ABALINDI Abalindi babekelwe ukusiza wena. Sibawa nibambisane nabo ngokulandela iinqophiso abaninikela zona eendabeni ezimalungana nokuphaga iinkoloyi, ukungena nokuphuma endaweni yomhlangano, ukubekela abanye iindawo zokuhlala nezinye izinto.

UKUBHAJADISWA Iinhlalo ezibekelwe abazokubhajadiswa zizokuba phambi kwesikhulumi, ngaphandle kwalokha nifumene iinqophiso ezihlukileko. Abazokubhajadiswa kufuze bona sele bahlezi endaweni ababekelwe yona ngaphambi kobana kuthome ikulumo yokubhajadiswa, ezokunikelwa ngoMgqibelo ekuseni. Omunye nomunye kufuze aziphathele ithawula nezambatho zokungena emanzini ezifanelekako.

IMINIKELO Kube ziindleko ezikulu ukufumana iinhlalo ezaneleko, imibhobho, imitjhini yokudlala amavidiyo nezinye izinto ezitlhogekako bona umhlangano lo ube yipumelelo begodu usisize sitjhidele kuJehova. Umnikelwakho usiza bona kubhadelwe iindlekwezi begodu usekela nomsebenzi kaZimu wephasi loke. Bona sinenzele izinto zibe lula, kubekwe amabhoksi womnikelo atlolwe ngokubonakalako kiyo yoke indawo yomhlangano le. Ninganikela nangokusebenzisa i-inthanethi ngokungena ku-donate.pr418.com. Awukho umnikelo oqalelwa phasi. IsiHlopha esiBusako sinithokoza kwamambala ngokusekela kwenu umsebenzi womBuso ngezandla ezivulekileko.

ISIZO ELIRHABAKO Sibawa utjheje bona umnyango lo ngewobujamo oburhabako kwaphela.

OKULAHLEKILEKO KWAFUMANEKA Zoke izinto ezingakathathwa kufuze zisiwe eMnyangweni weziNto ezilaHlekileko zaFumaneka. Nange ulahlekelwe ngokuthileko, tjhinga emnyangweni lo uyokuqala okukulahlekeleko. Abantwana abalahlekelene nababelethi namkha abalahlekileko kufuze basiwe emnyangweni lo. Nanyana kunjalo bona sibalekele ukuthwesa abanye umthwalo sibawa nitlhogomele abantwana benu niqiniseke bona bahlala baseduze kwenu.

UKUHLALA Sibawa nicabangele abanye. Khumbula, iinhlalo zingabekelwa kwaphela amalunga womndeni aseduze, okhamba nabo ekoloyini, ohlala nabo ekhaya namkha ofunda nabo iBhayibheli. Sibawa ningabeki izinto eenhlalweni eningakazibekeli abantu.

UMSEBENZI WOKUZITHANDELA Nange ufuna ukusiza ngomsebenzi othileko emhlanganweni lo, sibawa uthintane nomnyango wemininingwana neenseBenzi zokuziThandela.