Jotjhuwa 5:1-15
5 Msinyana amakhosi woke wama-Amori+ ebewangehlangothini elingetjingalanga* leJordani nawo woke amakhosi wamaKanana+ ebewaselwandle, nawezwa bona uJehova womise amanzi weJordani phambi kwama-Israyeli bekwaba kulapho ama-Israyeli ayama, angenwa mamanzi emadolweni*+ begodu aphelelwa mamandla ngebanga lama-Israyeli.+
2 Ngesikhatheso uJehova wathi kuJotjhuwa: “Zenzele imikhwa yamatje usoke+ amadoda wakwa-Israyeli, ihlandla lesibili.”
3 Yeke uJotjhuwa wenza imikhwa yamatje wasoka amadoda wakwa-Israyeli eGibeyathi-Haralothi.*+
4 Nanti ibanga elenza uJotjhuwa wawasoka: Boke abantu bembaji abaphuma eGibhide, okutjho amadoda woke wepi, bahlongakala emmangweni endleleni ngemva kokuphuma eGibhide.+
5 Boke abantu abaphuma eGibhide bebasokiwe kodwana boke abantu ababelethwa emmangweni endleleni ngemva kokuthi baphume eGibhide bebangakasokwa.
6 Ama-Israyeli bewakhambe iminyaka ema-40+ emmangweni bekwaba kulapho isitjhaba soke sihlongakala, okumadoda wepi aphuma eGibhide angazange alalele ilizwi lakaJehova.+ UJehova wafunga kiwo bona angeze awavumele abone inarha+ uJehova ebekafunge kibokhokho bawo ukuyinikela abantu bakhe,*+ inarha egeleza ibisi neliju.+
7 Yeke waphakamisa amadodanawo esikhundleni sawo.+ Ngilawa uJotjhuwa awasokako; bewangakasokwa ngombana bebangakawasoki endleleni.
8 Ngemva kokuthi woke amadoda asokiwe, abantu bahlala ekampeni bekwaba kulapho amadoda la aphola khona.
9 Ngemva kwalokho, uJehova wathi kuJotjhuwa: “Namhlanjesi ngisuse ihlazo labantu beGibhide kini.” Yeke indawo leyo ibizwa ngokuthi yiGiligali*+ bekube kunamhlanjesi.
10 Ama-Israyeli araga nokuhloma ikampa eGiligali begodu agidinga iPhasika ngelanga le-14 lenyanga+ entambama emmangweni othabaleleko weJerikho.
11 Athoma ukudla izinto ezivezwa yinarha ngelanga elilandela iPhasika. Mhlokho adla uburotho obunganasibiliso+ neenthoro ezikhanzingiweko.
12 Imana yagcina ukuba khona ngelangelo, mhlana badla izinto ezivela enarheni; ama-Israyeli+ akhenge asafumana imana kodwana athoma ukudla izinto ezivezwa yinarha yeKanana ngomnyaka loyo.+
13 Kwathi uJotjhuwa nakaseduze neJerikho, waphakamisa amehlo wabona indoda+ ijame phambi kwakhe iphethe isabula ngesandla.+ UJotjhuwa watjhinga kiyo wayibuza wathi: “Ungehlangothini lethu na namkha ungehlangothini lamanabethu?”
14 Yamphendula yathi: “Awa kodwana ngiyikosana* yebutho lakaJehova.”+ UJotjhuwa wawa ngobuso waguqa, wathi kiyo: “Uthini umlayezo wekosami encekwinayo?”
15 Ikosana yebutho lakaJehova yaphendula uJotjhuwa yathi: “Hlubula amapatlagwanakho ngombana indawo ojame kiyo icwengile.” UJotjhuwa wenza njalo khonokho.+
Imitlolo Ephasi
^ NgesiHebheru, “elitjhinga elwandle.”
^ NgesiHebheru, “iinhliziyo zawo zancibilika.”
^ Kutjho ukuthi “UmBundu wamaJwabu.”
^ NgesiHebheru, “ukusinikela yona.”
^ Kutjho ukuthi “Gedeka; Gedekela Kude.”
^ Namkha “induna.”
