Joromiya 7:1-34
7 Leli lilizwi elavela kuJehova liya kuJoromiya lithi:
2 “Jama esangweni lendlu kaJehova, umemezele lapho umlayezo lo, ‘Yizwani ilizwi lakaJehova noke nina bantu bakwaJuda eningena emasangweni la bona nikhothamele uJehova.
3 Ngilokhu uJehova wamabutho uZimu ka-Israyeli akutjhoko: “Lungisani iindlela nezenzo zenu, ngizonivumela bona nisolo nihlala endawenami.+
4 Ningathembeli emezwini ayikohliso nithi, ‘Leli lithempeli* lakaJehova, lithempeli lakaJehova, lithempeli lakaJehova!’+
5 Nanilungisa iindlela nezenzo zenu nisekele ubulungiswa phakathi nomuntu nomakhelwanakhe;+
6 nange ningagandeleli abantu abavela kwezinye iinarha, iintandani nabahlolokazi;+ nange ningaphalazi iingazi zabanganamlandu endaweni le, nange ningalandeli abanye abozimu kube kulimala kwenu;+
7 yeke ngizonivumela nisolo nihlala endaweni le, enarheni engayinikela abakhokho benu bona bahlale kiyo ngokungapheliko.”’”
8 “Kodwana nithembele emezwini akhohlisako,+ angekhe azuzisa nakancani.
9 Kghani ningeba,+ nibulale, nifebe,* nifunge ngamanga,+ nenzele uBhali+ imihlatjelo, nilandele abozimu eningabaziko,
10 ngemva kwalokho nize nizokujama phambi kwami endlini ebizwa ngegama lami begodu nithi, ‘sizokusindiswa,’ ngitjho nanyana nenza zoke izinto ezinyenyisakwezi?
11 Inga-kghani indlu ebizwa ngegama lami sele ibe lirholo labadlelezeli emehlwenenu?+ Nakhu ngizibonela ngamehlwami,” kutjho uJehova.
12 “‘Nanyana kunjalo, khambani niye endawenami eseTjhilo,+ lapho engabangela kokuthoma bona igama lami lihlale khona,+ nibone engakwenzako ngebanga lobumbi babantu bami u-Israyeli.+
13 Kodwana bewusolo wenza izintwezi,’ kutjho uJehova, ‘ngitjho nanyana ngikhulume nawe kanengi, akhenge ulalele,+ bengisolo ngikubiza kodwana akhenge uphendule.+
14 Njengombana ngenza ngeTjhilo,+ ngizokwenza njalo nendlini ebizwa ngegama lami+ enithembele kiyo,+ endaweni enganinikela yona nabokhokho benu.
15 Ngizonisusa phambi kwami njengombana ngenza kibo boke abafowenu nazo zoke iinzukulwana zaka-Efrayimu.’+
16 “Nakunguwe, ungabathandazeli abantwaba. Ungabalileli namkha ubathandazele namkha ubabawele,+ ngombana angekhe ngikulalele.+
