AmaRhubo 5:1-12
Kumnqophisi weNerhilothi.* Ingoma kaDavida.
5 Maye! Jehova,+ lalela amezwami;Tjheja ukububula kwami.
2 Tjheja ukulilela kwami isizo,Maye! Kosami, Zimami, ngombana ngithandaza kuwe.
3 Maye! Jehova, uzokuzwa ilizwi lami ekuseni;+Ekuseni ngizokutjela okungitshwenyako,+ ngilinde ngerhuluphelo.
4 Ngombana awusinguZimu othatjiswa yikohlakalo;+Akunamuntu omumbi ongahlala nawe.+
5 Akunamuntu ozikhakhazisako ongajama phambi kwakho.
Ubahloyile boke abakhohlakeleko;+
6 Uzobabhubhisa abaleya amala.+
UJehova uyabanyenya abantu abanenturhu nabakhohlisako.*+
7 Kodwana mina ngizokungena ngendlinakho+ ngebanga lobukhulu bethando lakho elithembekileko;+Ngizokukhothama ngehlonipho phambi kwethempeli lakho elicwengileko.*+
8 Maye! Jehova, nginqophisa ngokulunga kwakho ngebanga lamanabami;Ngisusela iinqabo endlelenakho.+
9 Ngombana ayikho nayinye into abayitjhoko engathenjwa;Ngaphakathi kwabo kuvinyilika okulimazako kwaphela;Imiphimbabo ilithuna elivulekileko;Bayatshima ngelimi labo.*+
10 Kodwana uZimu uzokuthi bamlandu;Amanwabo ngiwo azobawisa.+
Kwanga bangaqothwa ngebanga lemitjhaphwabo eminengi,Ngombana bakuhlubukile.
11 Kodwana boke abaphephela kuwe bazokuthaba;+Bazokuhlala barhuwelela ngethabo.
Uzobavikela,Begodu labo abathanda igama lakho bazokuthaba ngebanga lakho.
12 Ngombana Jehova uzokubusisa nanyana ngubani olungileko;Uzobambesa ngomusakho njengokungathi ngesihlangu esikhulu.+
Imitlolo Ephasi
^ Qala Ihlathululo.
^ Namkha “uyamnyenya umuntu ophalaza iingazi nokhohlisako.”
^ Namkha “kwendawakho ecwengileko.”
^ Namkha “Basebenzisa ilimi elitjhelelako.”
