Hezekiyeli 10:1-22
10 Njengombana ngiqalile, ngabona ngaphezu komkayi ebewuphezu kweenhloko zamakherubhi okuthileko okunjengelitje lesafire kuvela ngaphezu kwazo, ukuqaleka kwayo bekufana nesihlalo sobukhosi.+
2 Nje-ke wathi endodeni embethe ilineni:+ “Ngena ngaphakathi kwamavili,+ ngaphasi kwamakherubhi begodu uzalise izandla zakho zombili ngamalahle avuthako+ hlangana namakherubhi begodu uwaphosele phezu kwedorobho.”+ Yeke wangena njengombana ngiqalile.
3 Amakherubhi bewajame ngehlangothini lesidla lendlu lokha indoda nayingenako begodu ilifu lagubuzesa isirhodlo esingaphakathi.
4 Iphazimulo kaJehova+ yakhuphuka ukusuka emakherubhini ukuya ebungenweni bomnyango wendlu, indlu kancanikancani yagubuzeswa lilifu+ begodu isirhodlo besizele ukukhanya kwephazimulo kaJehova.
5 Itjhada lamaphiko wamakherubhi belizwakala esirhodlweni esingaphandle, njengetjhada lakaZimu uMninimandla Woke nakakhulumako.+
6 Nje-ke wayala indoda ebeyimbethe ilineni, wathi: “Thatha umlilo ohlangana namavili, ohlangana namakherubhi” ngemva kwalokho wangena wajama hlanu kwamavili.
7 Nje-ke elinye lamakherubhi lalulela isandla salo eduze nomlilo ebewuhlangana kwamakherubhi.+ Lathatha omunye begodu lawubeka ezandleni zombili zaloyo obekambethe isambatho selineni,+ yena wawuthatha waphumela ngaphandle.
8 Amakherubhi bewanokuthileko okuqaleka njengezandla zomuntu ngaphasi kwamaphikwawo.+
9 Njengombana ngiqalile, ngabona amavili amane hlanu kwamakherubhi, ivili linye belihlanu kwekherubhi ngalinye begodu amavili bewaqaleka njengokuphazima kwelitje lekhrisolithe.+
10 Indlela ebewaqaleka ngayo, womane bewafana, bewaqaleka ngathi livili ngaphakathi kwelinye ivili.
11 Nakakhambako bekangaya nanyana kukuphi eengcenyeni ezine ngaphandle kokujika begodu bekangaya nanyana kukuphi lapho ihloko iya khona ngaphandle kokujika.
12 Imizimbazo yoke, imihlanazo, izandla zazo, amaphikwazo namavili, nawo woke amavilazo womane, bewazele amehlo yoke indawo.+
13 Malungana namavili, ngezwa ilizwi eliwabizako, “Msebenzi wamavili!”
14 Ngalinye* belinobuso obune. Ubuso bokuthoma bekububuso bekherubhi, ubuso besibili bekububuso bomuntu, ubuso besithathu bekububuso bebhubezi begodu ubuso bobune bekububuso bekhozi.+
15 Amakherubhi bewaphakama, bewazimbunjwa eziphilako engazibona emlanjeni iKebari,+
16 Bekuthi lokha amakherubhi nawakhambako, amavili nawo bewakhamba hlanu kwawo; lokha amakherubhi nawaphakamisa amaphikwawo bona abe ngaphezu kwephasi, amavili bewangajiki namkha atjhide hlanu kwawo.+
17 Nazijamako, nawo bewajama; naziphakamako bewasikima kunye nazo ngombana ummoya ebewusembunjweni eziphilako bewunazo.
18 Nje-ke iphazimulo kaJehova+ yasuka ebungenweni bomnyango wendlu begodu yajama phezu kwamakherubhi.+
19 Amakherubhi aphakamisa amaphikwawo begodu aphakama ephasini njengombana ngiqalile. Amavili bewahlanu kwawo lokha nawasukako. Ajama ebungenweni besango lendlu kaJehova begodu iphazimulo kaZimu ka-Israyeli beyiphezu kwawo.+
20 Bekazimbunjwa eziphilako engizibone ngaphasi kwakaZimu ka-Israyeli emlanjeni iKebari,+ ngabona lapho ukuthi makherubhi.
21 Womane njalo bewanobuso obune, amaphiko amane nokuthileko okuqaleka njengezandla zomuntu ngaphasi kwamaphikwawo.+
22 Begodu ukuqaleka kobuso bawo bebunjengobuso engabubona hlanu komlambo iKebari.+ Woke bewakhamba anqophe.+
Imitlolo Ephasi
^ Kutjho ekherubhini ngalinye.
