Indaba 20: UDina Ungena Emrarweni
UYABONA bona uDina uyokukweriyela abobani? Uyokukweriyela abanye babantazana abahlala enarheni yeKanana. Ucabanga bonyana uyise uJakobho uyakuthabela lokho akwenzako? Ukukurhelebha bonyana uthole ipendulo yombuzo lo, linga ukukhumbula bona u-Abrahama no-Isaka bebacabangani ngabafazi beKanana.
U-Abrahama bekafuna na bona indodanakhe u-Isaka itjhade nomntazana weKanana? Awa, gade angafuni. U-Isaka noRebeka bebafuna na bona indodanabo uJakobho itjhade nomntazana omKanana? Awa, gade bangafuni. Uyazi bonyana kubayini?
Kungombana abantu beKanana bebakhonza abosingazimu. Bebababantu abangakalungi bonyana bangatjhada nabo, babe bangani babo. Yeke, singaqiniseka bonyana uJakobho bekangakuthabeli bona indodakazakhe ifuna ukuba mngani wabantazana beKanana.
Kwamambala, uDina wangena emrarweni. Uyayibona indoda emKanani esithombeni eqale uDina? Ibizo layo nguShekemi. Langelinye uDina nakayokukweriyela abangani bakhe, uShekemi wathatha uDina wamkatalela bonyana alale naye. Lokho bekungakalungi ngombana yindoda nomfazi abatjhadileko kwaphela okufuneka balale ndawonye. Isenzo esimbesi uShekemi asenza kuDina sabangela neminye imiraro.
Abanakwabo lakaDina bakwata khulu nabezwa ngalokho okwenzekileko. Ababili babo okunguSimyoni noLevi, bakwata khulu bebathatha iinsabula zabo batjhinga emzini, baragelela amadoda wakhona angakatjheji. Bobabili uSimyoni noLevi nabanakwabo babulala uShekemi nawo woke amadoda. UJakobho wakwata khulu ngombana into eyenzwe madodanakhe la beyiyimbi.
Yathoma bunjani yoke imiraro le? Kungombana uDina waba mngani wabantu abangalaleli imithetho kaZimu. Asifuni ukuba nabangani abanjalo, angitjho?
Genesisi 34:1-31.
Iimbuzo
- Kubayini u-Abrahama no-Isaka bangafuni abantwana babo batjhade nabantu benarheni yeKanana?
- UJakobhowakuvumela na bonyana indodakazakhe ibemngani nabantazana beKanana?
- Ngubani indoda le eqale uDina esithombeni, begodu ngiyiphi into embi ayenzako?
- Benzani abanakwabo bakaDina, uSimyoni noLevi lokha nabezwa ngalokha okwenzekileko?
- UJakobho wakuvumelana na nalokho okwenziwa nguSimyoni noLevi?
- Yathoma njani yoke imiraro yemndeni?
Iimbuzo engezelelekileko
- Funda uGenesisi 34:1-31.
UDina wavakatjhela amadodakazi wenarheni ye-Kanana kanye kwaphela na? Hlathulula. (Gen. 34:1)
Kubayini uDina naye waba nomlandu wokulahlekelwa buntombi bakhe? (Gal. 6:7)
Ulutjha namhlanjesi lungatjengisa bunjani bona luyasitjheja isiyeleliso sesibonelo sakaDina? (Izey. 13:20; 1 Kor. 15:33; 1 Jwanisi 5:19)
