Nerhemiya 2:1-20
2 Ngenyanga kaNisani,* ngomnyaka wama-20+ weKosi u-Aritarhitjhasta,+ kwabekwa iwayini phambi kwakhe, njengombana bengihlala ngenza ngathatha iwayini ngalisa ekosini.+ Bekukokuthoma ngibonakala ngitlhuwile phambi kwekosi.
2 Nje-ke ikosi yathi kimi: “Kubayini utlhuwisa kangaka ngitjho nanyana ungaguli? Amatlhuwo la abangelwa buhlungu behliziyo.” Nangizwa lokho ngarhidlwa livalo.
3 Ngathi ekosini: “Bayede kosi!* Ngingahlala njani ngingatlhuwi, njengombana idorobho lekhethu, indawo ekubulungelwe kiyo abokhokho bami imarubhi namasangwayo atjhiswe ngomlilo?”+
4 Ikosi yathi kimi: “Ufunani?” Khonokho ngathandaza kuZimu wezulwini.+
5 Ngemva kwalokho ngathi ekosini: “Nange kukuhle ekosini begodu isisebenzi sakho sifumene umusa kuwe, ngibawa ungivumele ngiye kwaJuda, idorobho ekubulungelwe kilo abokhokho, bonyana ngiyolakha kabutjha.”+
6 Nje-ke ikosi, nendlovukazi ihlezi eqadi kwayo, yangibuza yathi: “Lizokuthatha isikhathi esingangani ikhambo lakho, uzokubuya nini?” Ikosi yangivumela bona ngikhambe,+ ngayitjela nokobana ngizokukhamba isikhathi esingangani.+
7 Ngemva kwalokho ngathi ekosini: “Nange kukuhle ekosini, anginikelwe iincwadi eziya ebabusini besifunda esingaPhetjheya koMlambo,*+ ezinginikela imvumo yokudlula enarhenabo ngokuphepha bengifike kwaJuda,
8 nencwadi eya ku-Asafa umtlhogomeli wehlathi lekosi, bona anginikele iingodo zesango lobuPhephelo beThempeli+ nezamaboda wedorobho+ nendlu engizokuya kiyo.” Ikosi yanginikela iincwadezo+ ngombana uZimami onomusa bekanami.+
9 Ekugcineni ngafika ebabusini besifunda esingaPhetjheya koMlambo, ngabanikela iincwadi ezivela ekosini. Ikosi yayala nokobana ngiphekelelwe ziinduna zamabutho namabutho akhwele iinjomani.
10 Kwathi indaba le nayifika eendlebeni zakaSanibhalathi+ umRhoroni noThobiya+ isikhulu esim-Amoni,+ badana khulu ngombana kufike umuntu ozokwenzela abantu bakwa-Israyeli intwehle.
11 Ngafika eJerusalema, ngahlala khona amalanga amathathu.
12 Mina namadoda ambalwa savuka ebusuku, kodwana azange ngitjele muntu lokho uZimu akufake ehliziywenami bona ngikwenzele iJerusalema, azange sikhambe nesilwana ngaphandle kwakadumbana ebengikhamba ngaye.
13 Ngaphuma ebusuku ngeSango lomRhoba,+ ngadlula phambi komThombo weNyoka eKulu ngatjhinga eSangweni leZala,+ ngahlolisisa amaboda weJerusalema agiriziweko namasangwalo atjhiswe ngomlilo.+
14 Ngadlula ngatjhinga eSangweni lomThombo+ neSizibeni seKosi, kodwana azange kube nesikhala esaneleko bona udumbana ebengikhamba ngaye akghone ukudlula.
15 Nanyana kunjalo, ngaraga nekhambo nganyuka umrhoba+ ebusuku, ngisolo ngihlolisisa iboda, nangiqedako ngabuyela emva ngangena ngeSango lomRhoba.
16 Amasekela wababusi+ bekangazi ukuthi ngiyephi nokuthi ngenzani, ngombana bengingakatjho litho emaJudeni, ebaphristini, eenkhulwini, emasekeleni wababusi nakizo zoke iinsebenzi.
17 Emaswapheleni ngathi kibo: “Niyabona ukuthi sisebujamweni obutlhuwisa kangangani, iJerusalema limarubhi namasangwalo atjhiswe ngomlilo. Yenize, asakheni kabutjha amaboda weJerusalema, khona kuzakuphela ihlazweli.”
18 Ngabatjela ukuthi uZimami ube muhle kangangani kimi+ namezwi ikosi engitjele wona.+ Nabezwa lokho bathi: “Asisikimeni sakheni.” Nje-ke bakhuthazana bonyana benze umsebenzi omuhle.+
19 Nje-ke kwathi uSanibhalathi umRhoroni, uThobiya+ isikhulu esimAmoni+ noGetjhemu umArabhu+ nabezwa ngalokho, bathoma ukuhlekisa ngathi+ nokusidelela bathi: “Yintobani eniyenzako le? Niyahlubuka ekosini?”+
20 Ngabaphendula ngathi: “UZimu wezulwini nguye ozosiphumelelisa,+ yeke thina njengombana siziinceku zakhe sizokusikima sakhe; kodwana nina aninasabelo eJerusalema, ayikho into eningathi ngeyenu begodu aninangcenye emlandwenalo.”+
Imitlolo Ephasi
^ Qala Isith. B15.
^ Namkha “Kwanga ikosi ingaphila isikhathi eside!”
^ Namkha “Ngaphetjheya kweYufrathe.”
