Izaga 28:1-28
28 Abakhohlakeleko bayabaleka nalokha kunganamuntu obagijimisako,Kodwana abalungileko banesibindi njengebhubezi.+
2 Nakunomtjhapho enarheni, amakhosana azokutjhentjhwa kanengi,+Kodwana ngesizo lomuntu onelemuko nelwazi, ikosana izokukghodlhelela isikhathi eside.+
3 Umuntu otlhagako nakadlelezela odududu+Unjengezulu elikhukhula koke ukudla.
4 Labo abalahla umthetho badumisa okhohlakeleko,Kodwana labo abawuphethako bayasilingeka ngebanga labo.+
5 Abantu abambi ababuzwisisi ubulungiswa,Kodwana labo abafuna uJehova bangazwisisa yoke into.+
6 Ungcono umuntu otlhagako okhamba ngokuthembekaKunomuntu onjingileko oneendlela ezonakeleko.+
7 Indodana ezwisisako iphetha umthetho,Kodwana umngani wabadla khulu uhlazisa uyise.+
8 Owandisa umnothwakhe ngenzalo+ nangokwenza inzuzoUmnothwakhe uzokuba ngewaloyo onomusa kotlhagako.+
9 Loyo owala ukulalela umthethoNomthandazwakhe uyanyenyisa.+
10 Loyo odurhisela olungileko endleleni embi uzokuwela esithiyweni esibekwe nguye,+Kodwana omsulwa uzokuzuza okulungileko.+
11 Umuntu onjingileko uhlakaniphile emehlwenakhe,+Kodwana umuntu otlhagako onelemuko angafumana iqiniso ngaye.+
12 Abantu abalungileko nabaphumelelako, kuba nephazimulo ekulu,Kodwana abakhohlakeleko lokha babanamandla, abantu bayabhaca.+
13 Ofihla umtjhaphwakhe angekhe aphumelele,+Kodwana nanyana ngubani owuvumako bekawulahle uzokufumana umusa.+
14 Uyathaba umuntu ohlala atjheje ukuziphatha kwakhe,Kodwana nanyana ngubani oqinisa ihliziywakhe uzokuwela ehlekeleleni.+
15 Njengebhubezi elibhodlako nebhere esilingekileko egijimela ukuyokulwaUnjalo umbusi okhohlakeleko ebantwini abagandelelwako.+
16 Umrholi onganalemuko uwasebenzisa kumbi amandlakhe,+Kodwana loyo ohloya inzuzo engakathembeki uzokwandisa ukuphila kwakhe.+
17 Umuntu othweswe umlandu weengazi ngokubulala umuntu uzokuhlala abaleka bekube sethuneni.+
Akungabi nomuntu omvimbako.
18 Umuntu okhamba ngokungasoleki uzokusindiswa,+Kodwana loyo iindlela zakhe ezingakathembeki uzokuwa kungakalindeleki.+
19 Loyo olima ihlabathakhe uzokuba noburotho obunengi,Kodwana loyo olandelela izinto ezingasizi ngalitho uzokutlhaga khulu.+
20 Umuntu othembekileko uzokufumana iimbusiso ezinengi,+Kodwana loyo orhaba ubunjinga angeze ahlale amsulwa.+
21 Akukalungi ukukhethulula;+Kodwana umuntu angenza ubumbi obunjalo bonyana afumane isiqetjhana soburotho.
22 Umuntu omarhamaru ulwela ukufumana umnotho,Kodwana akazi bona uzokwehlelwa mtlhago.
23 Nanyana ngubani okhalima umuntu+ uzokufumana umusa omkhulu ngemva kwesikhathi+Ukudlula umuntu otshima ngelimu lakhe.
24 Nanyana ngubani odlelezela uyise nonina athi, “Akusikumbi,”+
Umngani womuntu obangela ihlekelele.+
25 Umuntu omarhamaru ubanga ukungazwani,Kodwana nanyana ngubani othembela kuJehova uzokuphumelela.+
26 Nanyana ngubani othemba ihliziywakhe usidlhadlha,+Kodwana loyo okhamba ngokuhlakanipha uzokuphunyurha.+
27 Nanyana ngubani opha abatlhagako angekhe atlhoge litho,+Kodwana nanyana ngubani ongabasizi uzokufumana iinqalekiso ezinengi.
28 Abakhohlakeleko lokha babanamandla, umuntu uyazifihla,Kodwana nabatjhabalalako, abalungileko bayanda.+