17 Awukuboni na abakwenzako emadorobheni wakwaJuda neendleleni zeJerusalema?
18 Amadodana abuthelela iinkuni, abobaba babasa umlilo, abafazi babhica ihlama bona benzele iNdlovukazi yeZulwini*+ amakhekhe womhlatjelo, begodu bathelela abanye abozimu iminikelo yesiselo bona bangisilinge.+
19 ‘Kghani bazwisa mina na ubuhlungu?’ Kutjho uJehova. Abazizwisi bona, bazihlazise?’+
20 Yeke nakhu iKosi ePhakemeko uJehova ekutjhoko, ‘Qala ilaka lami nokusilingeka kwami kuzokuthululeka endaweni le,+ emuntwini nesibandaneni, emuthini wesimu nesithelweni esivela ehlabathini; lizokutjhisa begodu angeze licinywe.’+
21 “Ngilokhu uJehova wamabutho uZimu ka-Israyeli akutjhoko, ‘Ragelani phambili ningezelele iminikelo epheleleko yokutjhiswa kweminye imihlatjelwenu, nidle inyama leyo ngokwenu.+
22 Ngombana ngelanga engakhupha ngalo abokhokho benu eGibhide, akhenge ngikhulume nabo namkha ngibayale ngebanga leminikelo etjhiswako epheleleko nemihlatjelo.+
23 Kodwana ngabanikela umyalo lo: “Lalelani ilizwi lami begodu ngizokuba nguZimenu, nibe babantu bami.+ Kufuze ningasuki endleleni enginiyala ngayo bona kunikhambele kuhle.”’+
24 Kodwana akhenge bangizwe namkha bangilalelisise,+ kunalokho bakhamba ngamaqhingabo, ngekani balandela ihliziywabo ekhohlakeleko,+ bahlehlela emva bangatjhingi phambili,
25 kusukela ngelanga abokhokho benu abaphuma ngalo enarheni yeGibhide bekube kunamhlanjesi.+ Bengisolo ngithumela zoke iinceku zami abaphorofidi, bengibathumela qobe langa, ngokubuyelelweko.+
26 Akhenge bafune ukungizwa, begodu akhenge bafune ukungilalela.+ Kunalokho bebanekani, benza ngokubuyelelweko ukudlula abokhokho babo!
27 “Uzobatjela amezwi la+ kodwana angekhe bakulalele, uzobabiza kodwana angeze bakuphendule.
28 Begodu uzokuthi kibo, ‘Lesi sitjhaba esingafuni ukulalela ilizwi lakaJehova uZimabo begodu sala ukwamukela isiyalo. Ukuthembeka kutjhabalele begodu akukhulunywa ngakho hlangana naso.’+
29 “Rhunani iinhluthu zenu ezide nizilahle, vumelani phezulu ingoma yesililo emibundwini enganalitho, ngombana uJehova usalile begodu usilahlile isizukulwana esimsilingileko.
30 ‘Ngombana abantu bakwaJuda benze okumbi emehlwenami,’ kutjho uJehova. ‘Babeke iinthombe zabo ezinyenyisako endlini ebizwa ngegama lami bona bayisilaphaze.+
31 Bakhe iindawo eziphakemeko eThofethi emRhobeni weNdodana kaHinomu,*+ bona batjhise amadodana namadodakazabo emlilweni,+ into engingakhenge ngibayale bona bayenze, engakhenge ifike nakancani ehliziywenami.’+
32 “‘Yeke qala! Isikhathi siyeza’ kutjho uJehova, ‘lapho ingekhe isabizwa ngokuthi yiThofethi namkha mRhoba wendodana kaHinomu* kodwana izokubizwa ngokuthi mRhoba wokuRhayilwa. Kodwana bazokubulunga eThofethi bekube kulapho kungasanandawo.+
33 Iindumbu zabo zizokuba kukudla kweenyoni zezulu neembandana zephasi, angekhe kube nomuntu ozozithusa.+
34 Ngizokuthulisa itjhada lethabo netjhada lokujekezela, ilizwi lomkhwenyana nelizwi lakamakoti+ emadorobheni wakwaJuda neendleleni zeJerusalema ngombana inarha izokuba marubhi.”’+
Imitlolo Ephasi
^ NgesiHebheru, la kuqaliselwe kiyo yoke imakhiwo yethempeli.
^ NgesiHebheru, kusetjenziswe ibizo eliqalisela emuntwini otjhadileko oya emabhayini nomuntu angakatjhadi naye.
^ Sisiqu sakazimukazi obekalotjhwa ma-Israyeli ahlubukileko namkha kungenzeka nguzimukazi ebebathi ubangela abafazi bona babelethe.
^ Qala ihlathululo, “Gehena.”
^ Qala ihlathululo, “Gehena.”
