INdaba 38: Iinhloli Eziyi-12
QALA isithelo esiphethwe madoda la. Akhese ubone bona makhulu kangangani amadiribe la. Kufuneka kube madoda amabili azowatjatha ngegodo. Qala godu amafeyi namarharnada. Zivela kuphi iinthelo ezihlezi? Zivela enarheni yeKanana. Khumbula bonyana iKanana kulapho u-Abrahama, u-Isaka noJakobho egade bahlala khona. Kodwana ngebanga lendlala uJakobho nomndenakhe bafudukela eGibhide. Eemnyakeni epheze ibe yi-216 ngemva kwalokho, uMosisi udosa ama-Israyeli phambili bona abuyele eKanana. Kwanje bahlala endaweni yemangweni ebizwa bona yiKadeshi.
Bekuhlala abantu abangakalungi enarheni yeKanana. Ngalokho uMosisi wathumela iinhloli eziyi-12 wathi kizo: ‘Fumanani bona bangaki abantu abahlala lapho begodu banamandla kangangani. Niqale nokobana enarheni leyo singakwazi ukutjala na. Niqiniseke bona nibuya nesinye isithelo sakhona.’
Lokha iinhloli zibuya eKadeshi zatjela uMosisi zathi: ‘Yinarha ehle kwamambala leya.’ Ukuqinisekisa uMosisi bamtjengisa nesinye isithelo sakhona. Kodwana ezinye iinhloli eziyi-10 zathi: ‘Abantu abahlala khona bakhulu begodu banamandla. Sizokubulawa nesingalinga ukuthatha inarha leyo.’
Ama-Israyeli abethwa livalo nekazwa iindabezi, athi: ‘Bekuzokuba bhedere khulu ukufela eGibhide namtjhana ukufela emangweni. Sizokubulawela epini begodu abafazi nabantwana bethu bazokuthunjwa maKanana. Asikhetheni omunye umdosiphambili esikhundleni sakaMosisi sibuyele eGibhide!’
Kodwana iinhloli eembili bezithembele kuJehova begodu zalinga ukwehlisa umoya wabantu. Amabizwabo bekunguJoshuwa noKalebi. Bathi kibo: ‘ Ningabethwa livalo, uJehova unathi. Kuzokuba yinto ebulula ukuthatha inarha.’ Kodwana abantu akhenge balalele. Bafuna ukubulala uJoshuwa noKalebi.
Lokhu kwenza uJehova wakwate khulu begodu wathi kuMosisi: ‘Akekho umuntu oneemnyaka esukela ku-20 namtjhana ngaphezulu ozokungena enarheni yeKanana. Babonile ngemmangaliso engizenzileko eGibhide nemangweni, kodwana namtjhana kunjalo, abangithembi. Ngalokho bayokuzulazula emangweni iimnyaka eyi-40 bekube kulapho kufa umuntu wamaswaphela. NguJoshuwa noKalebi kwaphela abazokungena enarheni yeKanana.’
Numeri 13:1-33; 14:1-38.
Iimbuzo
- Khuyini oyitjhejako ngamadiribe amakhulu la asesithombenesi, begodu avela kuphi?
- Kubayini uMosisi athumela iinhloli eziyi-12 enarheni yeKanana?
- Iinhloli ezilitjhumi zathini kuMosisi lokha nazibuyako?
- Iinhloli eembili zatjengisa njani bona zithembele kuJehova, begodu bobani amabizo wazo?
- Kubayini uJehova bekakwatile, begodu wathini kuMosisi?
Iimbuzo engezelelekileko
- Funda uNumeri 13:1-33.
Bobani abakhethwa bona bayokuhlola inarha, begodu ngiliphi ithuba elikhulu ababanalo? (Num. 13:2, 3, 18-20)
Kubayini umbono kaJoshuwa noKalebi bewuhlukile kwezinye iinhloli, begodu lokhu kusifundisani? (Num. 13:28-30; Mt. 17:20; 2 Kor. 5:7)
- Funda uNumeri 14:1-38.
Ngisiphi isiyeleliso okufuneka sisilalele malungana nokunghonghoyila ngabantu abajamiselela uJehova? (Num. 14:2, 3, 27; Mt. 25:40, 45; 1 Kor. 10:10)
UNumeri 14:24 utjengisa njani bona uJehova unekareko ekulu kiloyo oyincekwakhe? (1 Amakh. 19:18; Iziy. 15:3)
