Eksodusi 36:1-38
36 “UBhetsaleli uzokusebenza no-Oholiyaba namadoda uJehova awenze ahlakanipha begodu azwisisa, ukwenzela bona azi ukuthi angawenza njani umsebenzi ocwengileko njengombana uJehova ayalile.”+
2 Nje-ke uMosi wabiza uBhetsaleli no-Oholiyaba namadoda anekghono lawo uJehova awaphe ukuhlakanipha+ nabo boke ebebafuna ukwenza umsebenzi.+
3 Bathatha yoke iminikelo+ ama-Israyeli ebewayiletha emsebenzini ocwengileko. Abantu bebaragela phambili baletha iminikelo esuka ehliziyweni qobe ekuseni.
4 Ngemva kobana bathomile ukwenza umsebenzi ocwengileko, zoke iinsebenzi ezinekghono bezifika zilandelana,
5 zathi kuMosi: “Abantu baletha izinto ezinengi ezingaphezu kwezitlhogekako bona kwenziwe umsebenzi uJehova ayale bona wenziwe.”
6 Nje-ke uMosi wayala bona kwenziwe isaziso kiyo yoke ikampa, esithi: “Ningasaletha izinto zomnikelo ocwengileko.” Abantu bakhandelwa ukuletha ezinye izinto.
7 Izinto bezanele bona zenze woke umsebenzi, kuhlekuhle bezingaphezu kwezitlhogekako.
8 Nje-ke zoke iinsebenzi ezinekghono+ zenza ithaberinakeli+ ngamatjhila alitjhumi welineni elisezingeni eliphezulu, ngerhara ehlaza komkayi, iwulu esipiridzana nangetjhila elibomvu be, wawakghabisa* ngokuthungelela amakherubhi kiwo.+
9 Itjhila ngalinye belimakhubhithi* ama-28 ubude begodu limakhubhithi amane ububanzi. Woke amatjhila la bewalingana.
10 Ngemva kwalokho, wahlanganisa amatjhila amahlanu lawo aba litjhila linye begodu wahlanganisa amanye amahlanu aba litjhila linye.
11 Ngemva kwalokho wenza iinrhobelo ngerhara ehlaza komkayi emaphethelweni wetjhila linye elikhulu lapha lizokuhlangana khona nelinye. Wenza okufanako nakwelinye itjhila elikhulu lapha lizokuhlangana khona nelinye.
12 Wenza iinrhobelo ezima-50 ngakwelinye itjhila, wenza nezinye ezima-50 emaphethelweni welinye ukwenzela bona lapha ahlangana khona iinrhobelo ziqalane.
13 Ekugcineni wenza iinghamelo zegolide ezima-50, wahlanganisa ngazo amatjhila lawo ukwenzela bona ithaberinakeli libe yinto yinye.
14 Ngemva kwalokho wenza amatjhila ali-11 ngoboya bembuzi bona kugutjuzeswe ithaberinakeli ngawo.+
15 Itjhila ngalinye belimakhubhithi* ama-30 ubude begodu limakhubhithi amane ububanzi. Woke amatjhila ali-11 la bewalingana.
16 Nje-ke wahlanganisa amatjhila amahlanu aba yinto eyodwa, wahlanganisa namanye asithandathu aba yinto eyodwa.
17 Ngemva kwalokho wenza iinrhobelo ezima-50 emaphethelweni wetjhila elikhulu lapha lihlangana khona nelinye, wenza nezinye iinrhobelo ezima-50 emaphethelweni welinye itjhila lapha lihlangana khona nelinye.
18 Wenza neenghamelo zekhopha ezima-50 bona zihlanganise itende libe yinto yinye.
19 Wenza isigubuzeso setende ngeenkhumba zamaramu ezidaywe ngokubomvu, ngaphezu kwaso wenza nesigubuzeso ngeenkhumba zesili.*+
20 Ngemva kwalokho, wenza amafremu wethaberinakeli ngomuthi womunga+ ajama anqopha.+
21 Ifremu ngayinye beyimakhubhithi alitjhumi ukuphakama, ilikhubhithi nesiquntu ububanzi.
22 Ifremu ngayinye beyineentlobo ezimbili ezihlanganiswe ndawonye. Wawenza njalo-ke woke amafremu wethaberinakeli.
23 Wenza amafremu ama-20 ngehlangothini elingesewula yethaberinakeli.
24 Ngemva kwalokho, wenza iinsekelo zesiliva ezima-40 bona zibe ngaphasi kwamafremu ama-20, iinsekelo ezimbili zibe ngaphasi kwefremu yinye, bona iintlobo zawo ezimbili zingene emigojaneni emibili yeensekelo.+
25 Ngehlangothini langetlhagwini lethaberinakeli wenza amafremu ama-20
26 neensekelo zawo zesiliva ezima-40, iinsekelo ezimbili zaba ngaphasi kwefremu yinye, wenza okufanako nakwamanye amafremu.
27 Ingcenye engemuva yethaberinakeli ukuya ngetjingalanga, wenza amafremu asithandathu.+
28 Wenza amafremu amabili bona abe ziinsika zethaberinakeli emakhoneni amabili angemva.
29 Iinsikezo bezikhamba ngazimbili kusukela phasi beziyokufika phezulu esongweni lokuthoma. Wazenza njalo-ke iinsika ezimbili zemakhoneni.
30 Nasele zizoke, kwaba mafremu abunane neensekelo zawo zesiliva ezili-16, iinsekelo ezimbili zaba ngaphasi kwefremu ngayinye.
31 Ngemva kwalokho, wenza iinqabo ngomuthi womunga, iinqabo ezihlanu ezizokuhlanganisa amafremu ngakwelinye ihlangothi lethaberinakeli+
32 wenza nezihlanu zamafremu wangehlangothini elinye lethaberinakeli, wenza nezihlanu zamafremu wangemuva kwethaberinakeli ukuya ngetjingalanga.
33 Wenza nesiqabo esiphakathi esizokukhamba phakathi kwamafremu emahlangothini amathathu wethaberinakeli.
34 Wanameka amafremu ngegolide, wenza amasongo ngegolide bona abambe iinqabo begodu wanameka iinqabo ngegolide.+
35 Wenza irharideni+ ngerhara ehlaza komkayi, ngewulu esipiridzana, ngetjhila elibomvu be nangelineni elisezingeni eliphezulu. Walikghabisa ngokuthungelela amakherubhi kilo.+
36 Walenzela iinsika ezine ngomuthi womunga, wazinameka ngegolide, wanameka namawugu wazo ngegolide, wenzela iinsikezi imigojana emine yeensekelo zesiliva.
37 Ngemva kwalokho, wenza irharideni ebungenweni betende, walenza ngerhara ehlaza komkayi, ngewulu esipiridzana, ngetjhila elibomvu be nangelineni elisezingeni eliphezulu,+
38 walenzela neensika ezihlanu namawugwalo. Walinameka phezulu nemasongweni ngegolide kodwana iinsekelo zalo ezihlanu bekungezekhopha.
Imitlolo Ephasi
^ Kungenzeka kuqaliselwe kuBhetsaleli.
^ Ikhubhithi belilingana namasentimitha ayi-44.5. Qala Isith. B14.
^ Ikhubhithi belilingana namasentimitha ayi-44.5. Qala Isith. B14.
^ Isili silwana esihlala emanzini.
