Hezekiyeli 35:1-15
-
Isiphorofido ngokujamelene neentaba zeSeyiri (1-15)
35 Ilizwi lakaJehova lafika kimi godu, lathi:
2 “Ndodana yomuntu, qalisa ubuso bakho esifundeni seentaba seSeyiri,+ uphorofide ngokujamelene naso.+
3 Ithi kiso, ‘Nakhu iKosi ePhakemeko uJehova ekutjhoko: “ Maye! Sifunda seentaba zeSeyiri, qala! Ngijamelene nawe, ngizokululela isandla sami ngokujamelene nawe, ngikwenze inarha enganalitho, emarubhi.+
4 Ngizokwenza amadorobhakho abe marubhi, uzokuba yinarha enganalitho emarubhi+ begodu kuzokufuze wazi ukuthi nginguJehova.
5 Ngombana wena utjengise ubutha obungapheliko,+ wanikela ama-Israyeli esabuleni ngesikhathi sehlekelelabo, ngesikhathi sokujeziswa kwabo kokugcina.”’+
6 “‘Nje-ke nangisaphilako,’ kutjho iKosi ePhakemeko uJehova, ‘Ngizokulungiselela ukuphalaka kweengazi, ukuphalaka kweengazi kuzokugijimisa.+ Ngombana bekuziingazi ozihloyileko, ukuphalaka kweengazi kuzokugijimisa.+
7 Ngizokwenza isifunda seentaba seSeyiri inarha enganalitho emarubhi,+ ngizokususa kiyo nanyana ngubani odlulako nobuyela kiyo.
8 Ngizokuzalisa iintaba zayo ngababuleweko; ababulewe ngesabula bazokuwela ngemibundwinakho, emirhobenakho nakiyo yoke imilanjanakho.
9 Ngizokutjhabalalisa ngokupheleleko, amadorobhakho angekhe asaba nezakhamuzi+ begodu kuzokufuze wazi ukuthi nginguJehova.’
10 “Ngombana uthe, ‘Iintjhabezi zombili neenarhezi zombili zizokuba ngezami begodu sizozithatha zombili,’+ ngitjho nanyana uJehova ngokwakhe bekalapho,
11 ‘nje-ke nangisaphilako,’ kutjho iKosi ePhakemeko uJehova, ‘Ngizokuphatha ngendlela efana nelaka, umona nehloyo obe nayo kibo;+ ngizozenza ngaziwe phakathi kwabo nangikwahlulelako.
12 Kuzokufuze nazi ukuthi mina, Jehova, ngizizwe zoke izinto enizikhulume ngokudelela eentabeni zakwa-Israyeli nanithi, “Batjhatjalalisiwe begodu banikelwe kithi bona sibarhiribidele.”*
13 Ukhulume ngokuzikhakhazisa ngokujamelene nami begodu wandisa amezwakho ngokujamelene nami.+ Ngiwezwe woke.’
14 “Nakhu iKosi ePhakemeko uJehova ekutjhoko: ‘Iphasi loke lizokuthaba nangikwenza inarha enganalitho, emarubhi.
15 Njengombana bewuthabile lokha ilifa lakwa-Israyeli nalitjhatjalaliswako, ngizokwenza ngendlela efanako nangawe.+ Uzokuba lirubhi elinganalitho, maye! Sifunda seentaba seSeyiri, iye, woke u-Edomu;+ kuzokufuze azi ukuthi nginguJehova.’”
Imitlolo Ephasi
^ NgesiHebheru, “njengokudla.”
