IsAmbulo Esiya KuJwanisi 7:1-17
7 Ngemva kwalokhu ngabona iingilozi ezine zijame emagumbini amane wephasi, zibambe zaqinisa imimoya emine yephasi ukuthi kungabi nomoya ovunguzako ephasini namkha elwandle namkha kinanyana ngimuphi umuthi.
2 Ngabona enye ingilozi ikhuphuka ivela epumalanga, iphethe itshwayo lakaZimu ophilako; yarhuwelela ngelizwi elikhulu eengilozini ezine ebezinikelwe bona zilimaze iphasi nelwandle,
3 ithi: “Ningalimazi iphasi namkha ilwandle namkha imithi, bekube kulapho sibeke itshwayo+ eempandla zeenceku zakaZimethu.”+
4 Ngezwa nenani lalabo ababekwa itshwayo, abazii-144 000,+ abatshwaywe bavela kizo zoke iinkoro zabantwana bakwa-Israyeli:+
5 Ekorweni kaJuda bebazii-12 000 ababekwa itshwayo;ekorweni kaRubeni bebazii-12 000;ekorweni kaGadi bebazii-12 000;
6 ekorweni ka-Atjheri bebazii-12 000;ekorweni kaNafitali bebazii-12 000;ekorweni kaManase+ bebazii-12 000;
7 ekorweni kaSimiyoni bebazii-12 000;ekorweni kaLevi bebazii-12 000;ekorweni ka-Isakari bebazii-12 000;
8 ekorweni kaZebuloni bebazii-12 000;ekorweni kaJosefa bebazii-12 000;ekorweni kaBhenjamini bebazii-12 000 ababekwa itshwayo.
9 Ngemva kwalokhu ngabona isiqubuthu esikhulu, obekunganamuntu obekangakghona ukusibala, sivela kizo zoke iintjhaba, iinkoro, abantu namalimi,+ sijame phambi kwesihlalo sobukhosi naphambi kweMvana, simbethe iimphuraphura ezimhlophe;+ siphethe neempande zomuthi wesundu ezandleni zaso.+
10 Besisolo sirhuwelela ngelizwi elikhulu, sithi: “Isindiso ivela kuZimethu, ohlezi esihlalweni sobukhosi+ neMvaneni.”+
11 Zoke iingilozi bezijame zibhode isihlalo sobukhosi nabadala+ neembunjwa eziphilako ezine, bakhothama ubuso buqale phasi phambi kwesihlalo sobukhosi begodu balotjha uZimu,
12 bathi: “Amen! Idumo nephazimulo nokuhlakanipha nokuthokoza nehlonipho namandla nobukghoni akube kuZimethu ngokungapheliko.+ Amen.”
13 Nakaphendulako omunye wabadala wathi kimi: “Laba abambethe iimphuraphura ezimhlophe,+ babobani begodu bavelaphi?”
14 Khonokho ngathi kuye: “Kosami, nguwe owaziko.” Wathi kimi: “Laba ngilabo abavela esizini elikhulu,+ bahlanze iimphuraphura zabo, bazenza zaba mhlophe ngeengazi zeMvana.+
15 Kungebangelo baphambi kwesihlalo sobukhosi sakaZimu, banikela kuye umsebenzi ocwengileko ubusuku nemini ethempelini lakhe begodu loyo ohlezi esihlalweni sobukhosi+ uzokululela itendakhe phezu kwabo.+
16 Angekhe basalamba namkha bome godu, angekhe basatjhiswa lilanga namkha nginanyana ngikuphi ukutjhisa okurhabulako+
17 ngombana iMvana,+ ephakathi kwesihlalo sobukhosi, izobelusa,+ ibanqophisele emithonjeni yamanzi wokuphila.+ UZimu uzokusula zoke iinyembezi emehlwenabo.”+
