Kungasikade uJehova ngekhe asalibekezelela iphaseli. Ikolo yamala izokubhujiswa, Iintjhaba ezibumbeneko zizokuhlasela abantu bakaZimu, begodu ngepi ye-Arimagedoni uJehova uzokutjhabalalisa abantu abambi. AmaKrestu aqale phambili ezenzakalweni eziqakathekilekwezi nezithabisako.

Liqiniso, asiyazi yoke imininingwana ngesizi elikhulu. Ngokwesibonelo, asazi ukuthi liyokuthoma nini ngokunqophileko. Asiwazi amabanga azokunikelwa ngezepolitiki ukuhlathulula ukuhlasela kwabo ikolo. Asazi ukuthi iintjhaba zizokuhlasela abantu bakaZimu isikhathi eside kangangani nokuthi yini enye ebandakanyekileko. Asazi ngokunqophileko ukuthi uJehova uzokusebenzisa ini ukutjhabalalisa abambi epini ye-Arimagedoni.

Nokho, Imitlolo isinikela loke ilwazi esilitlhogako ukuthi sikghone ukuqalana nokusezako ngethemba nangesibindi. Ngokwesibonelo, siyazi ukuthi siphila emaphethelweni ‘wemihla yokuphela.’ (2 Thim 3:1) Siyazi ukuthi ukuhlaselwa kwekolo “kuzokurhunyezwa” ukwenzela bona ikolo yeqiniso ingatjhatjalaliswa. (Mat 24:22) Siyazi ukuthi uJehova uzobasindisa abantu bakhe. (2 Pit 2:9) Begodu siyazi ukuthi loyo okhethwe nguJehova bona asuse abambi bekasindise isiqubuthu esikhulu nge-Arimagedoni ulungile begodu unamandla.—IsAm 19:11, 15, 16.

Izehlakalo ezizakwezi zizokwenza abantu “bayathe ngokwesaba.” Nanyana kunjalo, ngokufunda nangokucabangisisa ngezenzo zakaJehova zakade zokusindisa nalokho akuvezileko ngengomuso, singa “jama rwe siphakamise iinhloko zethu.” Sinethemba lokuthi ukutjhaphululwa kwethu kutjhidele.—Luk 21:26, 28.