Isaya 33:1-24
33 Maye! Kuwe, wena otjhabalalisako ongakatjhatjalaliswa;+Wena okghaphelako ongakakghatjelwa!
Nawuqeda ukutjhabalalisa, uzokutjhatjalaliswa.+
Nawuqeda ukukghaphela, uzokukghatjhelwa.
2 Maye! Jehova yiba nomusa kithi.+
Sithembele kuwe.
Yiba mkhonwethu*+ qobe ekuseni,Isindiswethu ngesikhathi sokugandeleleka.+
3 Iintjhaba ziyabaleka nazizwa itjhada elikhulu.
Lokha nawusikimako, iintjhaba ziyaphadlhalala.+
4 Njengombana iintethe ezirhiribidelako zihlangana, izinto zakho ozifumene epini zizokuhlangana;Abantu bazokugijimela kizo njengesikhonyani.
5 UJehova uzokuphakanyiswa,Ngombana uhlala endaweni ephakemeko.
Uzokuzalisa iZiyoni ngobulungiswa nokulunga.
6 Nguye okuvikelako ngeenkhathi zoke;Isindiso ekulu,+ ukuhlakanipha, ilwazi nokusaba uJehova+Lokhu ligugu lakhe.
7 Qala! Abantu babo abanamandla bayalila eendleleni;Iinthunywa zokuthula zilila kabuhlungu.
8 Iindlela ezikulu zilahliwe;Akunamuntu okhamba eendleleni.
Uphule* isivumelwano;Wale amadorobho;Akanandaba nomuntu.+
9 Inarha idane kabuhlungu* begodu iyatjhwaba.
ILibhanoni iphethwe ziinhloni;+ iyatjhabalala.
ITjharoni ibe njengerhalawumba,IBhatjhani neKarameli ithintitha amakarayo.+
10 “Nje-ke ngizokuthatha igadango,” kutjho uJehova,“Ngizoziphakamisa;+Ngizoziphazimulisa.
11 Uzithwala utjani obomileko bese ubeletha umhlanga.
Ummoyakho uzokutjhabalalisa njengomlilo.+
12 Iintjhaba zizokuba njengomlotha.*
Njengameva aquntiweko, zizokuthungelwa ngomlilo.+
13 Nina enikude, lalelani ukuthi ngizokwenzani!
Nina eniseduze, bonani amandlami!
14 Izoni zeZiyoni zithukiwe;+Iinhlubuki ziyahlengezela:
‘Ngubani kithi ongahlala lapho kunomlilo otjhabalalisako?+
Ngubani kithi ongahlala namalangabi angacimekiko?’
15 Ngiloyo ohlala akhamba ngokulunga,+Okhuluma okulungileko,+Owala inzuzo engakathembeki, neyikohliso,Ongavumeli izandla zakhe zithathe isifumbathiso,+Ovala iindlebe zakhe ekulumweni yokuphalaza iingazi,Ovala amehlwakhe bona angaboni okumbi
16 Uzokuhlala eendaweni eziphakemeko;Isiphephelo sakhe sizokuba hlangana namadwala okubudisi ukufika kiwo,Uzokunikelwa uburotho,Begodu amanzakhe angeze aphele.”+
17 Amehlwakho azokubona ikosi ephazimulwenayo;Azokubona inarha ekude.
18 Ihliziywakho izokuzindla ngezinto ezithusako:
“Uphi unobhala?
Uphi okale umthelo?+
Uphi obale imibhotjhongo?”
19 Angeze usasibona isitjhaba esidelelako,Isitjhaba esikhuluma ilimi okubudisi ukulizwisisa,Isitjhaba esingunguzako ongeze wasizwisisa.+
20 Qala iZiyoni, idorobho leminyanyethu!+
Amehlwakho azokubona iJerusalema njengendawo yokuhlala enokuthula,Itende engeze lasuswa.+
Iinkhonkhwani zetendalo angeze zatsonyulwa,Neentambo zalo angeze zadatjulwa.
21 Kodwana lapho uJehova onaMandla,Uzokuba njengesifunda semilambo, imisele ebanzi,Lapho imikhumbi yepi engekhe iye khonaNemikhumbi emikhulu engeze idlule khona.
22 UJehova ungumaHlulelethu,+UJehova nguye osinikela umThetho,+UJehova uyiKosethu;+Nguye ozosisindisa.+
23 Iintambo zakho zizokugedla;Angeze zikghone ukubamba ipala namkha zithabalalise iseyili.
Ngesikhatheso, izinto ezinengi ezifunyenwe epini zizokuhlukaniswa;Ngitjho norholopheleko uzokuthatha izinto ezinengi ezifunyenwe epini.+
24 Asikho isakhamuzi esizokuthi: “Ngiyagula.”+
Abantu abahlala enarheni bazabe balitjalelwe umtjhaphwabo.+
Imitlolo Ephasi
^ Namkha “amandlethu.”
^ Kuqaliselwe enabeni.
^ Namkha kungenzeka “iyoma.”
^ NgesiHebheru, “umlotha wepembe.” Iputjhana emhlophe ebakhona nakutjhiswa izinto ezifana nelitje elithambileko, ikhorali, amathambo namkha amaqephe. NgesiNgisi yi-lime.
