho, bhoda ngemva kwawo, uwasahlele phambi kwamahlathi webhakha.
24 Kuzakuthi nawuzwa itjhada lokumatjha ngehla kwamahlathi webhakha, wenze msinyana ngombana uJehova uzabe sekakukhambele phambili bona arhayile ibutho lamaFilista.”
25 Yeke uDavida wenza njengombana uJehova amyalile, warhayila amaFilista+ kusukela eGeba+ kufikela eGezeri.+
Imitlolo Ephasi
^ Namkha “Siziinhlobo zakho zeengazi.”
^ Namkha kungenzeka “nguye owayithiya njalo.”
^ Namkha “iMilo.” Libizo lesiHebheru elitjho “ukugcwala.”
^ Namkha “isigodlo.”
^ Namkha “abakhi bamaboda.”
^ Kutjho ukuthi “IKosi Yokurabhalalisa.”
