Sinamavidiyo amane wesifundo seBhayibheli esingawasebenzisa esimini. Ngayinye yamavidiyo la yenzelweni?

• Kubayini Kufuze Ufunde IBhayibheli?​—Ividiyo Epheleleko yenzelwa ukusiza abantu abathanda ukufunda iBhayibheli kunganandaba ukuthi bakholelwa ini. Ikhuthaza abayibukeleko ukuthi barhubhulule eBhayibhelini bona bafumane iimpendulo zemibuzo eqakathekileko begodu inikela ngeempendulo ezizwakalako ezifumaneka lapho. Ihlathulula ukuthi singasibawa njani isifundo seBhayibheli.

• Kubayini Kufuze Ufunde IBhayibheli? (isiqetjhana) ifana nevidiyo epheleleko kodwana le ngefitjhani. Ingasebenza khulu endaweni lapho kunabantu abarhabileko.

• Kwenziwani Esifundweni SeBhayibheli? yenzelwe ukusiza abantu bona babe nekareko ehlelweni lethu lasimahla lokufunda iBhayibheli nokuphendula eminye imibuzo ejayelekileko, kuhlanganise nokuthi ungasibawa njani isifundo seBhayibheli.

• Siyakwamukela EsiFundweni Sakho SeBhayibheli yenzelwe ukuthi siyitjengise abantu esifunda nabo iBhayibheli. Nanyana ividiyo le kukhulunywa ngayo ekhasini 2 lencwadi ethi Thabela Ukuphila Ngokungapheliko!, ingatjengiswa umuntu nakucocwa naye ngencwajana ethi Thabela Ukuphila Ngokungapheliko! Ividiyo le iveza lokho okufumaneka ngaphakathi kwencwadi nalokho umfundi angakulindela phakathi nesifundo.

Nanyana ividiyo ngayinye yenziwe ngomnqopho othileko, ingadlalelwa namkha ithunyelwe nanyana ngubani ubujamo nabuvumako. Abarhuweleli bakhuthazwa ukuthi bazijwayelanise namavidiyo la begodu bawasebenzise kuhle esimini.