Indaba 6: Indodana Elungileko Nengakalungi
AKHESE uqale uKayini no-Abela. Bakhulile. UKayini mlimi, utjala isiphila, iinthelo nemirorho.
Kodwana u-Abela yena uyalusa. Uthanda ukutjheja amalamjana. Njengombana akhula u-Abela ubanomhlambi omkhulu wezimvu ekufanele awutjheje.
Langelinye uKayini no-Abela balethela uZimu isipho. UKayini uletha eminye yemirorho neenthelo azitjalileko. U-Abela uletha imvu ehle khulu kilezo anazo. UJehova uyasithabela isipho saka-Abela. Kodwana akasithabeli sakaKayini. Uyazi bona kubayini?
Asikukuthi isipho saka-Abela besibhedere kunesakaKayini. Kungombana u-Abela bekayindoda elungileko ethanda uJehova nomnakwabo. Kodwana uKayini bekangalungi; angamthandi umnakwabo.
UZimu watjela uKayini bonyana atjhintjhe iindlela zakhe. Kodwana uKayini waba nekani. Wakwata khulu ngombana uZimu bekathanda u-Abela kunaye. UKayini wathi ku-Abela, ‘Asiye ehlathini.’ Nesele babobabili uKayini wabetha umnakwabo kabuhlungu, wambulala. Into eyenziwa nguKayini yimbi khulu.
Namtjhana u-Abela afa, uZimu usamkhumbula. U-Abela gade alungile begodu uJehova akabalibali abantu abanjalo. Langelinye, uJehova uzomvusa u-Abela. Ngesikhatheso uAbela ngeze asafa, uzokuphila ngokungapheliko ephasini. Ngeze wakuthabela ukwazi umuntu onjengo-Abela?
Abantu abanjengoKayini abamthabisi uZimu. Ngemva kokobanyana uKayini abulele umnakwabo, uZimu wamnikela isibetho ngokumqothela kude nabekhabo. UKayini nekakhambako, wakhamba nomunye wabodadwabo, watjhada naye.
UKayini nomkakhe baba nabantwana. Namanye amadodana namadodakazi ka-Adamu no-Efa atjhada aba nabantwana. Msinyana iphasi lazala abantu. Akhe sifunde ngabanye babo.
Genesisi 4:2-26; 1 Jwanisi 3:11, 12; Jwanisi 11:25.
Iimbuzo
- UKayini no-Abela bebenza miphi iimberego?
- Ngiziphi izipho uKayini no-Abela abaziletha kuJehova?
- Kubayini uJehova athabiswa sisipho saka-Abela, begodu kubayini angathabi ngesipho sakaKayini?
- UKayini bekamuntu onjani, begodu uJehova walinga njani ukumkhalima?
- Khuyini uKayini akwenzako nasele babodwa nomnakwabo emangweni?
- Hlathulula bona kwenzekani kuKayini ngemva kokobana sele abulele umnakwabo.
Iimbuzo engezelelekileko
- Funda uGenesisi 4:2-26.
UJehova wabuhlathulula bunjani ubujamo obuyingozi uKayini agade akibo? (Gen. 4:7)
UKayini wabuveza njani ubujamo behliziyo yakhe? (Gen. 4:9)
UJehova ukuqala njani ukuphalaza iingazi ezinganamlando? (Gen. 4:10; Isa. 26:21)
- Funda 1 uJwanisi 3:11, 12.
Kubayini uKayini avutha ngokukwata, begodu lokhu kusiyelelisa njani thina? (Gen. 4:4, 5; Iziy. 14:30; 28:22)
Ibhayibhili likutjengisa njani bona namtjhana woke amalunga womndenethu aphikisana noJehova, singakghona ukuhlala sithembekile thina? (AmaRha. 27:10; Mat. 10:21, 22)
- Funda uJwanisi 11:25.
Ngisiphi isiqinisekiso uJehova asinikelako malungana nabo boke abafela ukulunga? (Jwanisi 5:24)
Okhunye Ongakuthabela
LINGISA IKHOLO LABO
U-Abela—‘Nanyana Aselafa, Ikholo Lakhe Lisakhuluma’
Khuyini esingayifunda ngo-Abela nekholo lakhe njengombana kukuncani kangako okutjhiwo ngaye eBhayibhelini?
