Eksodusi 10:1-29
10 UJehova wathi kuMosi: “Tjhinga kuFaro, ngombana yena neensebenzi zakhe basesenekani,+ ngibalise banjalo ukwenzela bona uFaro abone iimangaliso engizozenza phambi kwakhe,+
2 khona nani nizakutjela amadodanenu neenzukulwana zenu ukuthi ngayijezisa njani iGibhide, niwatjele nangeemangaliso engazenza khona+ begodu nizokwazi ukuthi nginguJehova.”
3 Nje-ke uMosi no-Aroni baya kuFaro bathi kuye: “UJehova uZimu wamaHebheru uthi, ‘Uzokwala ukuzithoba kimi bekube kunini?+ Khambisa abantu bami ukwenzela bona bangilotjhe.
4 Ngombana nawala ukukhambisa abantu bami, ngizokuletha iintethe enarhenakho kusasa.
5 Zizokuzala enarheni yoke kangangobana angekhe nisakghona ukubona phasi. Zizokudla okungakhenge kubethwe sinanja bezidle nayo yoke imithi.+
6 Zizokuzala ngeendlini zakho, ngeendlini zeensebenzi zakho nangeendlini zayo yoke iGibhide ngezinga elikhulu, aboyihlo naboyihlomkhulu abangakhenge khebalibone kusukela ngesikhathi basenarheni le bekube kunamhlanjesi.’”+ Khonokho wasuka kuFaro.
7 Iinsebenzi zakaFaro zathi kuye: “Kuzabe kube kunini umuntu lo asolo asifaka engozini?* Khambisa abantwaba bona bayokulotjha uJehova uZimabo. Awuboni na ukuthi iGibhide seyonakele?”
8 Nje-ke uMosi no-Aroni babuyiselwa kuFaro, wathi kibo: “Khambani niyokulotjha uJehova uZimenu. Alo bobani abakhambako?”
9 UMosi wathi: “Sizokukhamba nabantu abatjha, abantu abadala, amadodanethu, amadodakazethu, izimvu zethu neenkomo zethu+ ngombana siyokugidinga umnyanya kaJehova.”+
10 Wathi kibo: “Nange nginganivumela bona nikhambe nabantwabenu, kuzakutjho bona uJehova unani!+ Kuyabonakala ukuthi nihlose ukwenza okumbi.
11 Awa, akukhambe amadoda kwaphela bona ayokulotjha uJehova ngombana ngilokho enikubawileko.” Khonokho baqothwa phambi kwakaFaro.
12 UJehova wathi kuMosi: “Lulela isandla sakho phezu kwenarha yeGibhide bona kube neentethe, zizokukhithikela phezu kwenarha yeGibhide, zidle zoke iintjalo zenarheni nakho koke okutjhiywe sinanja.”
13 Khonokho uMosi welulela intongakhe phezu kwenarha yeGibhide, uJehova wenza bona umoya wepumalanga uvunguze enarheni leyo ilanga loke nobusuku boke. Kwaba sekuseni, umoya wepumalanga waletha iintethe.
14 Iintethe zakhithikela enarheni yoke yeGibhide zazala isifunda soke seGibhide.+ Bezizinengi khulu;+ akhenge khekube neentethe ezinengi kangaka begodu angekhe zisaba khona.
15 Zakhithikela enarheni yoke, inarha yabanzima, zadla zoke iintjalo enarheni, iinthelo ezitjhiywe sinanja, akunalitho elihlaza elasalako emithini namkha eentjalweni zommango enarheni yoke yeGibhide.
16 Nje-ke uFaro warhaba wabiza uMosi no-Aroni wathi: “Ngonile kuJehova uZimenu nakini.
17 Ngibawa ningilibalele, nincenge uJehova uZimenu bona asuse isibetho esibulalakwesi kimi.”
18 Nje-ke uMosi wasuka kuFaro wakhamba wayokuncenga uJehova.+
19 UJehova wenza bona kube nomoya, kwaba mumoya onamandla wetjingalanga waphephula iintethe wayozilahlela ngeLwandle eliBomvu. Ayikho nayinye eyasalako kiso soke isifunda seGibhide.
20 Nanyana kunjalo, uJehova wavumela uFaro bona abe nekani+ begodu uFaro akhenge akhambise ama-Israyeli.
21 UJehova wathi kuMosi: “Lulela isandla sakho ezulwini ukwenzela bona kube nzima enarheni yeGibhide, kwaba nzima tshu.”
22 Khonokho uMosi walulela isandla sakhe ezulwini, kwaba nzima tshu enarheni yeGibhide amalanga amathathu.+
23 Bebangakghoni ukubonana begodu bangakghoni ukuya ndawo amalanga amathathu kodwana la bekuhlala khona ama-Israyeli bekukhanya.+
24 UFaro wabiza uMosi wathi: “Khambani niyokulotjha uJehova.+ Kodwana izimvu zenu neenkomo zenu kufuze zisale. Ningakhamba ngitjho nabantwabenu.”
25 Kodwana uMosi wathi: “Sivumela bona sithathe iinlwana zethu siyokwenzela ngazo uJehova uZimethu imihlatjelo neminikelo etjhiswako.+
26 Sizokukhamba nefuywethu. Asikho nasinye isilwana esizokusala ngombana sizokusebenzisa ezinye zazo bona silotjhe uJehova uZimethu begodu asazi ukuthi ngisiphi esizokunikela ngaso nasilotjha uJehova, sizokubona nasifika lapho.”
27 Nje-ke uJehova wavumela uFaro bona abe nekani begodu akhenge avumele abantu bona bakhambe.+
28 UFaro wathi kuye: “Suka kimapha! Ungasabuya, nange ungabuya uzokufa.”
29 UMosi wathi: “Njengombana ukhulumile, angekhe ngisabuya.”
Imitlolo Ephasi
^ NgesiHebheru, “asithiyo kithi?”
