Isaya 42:1-25
42 Qala! Isisebenzi sami+ engisisekelako!
Okhethiwekwami,+ engithabileko ngaye!+
Ngibeke ummoyami kuye;+Uzokuletha ubulungiswa eentjhabeni.+
2 Angekhe arhuwelele namkha aphakamise ilizwi lakhe,Angekhe enze ilizwi lakhe lizwakale endleleni.+
3 Akunamhlanga ophukileko azowuphula,Nesibani esififiyelako azosicima.+
Uzokuletha ubulungiswa ngokuthembeka.+
4 Angekhe aphelelwe mamandla namkha aphuke ummoya bekube kulapho adzimelelisa ubulungiswa ephasini;+Neenhlengele zizokusolo zilindele umthethwakhe.
5 UZimu weqiniso uJehova,UMdali wezulu noZimu omKhulu olilulako,+Loyo owendlala iphasi nomkhiqizwalo,+Loyo owenza abantu abakilo baphefumule+Begodu opha abantu abakhamba kilo ummoya, uthi:+
6 “Mina Jehova ngikubizele ekulungeni;Ngikubambe ngesandla sakho.
Ngizokuvikela, ngizokunikela njengesivumelwano ebantwini+Nanjengokukhanya eentjhabeni,+
7 Bona uvule amehlo angaboniko,+Ukhuphe isibotjhwa emgodini omnyamaNalabo abahlezi ebumnyameni ejele.+
8 NginguJehova. Ngilelo igama lami;Angekhe nginikele muntu iphazimulwami,*
Namkha nginikele iinthombe ezibaziweko idumo lami.+
9 Qala izinto zokuthoma zidlulile;Nje ngimemezela izinto ezitja.
Ngaphambi kobana zivele, nginitjela ngazo.”+
10 Bhinelani uJehova ingoma etja,+Indumiswakhe kusukela emaphethelweni wephasi,+Nina enehlela elwandle nakho koke okukilo,Nina nhlengele nokuhlala kizo.+
11 Ummango namadorobhawo akuphakamise iphimbo lawo,+Iindawo zokuhlala lapho kuhlala khona iKedari.+
Izakhamuzi zerholweni azirhuwelele ngethabo;Azirhuwelele ziphezu kweentaba.
12 Aziphazimulise uJehovaBegodu zimemezele idumo lakhe eenhlengeleni.+
13 UJehova uzokuphuma njengendoda enamandla.+
Uzokuvusa itjisekwakhe njengengorho.+
Uzokurhuwelela uzokuhlaba umkhosi wepi;Uzozibonakalisa anamandla kunamanabakhe.+
14 “Ngithule isikhathi eside.
Bengisolo ngithulile begodu ngizibambile.
Njengomfazi obelethako,Ngesikhathi sinye ngizokuquma, ngiphefumule msinyana bese ngidose umoya.
15 Ngizokutjhabalalisa iintaba nemibunduNgomise neentjalo zakhona.
Ngizokwenza imilambo ibe ziinhlengeleBegodu ngomise amanzi wemilambo anemihlanga.+
16 Ngizokusa iimphofu endleleni ezingayaziko+Begodu ngizozenza zikhambe eendleleni ezingakayijayeli.+
Ngizokwenza ubumnyama obuphambi kwabo bube kukhanya+Begodu ngenze indawo enamatje ibe yinarha elelezekileko.+
Ngilokho engizobenzela khona begodu angekhe ngibalahle.”
17 Bazokujikiswa baphathiswe iinhloni ngokupheleleko,Labo abathembele eenthombeni ezibaziweko,Labo abathi eenthombeni zesimbi: “Nibozimu bethu.”+
18 Lalelani nina abangezwako;Qalani nibone nina abangaboniko.+
19 Ngubani ongaboniko ngaphandle kwencekwami,Ongezwako njengesithunywa engisithumeleko?
Ngubani ongaboniko njengothole umvuzo,Ongaboniko njengenceku kaJehova?+
20 Wena ubona izinto ezinengi kodwana awuhlali uziqalile.
Uvula iindlebe zakho kodwana awulaleli.+
21 Ngebanga lokulunga kwakhe,UJehova uthatjiswa kuphakamisa umthetho nokuwenza uphazimule.
22 Kodwana abantwaba badlelezelwe, bathathelwa izinto ngekani;+Boke bavaleleke emigodini begodu bafihlwe emajele.+
Badlelezelwe kunganamuntu ongabasindisa,+Begodu bathathelwe izinto zabo ngekani kunganamuntu othi: “Zibuyiseni!”
23 Ngubani hlangana nani ozokuzwa lokhu?
Ngubani ozokutjheja begodu alalele anombono wengomuso?
24 Ngubani onikele uJakopo bona athathelwe izinto ngekaniNgubani onikele u-Israyeli kubadlelezeli?
AkusinguJehova esimonileko na?
Balile ukukhamba eendleleni zakhe,Nomthethwakhe akhenge bawulalele.+
25 Bekasolo athululela ilaka lakhe kuye,Ukusilingeka kwakhe nelaka lepi.+
Larhiribidela koke okumbhodileko kodwana akhenge atjheje.+
Lavutha ngokujamelene naye kodwana akhenge akufake ehliziyweni.+
Imitlolo Ephasi
^ Namkha “Angabelani namuntu iphazimulwami.”
